12月 30, 2015

真正老友

R呢幾個月,忙到有時真係唔知係星期幾,總之晚刻9點半前回到家就是。工作進度算順利,起碼而家有空在公司寫下blog 

這星期出席了一些gathering, 與一些好友共聚, 其中一位, 決定棄薪從商, 不為他人,為自己工作去併殺。 老友J既然決定,自己就只有"撐"。 他所有開公司,稅務.會計....及公司地址,貨倉,車..什至一定額(R可接受)的金錢, 只要老友J一開口, R絕對即刻"撐"到底。

原因就是知恩圖報, R在2002年開始時, 試過1次,臨過年前,錢週轉有問題,就差5萬,問老友J商借,他二話不說, 亦不問原因,即刻當下去銀行過戶給我,這雪中送炭, R記足在心中十幾年。 十幾年前,大家27歲未夠,一個普通打工仔借5萬銀比你,他時兼有女友在準備儲錢結婚,借5萬銀比R我,何其大恩惠。將來有需要, R絕對不止十倍報恩盡力助這位知己好友一把。希望他事業成功起航。

就快新一年,R最最最最最感恩及希望頀是身體健康,合家平安。 當然大賺特賺就最完美。
今年花紅, 希望達兩百萬,講多無謂, 行動最實際,hea 完, 又回工作中.......9:00pm
 
   

12月 10, 2015

工作近況- 散文級日記

這幾年,逢下半年到年尾,即8月至2016年2月過年前,工作如常非常勁忙碌, Q尾更要盡跑數達自己每年定的目標,寫呢篇blog文, 應該要分開了好多日去寫下寫下才能完成。

這5至6年, 每年也要求兼希望自己花紅有20%升幅以上,基本上亦能全超標達成。
多年來,雖然有時幾大洗,但亦能把花紅幾本上全部全儲下來,加上投資上的一些進帳,令自己步入了幾本的草根級財務自由...

------------------------------------------
工作忙時加上若果太耐無放假,自己脾氣會真超大、壞及臭是多年來的通弊病,十月尾至今,基本上自己已兩個月沒有正式放假,星期日也情願回公司,輕輕鬆鬆作下星期的工作預備。

一星期有時中港澳幾處走,工作忙碌,但心情及處理手法比前幾年進步, 工作上眼裡有看不順眼地方,已很少一開口就"鏟人"及粗口橫飛問候侮辱人地,尤其更不會帶工作事回家, 今年EQ情緒在進步改善中。

今年定的目標, 跟往年一樣,+10%左右, 看現在情況,達標沒大問題,2015年的花紅應有百五至二百萬左右,跟往年差不多。處理花紅配置,也是跟以往一樣全儲下,但股票類到時看情況才決定,連人民幣定期, 屆時自己會持有超強的現金水平,若經濟一壞, 便有好多東西可以考慮加入自己資產頂目裡。

自己財務上的目標是希望接下的十年,能將身家倍翻兩翻,50歲能有近9位數,成億之路,這理想(夢想)能否達成,真看天數天命,強求不得,就算不能,只得半億,過程相信也是快樂。

投資方面,自己不看好大陸經濟, 覺得硬著陸機會極大, 若歐美情況一壞, 太過進取的投資,會令好多人一鋪清袋,身家大洗牌,自己會極小心行事,寧短暫閒置資金,也不錯誤時進攻。
----------------------------

R太太,每天湊小孩上學放學, 。識多了很多師奶主婦級朋友, 有時小朋友間之家長聚會,R也要出席。年尾亦多收到結婚紅炸彈,基本上, 今年只會R太太及小朋友出席,除非特別親,否則一概不比面出席。

上年試過, R年尾一定要出席,去飲老婆大哥餐喜酒, R坐定定座位,看顧自己兩個細路兼用下手機上下網睇文件whatapp等,結果事後比老婆班大姑媽姑姐們...等等,話我無禮貌,無週圍去soso及去敬酒招呼來賓佢地。好在外父母明理, 老婆也有火反擊班8姑, 話我果晚唔係做迎賓,大哥有班兄弟做迎賓,點解要R週圍去敬酒做阿四。

今年學精了, 若真太忙及不太熟,年尾無謂飯局就搵籍口唔去, 外父有7兄弟姐妺, 外母有8兄弟姐妺, 年尾做冬,聖誕....成日有飯局,但佢地自己兄弟姐妹間關係有些又不太好,場面勁悶,要R鋪鋪都出席,真係人都瘋癲。
---------------------------------------

每年臨聖誕,總會旅行book定明年日本賞櫻之旅, 但今趟有點不太想去東京及大阪, 因已擠滿大陸人,正考慮日本其它地點.........福岡,沖繩?

