10月 09, 2017

R's玩物篇-威士忌

R人到中佬階段,以往自己生活圈子,價值觀,全幅心機精神及日常話題大部份均圍繞著"金錢"......總之就係發錢寒。

而當自己人生到了某一個階段,尤其有了仔女,財務根基能勉強ok,食住行無乜憂時,眼光及目標已隨年紀不自覺地有了很大改變,個人睇化左好多,對人生好多事及要求不再太執著,財自唔撈與否已沒太上心,自己有足夠能力,有了選擇權,可以盡量將工作變成"玩",不再只是為錢工作,希望能有PASSION,FUN, SERVE呢幾樣野出現在工作上. 咁自己就極願意一直工作(玩)下去,希望心態能越放輕鬆,而樂在其中。

自己人大看化左,尤其大病過(前兩年),不會因自卑而狂妄自大,自命不凡。 自己一向覺得做普通中庸之人最好,起碼有時身痕,行差踏錯用無人知,唔會有道德高地批判,行事亦唔洗下下比天下人談議論,總之 天外有天,叻人隨處有,自己做個普通人就ok收貨。 

剛踏入了42歲,中秋節與一班朋友及家人分別聚會,各也順手為自己慶生,更覺得有朋友及一家人團圓的"快樂"。 自己一家四口,一對仔女及在太太送上的蛋糕,最深刻,最珍貴。



返回正題,近兩年,嗜好漸多,開始品嘗及收集一些威士忌,尤其罕有少見的single malt品種。買書,不斷上網查,看展覽,買雜誌,逛酒鋪,入facebook威士忌收藏家群組...慢慢進入呢個幾過癮的男人威士忌世界。

因利成便,自己成日出差,外遊及有海外朋友,慢慢收集了一些幾正的酒款,尤其專攻Scotch Single malt whisky。同時間,有年份陳年的大牌子好酒,真的有其收藏投資價值,是品味與眼光的結合,

介紹自己近期幾支比較特別的收藏:

1.)Craigellachie 33年,全球1700支,今年推出,限地區限賣,市場無二手,無報價。
托人外地機場找獲- 2000鎊原價買到,約港紙21000左右。
此Craigellachie的 31年,今年榮獲最佳威士忌大獎,31年市現貨已罕,已升價幾倍。
Craigellachie33年屬限量Limited release,收藏價值極高。




Macallan - Sherry Oak 30年 - 買入HKD 19000 左右
此款市場越來越難找,特別是Sherry Oak,Macallan二手價硬淨兼年年在升。
但Fine Oak Triple cask這就不值收藏,其因不詳述。


SINGLETON 41年- 剛推出亞區GLEN ORD,41年Single malt,全球只出600支,香港慈善Auction拍賣比我投贏到,HKD 26000。現市價不詳, 酒序號碼是1 of 600 bottle,靚號罕有,收藏價值極高。



Highland park 30年 - 買入 HKD 7500 左右,


Grenfiddich -30年- 買入 HKD 6500左右


Laphroaig 30年- 免稅9折買入 HKD 8000左右

Balvenie 30年- 免稅9折買入 4500左右



一套花鳥風月機場版 - 購入價若HKD 23000左右。


另其它25年的whisky,scotch blended whisky及藍帶brandy,茅台等,酒款無咩特別,不咩寫。
近年開始,不斷研究搜尋不同Scotch酒廠的陳年威士忌,有些蒸餾廠出的有年份酒,飲一支,少一支,30,40年以上的,好多遲下要拍賣場先會見到,尤其停左產的Port Ellen,正如日本的威士忌余市而家去到咁癲價一樣。寶物收藏,時間過越久,將來越難收集齊。

另外,自己飲威士忌,都係一班朋友飲,Macallan 及Glenfiddich12至18年多,去Whiskylive展覽先有機會飲到好多30年以上的whisky。 回下帶,今年whiksylive,自己嘗到好多好野,基本上有30年或罕有的先飲,同老友兩條友下午—點入場,飲到7點已經醉薰薰,都幾好玩,好多罕有超珍藏酒款可以任我地試。










題外話, 細仔養左隻飄型虫(獨角仙), 對於呢類甲蟲物體,我老婆怕到震,但細仔偏最鍾意,無計,唯有同細仔特登去旺角買齊裝備新膠屋及木屑,滿足我細仔。



另外,家姐的私立小學上個月內部interview收生,百份之九十九會自動收細佬,細仔在擁有齊所有先天優勢條件之下,結果係我地預料之內"唔收",細仔佢既威力果真唔簡單,校長都認得佢。無計,唯有隨遇而安,可能呢間學校未必合細仔性格,你恨不得求不得,上天自有安排平常心。
 



