12月 14, 2017

12月R's生活日記

生活 :
開學一排,女兒的小一校園生活很適應及快樂,讀書及功課無乜大問題,總算無揀錯學校。
大女學校有畫畫班,近期佢的兩張畫作,我覺得很靚,遲下會好好收藏佢,等女兒長大時可以親睹自己作品的真跡。




至於細仔,呢個兒子......,相對家姐,我跟太太要花耗上十倍的心力及時間。上個幾月前家姐的私立小學內部面試,面試後通知直接肯定地列明: 不予取錄。最後,由校長親身再interview細仔,比多一次機會佢,驚淘駭浪,最後慶幸終於成功收錄了,一天光曬。早前見住其他人交表留位,我地兩公婆葡萄到爆,現在總算定下來。當然,兩個同校,即下年學費即起雙。唯有努力點賺多D錢。

細仔的事,最令自己上心及花心血,經常收到學校,教會,一些活動班....不同老師or不同家長,教會執事的電話,whatsapp及留言等,為數也不少,總之花樣極多,問題大致都係跟同齡同學仔相處唔到,發脾氣唔合群及不接受指令及秩序.....。好多次也要我急趕去現場,總是要跟人家賠罪,代兒子道歉....。

很多時,事後聽仔講完經過及原因,又真係嬲兒子唔落,佢也有佢道理及佢自己真實的感覺,强迫不得,唯有掉個角度,在佢立場想下,蹲下攬住佢。

接到投訴真係唔野少,身邊人對兒子的評價也很極端,一係就批評他百厭仔唔合作兼麻煩友,一係勁讚他好過癮兼勁精靈成熟。K3兒子平常生活,跟大過佢好多的所有小朋友及我們,真完全沒問題,他不是蠢鈍唔明老師及人地所講的道理說話,只是聽唔入去,唔接受,有自己想法。

很多時侯,自己心情也受他在校的行為影響,這兩三年,自己慶幸有用很多時間陪住他們成長。 至小至今,我們兩父子,感情是極好極好。佢幾百厭也好,我從不,應該也是絕少體罰,因為"打"對管教尤其細仔根本無乜用。當下自己人生,最上心要操心勞心的事,就是他,呢個兒子。 希望佢一日一日進步。呢兩年,大大小小機構建康院,兒童情緒專家全找齊檢查過,慶幸一切正常,佢有性格係咁,無得解。過多半年等細仔 夠6歲,機構已幫細仔排期做深入D的測驗。 總之,一家人健康平安簡單正常過活就已經最幸福。

投資
現今情況無乜好講,近3萬點,人人賺錢。 自己買妖股一樣有執35%+左右。Anyway,自己個倉細無乜值得上心,唔值得日日苦思費神,除非升10倍,自己才會wow一聲high叫,否則執極有限度。有時間,返屋企陪下仔女好過。

工作:
現在開始進入忙碌階段, 中港澳幾邊走,要成日週處去,近來在大陸whatsapp時時被封,影響左自己好多社交聯系,家人朋友通訊也開始改用微信了,真抵700狂升。

下一年4月新財年季度,自己會更忙,早前初定下的新發展計劃會落實執行,屆時自己會進入另一個工作模式/階段/大變化,會與新拍檔們中港兩邊努力一同向更大的目標進發,活動圈及能力圈也有機會大幅擴大。新的事業生意,成敗無從估計,很多變數出現,但好玩程度一定爆錶,若真的能成功,會帶來無法估計的收獲,若失敗,也無乜大不了,至少帶來好大的刺激,何況,我無想過會失敗。

現在自己開始改變左心態及角度去工作,有能力去找新鮮事及挑戰去開創建立,工作感覺越來越享受,每階段過程也盡量叫自己樂在其中,過癮開心的感覺最重要。 工作上的事,不講太詳細,開始接觸林林種種不同的人,有時難免會遇到一些傻人,一廂情願自以為是的想法,人無知卻很大咬及大想頭,的確有趣。

另親弟剛終於買回自住樓,多年前一賣,現一買,損失真是極極鉅大,現忍痛也要上回車的決定是絕對正確。自己也實踐兩年多前的承諾,幫佢一點首期,借他約50萬左右,在這事上能幫親弟,自己也真很開心。

他在這12年間被加租,前後搬屋不知多少次,看到他一家能終能定下來,供平過租,安居樂業,也替他松了口氣,,始終香港最大問題就是住屋同醫療。慶幸,當年他賣香港樓時,有去深圳買返間樓,上年賣走暴升了的深圳樓後,計總算追回點損失,賺了現的首期。

現實有時是,這些年頭,勸親人買樓很為難,親弟也如是,他也有自己家庭及太太,若聽你講,真大跌時你就仆街好心做壞事。最好就是,他自己兩公婆決定, 做亞哥旁邊人唔好亞資亞佐,口水多多淨識扮比免費意見扮樓神,到佢真有需要時,真心出錢幫一幫最實在,咁樣大家也舒服。

親弟隔日whatsapp留言兩字 " 感謝",做兩兄弟真無乜好計,男人呢D野心照就ok。
自己前也借過錢比親弟,R太太也不知,事實上親弟有借自動有還,絕對是可信上等人。
今次一樣, 這是男人間不能說的秘密,費時女人多事。弟會分50期還,每期一萬,剛剛好,每個月做來比兩個細路小學的學費,足夠比到小五。