每過新年,也會買錶, 上年R買了隻大愛PP,今年沒什麼錶想要,物質上也沒什麼想要, 相反太太今年就想要隻玫塊Panerai,錶價16萬幾, 雖然係好靚, 但呢個價位買P仔,有點不值,等於買迷你豪宅一樣矛盾,將軍澳級數的豪宅,P仔一般款5至6萬,所以R拒絕用這價買這品牌, budget ok, 但只可選AP or P.P等,因16萬買P仔絕不值。 正如邊有人會去G2000買過萬的西裝。



 
--------------------------------------------------------------------------
 

11月 23, 2015

輕輕鬆鬆-





年初曾提及買張按摩椅放公司,等工作累時可休息, 最終決定還是放在家裡, 等自己每晚回家在最輕鬆看電視及聽歌時,會更享受。

工作開始如常忙, 中港澳幾地穿梭, 很少看blog, 寫blog更少。 遲下有空先追回看自己有興趣留意的blog友們近況。如70後, 止凡,Lisa ,自由....

前陣子賣清8成幾股票,沒補回什麼貨及太留意股市,悶市時花太多精力跟蹤及耗在股市, 自己覺得不太值,上落來回原地, 世事如常運轉, 時況自己覺得真沒什麼機會成狂牛,留子彈等為上策。

實業圈子裡, 認識的朋友, 全部今年現在及來年的生意額看得極淡, 由原材料供應,到中間加工生產出口商及做貨運幫人book櫃走船飛機的,個個叫慘。 其中有位自己開檔才幾年,做logistic的,今年下半年生意無左9成, 憎多粥少下兼比競爭對手槍單,壓力爆煲,聽朋友講佢好似失落到有抑鬱症。

做生意就是這樣,外人看就風光, 自己心裡就最淒愴, 好天順風時真係要積累財富,唔好覺得永遠如是。 自己26歲仔開檔到現在4張野, 永遠是小茶飯心境,知足常樂。見客job title永遠是Sales Manager,仔女學校父母職業也是普通的Sales 及 clerk。很少透露自己做小生意。
永不認是老板,見到中學及讀U時果D點頭之交友,簡單答做寫字樓文職就ok。

平時過份扮勁,認叻認屎尿屁,即才開檔幾年做logictis那位,買架Benz C200就upload上facebook, 買隻勞白面Daytona又上facebook, 租住荃灣citiwalk果度又上facbook, 去下法國又上facebook。 真係唔識佢就比佢嚇一跳,以為好勁抽富二代,識佢的,真係得啖笑。

老實講,佢荷包身家連一百萬港紙都無, 棒到自己咁高,車樓全部係開支消費,一無生意,人梗慌梗亂。上星期一班人聚會, 自己也提一提他, 放底樽鹽,自然活得自在,太介意人眼光,自己又辛苦,何必。 事實上, 越要向外認叻的人,越自卑,"叻",自己知就得。
問心,R絕對覺得"比佢叻一萬倍以上有多, 佢少少風浪就叫生叫死,哭葬咁款。

言歸正傳, 下半年及2016年, 自己感覺很近似07/08,風雨欲來, 製做出口, 旅遊酒店零售,金融地產,航運物流。 心水清, 邊一樣是向好positive走? 大家執生! 有些事,報導出來,已經是濟後, 做生意的人,應最先能感覺到。














10月 14, 2015

賣走一個,又買番一個


很開心,千辛萬苦,最近傾掂買到自己公司位處的一個商用車位,個位是大位,可泊5.5噸大車。 以前足足等了兩年,在工作地方要等有人退租,管理員第一時間通知我,插隊比溢價租才租得成有車位用,公司用車唔洗泊到老遠地方。

自己這一次是主動出擊,秘密收齊業主資料,叫做地產的亞姨去主動埋台搵業主傾,千山萬苦,磨足幾個月,最近才終於搞掂個老業主收票,自己買到這第一個可泊大車的車位,價錢地點秘密,以私家車位的價買到能泊大車的位,超正價無得輸。

更大的秘密是旁邊的相連位,我知道那另一業主的資料,地產亞姨正在洽購中,但第一次失敗了,正在再努力嘗試.......誠意票己開定,業主一收票,大事就成。

更更更大的秘密是, 這極旺租的工商廈,車位是極不足及稀缺,尤其上落貨只有幾個關鍵泊位,以前分散的業權,舊業主年紀有咁上下,無所謂一向平租車位比舊租客公司用,每年象徵式加一點,租金極落後市價,自己正在收集及購買一個接著一個關鍵泊位,行動正進行中, 希望能成功再下一城後才詳細說,始終是秘密不能太露骨暴光。 

總之,公司商車有自己的一個上落貨車泊位是必須,老實講,業主加一倍租我也會照比,無得say no, 除非搬office及倉。自己掉個角度, 去收購番那些必需品泊位, 盡管有極大難度, 但若真成功,租金就變海鮮價, 可起double及更多,公司局租無計。

