8月 11, 2017

2017暑假旅遊

旅行回來一陣,自己就重回工作,由於暑假細路仍未開學,太太就忙碌於安排每日細路的節目,始終唔想細路成日由朝到晚在家看電視卡通,所以安排左不同的興趣班:溜冰,游水,去下公園,圖書館,不同展覽館..,對細路身心發展都健康D。

旅行回來,原想要執筆寫下旅記,給有看開這個R's blog的自己友分享下旅行快樂事。
但原來要整理的相及旅記, 都幾大工程,都係以後慢慢先補寫,現先上下的相就算。



今次去澳洲玩左近兩個禮貌,旅程極開心,一班人去玩,最緊要個個都平安健康無病痛,食得睡得玩得,特別是飲得, 一班男人,餐餐基本上也有美酒,食海鮮平靚正。

澳洲正常旅遊景點,其實無乜好寫,事實無乜新奇景點購物樂,最主要看下風景,去下酒莊farm等,睇下袋鼠樹熊,行下國家植物公園,去下海灘咁,分別係最主要有一班細路,細路先係主角,好多行程景點是安排比他們親眼遊歷感受下,自制遊學團咁。





澳洲天空夠黑,少光污染,晚上同一班細路看星星,用app去逐個星座搵出來,超好玩。



澳洲,尤其墨爾笨,是將來細路有機會留學選擇的地點之一,感覺不錯,貪佢簡單純樸一點。去旅行,無租車,唔洗煩,去到邊都可以飲下啤酒,幾爽。遊記旅後感,容後補寫。


另外,自己開始對越來越對whisky有興趣,,出外去旅行,會開始行人地的賣酒地方,搜刮好野,尤其scotch single malt whisky, 有30年或以上的,價合理見到會即買。今趟的其—個收獲,Laphroaig30年,9千銀港紙唔洗,超抵。下一支,好想買到支Macallan30年,香港街價賣港紙3萬2左右,唯有去外地旅行時搵下。

題外話,香港烈酒稅係100%,威士忌年年漲價機會好大,自己覺得值得收藏有年份的whisky,其實自己未必識飲出果種味道,亦好少機會會開咁高年份的來飲,買左純粹觀賞收藏,呢種屬屎忽痕嗜好玩意,又幾好過癮好玩,一路買收藏時,一路研究學習這瓶威士忌的文化出產處及其知識。 

靚車,錶,酒,旅行,靚女人,呢D可能就係男人天性,好自然會迷上及追求。
靚女人=R太太,一個已夠滿足,已經無得再upgrade了,唯有追求下其它方面。

在旅途上,而家有上網whatsapp, 真係好方便,能遙遠控制處理很多事,
離下題譽先,講下工作投資事:

新辣招前,自己買多了一個工廈,仍可做4成按,回港後要急處理這一個新購近1200呎的工廈的裝修分間放租事情,原本一切就緒,訂好了防火大門,師傅亦已動工拉電,裝好冷氣及換窗等...但剛有租客原整個大單位租下,價錢offer又理想,回港剛好能及時可以叫停進一步裝修事情,能慳下不錯的裝修費,正。

2010年,無記錯,自己買第一個工廈,當時平到嘔,坊間全無資料,無新聞報告,無研究,想google一下分析都無,總之就係1000蚊一呎左右,7年後今天,已是3倍以上。停手了幾年,今年又再開始買,原因一樣,仍然是抵買。Anyway,資產配置樣樣有D,其實果別項目升跌真無乜所謂,整體有失時亦有得,平常心最好。















 










 
 

  



14 則留言:

  1. 可以分享多一些工廈資料嗎?小弟十分有興趣, 最近也有留意東九工廈, 但尺價比較高.

    回覆刪除
    回覆
    1. 東九我近年有keep住睇盤,主要睇新蒲崗,九龍灣,呢價4千至5千多水平那些,但收租回報稍偏低,不是我杯茶,買來自用or搏賺價升值還可。自己工廈投資不想詳寫或唱好,廢事鼓吹人去買,跌左找我晦氣,你有興趣想入手收租,買600呎左右,lumpsum 細,呎平,有車埸,地點就腳的,基本上會好快租出。

      刪除
  2. 澳洲係一個好地方,今年四月去完,明年三月再去。

    R兄點收藏 你d 靚酒?

    回覆刪除
    回覆
    1. 我老婆已訂多個櫃,櫃頂放我D收藏。 近年去左兩次澳洲,已夠晒皮,下次會去其他地方了。

      刪除
  3. 回覆
    1. 一大群羊,係咪熟口熟面,有隻幾似我。😊

      刪除
  4. R兄真識嘆,人生若此,夫復何求。

    回覆刪除
    回覆
    1. 有,求一班同道知音友,一齊玩,一齊笑𠵇𠵇。風兄,傷心有時,雨後天晴,加油,兩父女好好過日子,撐你。💪

      刪除
    2. //食得睡得玩得,特別是飲得, 一班男人,餐餐基本上也有美酒,食海鮮平靚正。
      R兄求到啦。

      謝R兄鼓勵!

      刪除
  5. R兄生活事業投資樣樣俱圓,利害利害

    回覆刪除
    回覆
    1. 我blog上寫報喜不報憂多,到而家中佬階段,自己開檔,其實一樣有極多煩惱。
      不過,不太為錢愁生活時,人輕鬆好多是事實。

      刪除
    2. 💪💪 R兄,感激你在此散播正能量

      刪除
  6. 請問R兄,在澳洲唔租車,如何安排交通?

    回覆刪除
    回覆
    1. 澳洲我最主要去3個點,Melbourne+ Tasmania + Brisbane, 內陸機坐了兩程,機場去酒店,點與點基本上包架車接送12人,去郊區名勝就join local tour坐大巴去看風景 town內玩接送就經常call uber, 都幾方便。

      刪除