明天又北上,約了朋友在廣洲舊機場那5號停機坪食午飯,有機會寫下這地方,In 到不得了,自己試過幾次深夜零晨一大班人在這地方的bar處飲酒,深夜這地方也熱鬧到難以置信。而在大陸認識越來越多朋友,尤其後生那批,中港真是兩個世界, 大陸後生那批,個個也創業,至小開間淘寶店,充滿生氣,市場商機處處,大陸這個大市場,食到個餅一小部份,也就發到不得了。 希望,自己將來,能咬到一大口,咁就爽YY。




17 則留言:

  1. 勸人買樓難,借埋錢更難!難在要過得到自己又過得人,有時候你想幫,卻不知人家是否接受你開口。就算最親的人也一樣。

    佩服你的大方,更佩服你的勇氣。

    P.S.: 太太真的不知你這個Blog嗎?

    回覆刪除
    回覆
    1. 勸身邊親人買樓,人人都可以扮樓神扮做專家,順口齋講就易,一埋位就口爽荷包立,根本幫唔到身邊人。
      有時,家人真係要互相幫一幫,不太計較,大家也舒服。 我太太沒看這blog, 如果佢知及在追看,我寫的感覺會好怪雞,好多秘密也不能寫,可能也會停寫這blog了。

      刪除
  2. R兄女女幅畫真係幾靚

    我個仔今年上左K2之後都經常性被留堂,老師成日都要係放學後捉住媽媽講佢既返學情況。同R兄好似,我哋都係聽個仔解釋完之後都係唔覺佢有錯。

    R兄縱橫四海,真係好利害

    回覆刪除
    回覆
    1. 係, 有時我都buy個仔。尤其佢遇到其它麻煩同學,無可能下下向老師投訴,佢用自己的方法解決最好,但佢個方法唔太醒,太直及太無深度的反擊,結果下下變成箭靶,明明係佢有理也變成無理。

      刪除
  3. 加油 !
    李居明預測2018年運程, 肖兔人會有發財機會, 全年要進攻唔好停落來浪費機會 !

    回覆刪除
    回覆
    1. 多謝, 我都相信"運",來年肖兔會行大運: )。
      我同partners們全都係同齡,即係有3隻旺兔。

      刪除
  4. R兄又進入一個新階段,加油!

    回覆刪除
    回覆
    1. 多謝, 風兄你也是,新環境,新生活。 互勉

      刪除
  5. 我的小兒也開始這樣,很硬頸,感覺有點被竉壞,原來是性格嗎?

    回覆刪除
    回覆
    1. 下次飯局, 我地一班男人可以高機密地齋講下仔女經。
      我都學緊,體會緊點教養兒仔,在愛與寵之間取平衡, 硬頸性格硬碰硬,真係無乎,
      我學識當佢發脾4時,比佢獨處一角平靜下,不與他爭論,我企定定等佢平伏先行,當比佢舒發左個下突爆的火氣後,先同佢講道理,佢才聽得入耳。 :)

      刪除
  6. 做兄弟有今生冇來世,肝膽相照(講白一点,就算他不還,也一点兒也不介意)。或許將威士忌的嗜好,化成商機,也可能是另一遍天。小朋友有机會讓他參加一些五六天獨立軍校生活,對他的成長也是不錯的體驗,大前題是狠狠地暫別一段時間,玊不啄,不成器。哈哈!(長期讀者)

    回覆刪除
    回覆
    1. 我自己得一個親細佬,佢人品性格真係好好仔,100%可信可靠。自己作為大佬,幫一幫佢,真係無乜計。有能力幫到身邊最親的人,而佢又係值得幫既,都係一種快樂。

      刪除
  7. 自己親兄弟邊有得計. 其實即使不是親人, 好朋友也不會下下計足. 反正人死後錢都不能跟身, 哈哈, 幫下人, 大家舒服, 都係一種無價既快樂. 我同父母呢幾年加埋, 幫家人,朋友等, 加埋舊錢都真係唔細 (有可能有一百萬, 或更多.) 如果從投資去看, 真係蝕到pk. (其實, 朋友或親人問得借錢, 已預左不會還) 但人生很多野真係不能計盡.

    回覆刪除
    回覆
    1. 有能力幫一些抵幫的親友人,其實都係一種福份。人生如果下下算爆,機關算盡量縮到盡,會窮得只有錢。
      今劑買到供到一層自住樓,對親細佬一家人的作用,遠遠多過自己帳面上多一層收租樓, 呢D價值真係無得計,人生就係咁。

      刪除
  8. 聽下去有機會是資優生。
    資優生分很多類別,可以做相關測試。
    但普遍而言,與長輩談得上來又精靈成熟,而師長會認為他們麻煩多問題(不硬性服從,會質疑)
    對於同輩,又難理解他們的幼稚。

    回覆刪除
    回覆
    1. 等多半年,佢大少少夠6歲,姑娘已排期細仔做韋氏智力測試。
      就我觀察,學習吸收讀書方面其實細仔不是太出眾,不太像資優表現,是性格問題多D。

      刪除
  9. 不要使用體罰。

    嘗試用角色扮演及看圖說故事,給兒子思考別人的感受,不同決擇後的結局,幫他養成先思考,後行動的習慣。

    回覆刪除