22 則留言:

  1. 小弟都有養過獨角仙,阿媽當時同樣驚到震 lol
    獨角仙於晚上時會飛來飛去,記得鎖好蓋

    回覆刪除
    回覆
    1. Thanks,你唔講我都唔知要鎖蓋。若果走甩左屋企飛來飛去,我細仔一定勁like,而我老婆一定嚇到癲左,哈哈。

      刪除
  2. R兄又引左我呢個不學無術既人出黎, 我自己都鐘意飲酒, 但唔鐘意深究
    而我買既酒大都係用黎飲, 唔會用黎保值 (根本唔會忍到咁耐)
    MACALLAN 12年同 Glenmorangie ORIGINAL 我覺得係抵飲之選, 而 ISLAY 既酒唔係我杯茶
    我自己飲過最好飲既威士忌係余市20同山崎18, 可惜市面上已經買唔到OR 炒到好貴
    (有幸飲過craigellachie 31, 但我自已覺得13年 仲好飲 XP)

    回覆刪除
    回覆
    1. 我未捨得飲D收藏住, 一般都係飲D入門抵飲的多,去WhiskyliveD酒商度先有機會飲到D堅野。
      Craigellachie 31我都飲過, 可能心理作用,知道佢獲獎, 好似特別好飲D。 余市及山崎 我都想儲齊佢,不過現價真太癲,要比炒價去接,自己心理未接受到。

      刪除
  3. 好多靚酒..(雖然我唔識) 見到都開心 XD

    回覆刪除
    回覆
    1. 我都係半桶水, 買下儲下研究下咁。 慢慢收集齊全罕有及限量的收藏酒, 係幾好玩的興趣, 飲一支,少一支。 變成絕版時,更難求。

      刪除
  4. R兄也是飲得之人, 在朋友堆中, 除了幾個俄佬跟小弟拍得住, 香港朋友中已沒有多少人可跟小弟一些飲個暢快, 佢地飲一杯BEER而已. 第二杯都唔掂. 我用不停品牌的VODKA溝果汁都ok.

    回覆刪除
    回覆
    1. 我算合格,好多時候知到頂差唔多就收手,所以好少飲醉。 但同老手比,就差好遠。有時做節,我買支whisky同我外父飲下開心下,我半杯已經養金魚咁慢慢sip,我外父就兩杯滿直落肚,佢當飲水咁飲,兩野就KO左我半支whiksy ,跟手重飲多打啤酒先夠皮,嚇鬼死我。

      刪除
  5. 正呀. 全部都係正野! 食指大動也!

    回覆刪除
    回覆
    1. 其實珍藏未夠豐富, 會一路繼續慢慢收集D極罕有的whisky。

      刪除
  6. 我就唔飲得, 得個擺, 哈哈:D

    回覆刪除
    回覆
    1. 其實齋擺都唔錯,得閑可以欣賞下。

      刪除
  7. 我好少飲酒,不過有收藏喜好係好事呢。
    細過豹虎就玩過,獨角仙就無了。

    回覆刪除
    回覆
    1. 同你玩高達一樣,有自己收藏喜好係幾開心的事,識下識下就有班同好朋友。
      一立眼我睇錯成係龍虎豹, 原來係豹虎,係咪即係金絲貓?我細個時玩過好多金絲貓,老督大戰紅孩子。

      刪除
  8. 回覆
    1. 收藏麻麻地豐富, 重有好多年份罕有酒款,自己仍在尋找中。
      我屬入門初哥,所以選30年或以上,大品牌名蒸餾廠蘇格蘭單一麥芽去收藏,最大路簡單易掌握。
      少D中伏位。

      刪除
  9. 對酒一啲認識都無,不過見到都替R兄開心。

    回覆刪除
    回覆
    1. 多謝欣賞,生活有嗜好,有興趣及細藝好緊要。
      成班男人飲下普通啤酒,一樣可以好快活開心。

      刪除
  10. 嗜好漸多 係好事,退休後都唔會悶。

    回覆刪除
    回覆
    1. 係,興趣嗜好,會令生活精彩好多。

      刪除