題外話, 公司附近,呢期抄牌真係好嚴,自己私家車街泊一陣就食張牛肉乾,不過320蚊真係無乜阻嚇性,旺區泊幾個鐘都百幾, 若罰1500左右, 咁就真係會肉痛。

   -------------------------------------------------------------------------=--------------

投資方面, 仍然持有2成左右股票,沒太上心於股市, 不過前排就加入了紫金及招金。
實金暫買夠,就買有關股票類代替一下,最近反彈這也升了不錯。

傻下傻下, 原來今日實金金條價已經到11490,到1174/oz。這無出"息"的實黃金,回報不錯。












10月 06, 2015

公仔紙

最近停手將公仔紙轉為黃金的這動作, 因為今年己暫買夠數量,而金價最近也升了一點。
人生踏入4張,踏入所謂人生的下半場,做好多事也要考量家庭,無論投資什麼也不再
用後生有前無後打死罷就的方式, 用多點智慧及耐心行事佈局。

看香港股市, 現在真的看不通, 過往的所謂價值投資, 用在現在這刻當下,是福是禍,無人知,匯豐就是一例。在人為控制,錯綜複雜的國家政治因素下,要極小心行事。金融戰爭是實在地發生著。只看香港這單丸無自主之地的環境行事,出錯出事機會大。總之小心。


買實金要現金, 次次拿一兩舊金牛買,買下買下就併成張公仔紙併圖。
望真D,港幣公仔紙一堆,同美國佬印幾多有幾多的勾住, 我選擇要黃金。


 






 

9月 29, 2015

短炒之三 "屎忽痕"

Sep 29
見到恆指跌破20500,跌近700點, 中午細細注共用了二十幾萬,買1288農行2.88x 40,000股
及992聯想6.16x 20000股,純短炒博跌得多有小回V所彈, 贏輸總之15%內就即走人,
不溝不加注不長期持有。真係屎忽痕上手, 自動入了買盤。

恆指每跌過700點,就會動手即日去執下大跌幅的好股。用二十幾萬穿梭來回跳上跳落換來換去,心理負擔很輕, 又可以夠癲玩一餐。 學人玩下即日鮮,過下手癢癮,呢刻最—緊要係你玩股,唔好比股票玩死你,不Alll in全倉股票,怕股市一出事就成幅家當走唔甩。

中秋節,身邊有位好友的家人出了點事, 自已真心替這好友擔憂難過,束手無策,他們一家人也做好了心理準備,希望他母親吉人天相。

提醒大家, 無事無干, 保險絕對要買齊買夠, 尤其住宅危疾醫療....., 人平有事健康,可以好突然一下子就到最壞情況。 所以要珍惜好好活在當下,積極過精彩人生及時行樂, 到人走一刻 ,無悔無枉過先至稱得為無憾的人生。

自己亦告誡自己, 好好活在當下,好好珍惜人生每一天。

----------------------------------------------

Sep 30

今早升了3百幾點, 自己將昨日買的農行及聯想的也跟手全賣走, 賺了一兩金左右。大跌買少少貨,一升回就賣走是此刻的短暫操作。

沒什心情,因昨晚收到由細玩到大好友H的短訊,他母親走了,突發的心臟病離開,
前年還一齊跟好友及他父母一家去泰國旅行, 不知道此刻怎安慰好友H,只能送上短訊慰問。

人生真係無常, 人要走時可以很突然,一兩天之內的事。   知道他母親在外地旅遊途中心臟病突發離世的整個過程,好友晚刻要即急飛往外地,亦不能見到最後一面,本來開心去旅行的樂事變成咁.......的確很難接受,感到好友的傷痛,自己亦很難受難過.................................,
願伯友一路好走。


----------------------------------------------------------------------

















9月 24, 2015

R膽小系列等二回 - 港女勿溝

這一年, 尤其係國內及香港做出口及貿易,真係唔樂觀,嚴冬將至, 真係要睇路。

香港營商及接下來經濟環境,不用多說,不用看稍後政府果D數字,答案心知肚明 。
全世界好多人急促蒸發了財富,影響消費及經濟,好多公司真出左問題,通打工仔要被裁到最後先會感受到風暴。

大陸救市,力托3000點,一如以往古今,專發國難財抽水自肥的人真不少,錢全倒入大海蟹埋。成功救市否,我行動投了票,早前亦全清掉內險內銀,現股票倉位一成也不夠。

認識一些朋友,國內存了一定的人仔(幾百個左右),正積極如快換回港紙美金,跟國內要人仔找數的外港資互匯換,總之務求盡快清倉人仔,錢運回香港,避進一步貶值風險,因怕資金被鎖國內,不能出脫。

呢一階段, 根本不是談進攻時候,做好防守不輸錢已經難,自己對沖套現後太集中的港紙現金,保持購買力,已經好費神。

upload幾個圖, 港股(女),呢期邊個溝就死邊個, 每次死貓彈後,又向下無底急墜。




























































自己仍會買股票, 但絕對不是這短期內,真不敢接向下無底急墜的利刀,  大陸越托頂住上證唔比跌穿3000點,自己就越防範小心不入市。

世界有好多事發生緊, 齋睇香港及企業過去PE等數字玩股會出事。
無理為賺粒糖仔,一錯就要陪葬咁激都去玩。

呢個時刻,自己絕不溝貨,學人做股神,越溝越蟹就越想追,就越易犯大錯。
大環境如是, 無得你逆水行舟。尤其一個壞消息,港股即跌到一仆一碌。

最近388, 2628, 2601也清倉,是賺住錢賣走的。點解賣唔溝? 看圖不解釋!

































掉個角度, 全身而退,買包花生坐定定, 手持機關槍大刀等時機,身穿鎧甲,等大撕殺過後,所有壞事盡出現後,又回到悶市時,低成交時,才靜靜尋寶亦未遲。輸有限時,贏無限才落場再併過。  現總之避一避,好漢不吃眼前虧,港女短期內也勿溝。

中人壽、太保越出認購call輪,價越未跌回年初19-20蚊,大市真未去到大插呱呱叫,談見底言之尚早。

底真係好難估, 估錯頂最多賺少, 估錯底去狂溝,會輸到仆街,到真底時已彈盡糧絕。跌市持有不賣已經好難頂, 溝貨越輸越多真係會爆

P.S: 由8月跌市開始減持股票及不溝貨, 為自己慳了很多。 昨日買多3條共15兩金條獎勵下自己。前後最近共買了近70兩黃金左右,均價11000/兩樓下。 若自己早排去溝貨,這70兩黃金已一早被蒸發了。


- R膽小系列等二回。 以上分享純亂吹, 勿認真作為投資參考,純主觀個人操作,



















9月 17, 2015

保障、保安、保護

每日自己公私兩邊總會有幾十封垃圾電郵,而最小有超過二十是附有毒的file,以zip為多。

林林總總扮鬼扮馬不同domain的e-mail, 自己手機及電腦全裝有kaspersky internet security,資料病毒每天更新,防hackers及網上保安,自己越來越小心,尤其處理e-banking時。
自己只會特定一部電腦專作e-banking處理用,網上銀行密碼也每月全更新。

這個時代用電腦上網要很小心, free wi-fi 勿做任何個人login是常識吧。



 最近開始將家裡貴重的物品,存放銀行保險箱, 尤其一些樓契文件,約3套。真係怕細路越大,尤其個百厭仔有一日無啦啦懂得用匙開櫃搞,畫公仔,咁就大鑊。



前天再新買了兩條五兩金條,那天放在公事包回到家,一轉眼, 女兒跟兒子各拿著條狀東西話要開朱古力吃, 要開金沙吃,望清楚,他們手拿住金條以係為金沙kinder朱古力條,超搞笑。

隔日即決定實黃金也全部入保險箱,費時出事。



越買越熟,金行的經理為自己搜刮及再預留了4條五兩實金條,明天自己會到取。 前後計及明天的, 共已買了50兩黃金左右, 持貴金100兩計劃亦完成了一半。 目標是貴金屬持有,佔自己總資產8%-10%左右,不談升值,只是保險地將身家財富平衡分配不同範疇上,對沖這個世界那自己智力不能明白的風險及未知性。 沒出"息"的黃金成為自己後防一員,與人民幣定期一同打後衛, 好好防守著龍門不失球為先。

                
            實貨黃金VS港紙現金(美元), 自己同擁有去對沖著,就只是為保護購買力。


坦白講,自己也期待有日當paper gold game over,違期違約出現因根本就沒足夠實貨黃金
供應交出來交易時。 咁情況就會so funny。 金價現壓到1100美元/oz, 話之你美元加息預期走強金跌與否,平衡對沖著,就沒有怕。


***以上所有圖,屬R私人秘照,只願給同道追求財自blog友分享閱覽,最怕網絡紅衛兵花生友批鬥,請幫忙勿傳link及公開,同道有緣人看過就算,能留點私穩給R,那blog文就可以寫得更多,私人及深入*** 謝謝理解,


老婆看到自己寫blog將咁多私人野放上去,問過驚唔驚會有問題麻煩,
我話: " 驚乜野, 最緊要無人知你乜水及個貓樣,吹水唔得,純創作寫小說,who know"
寫blog應沒問題,facebook就無謂, 自己在faceboo的世界, 零留言,純reader而己。






 



9月 10, 2015

價值多元

  另一類資產,無利息,但能承傳給下一代。

R開始儲起实金,每個月長期也会買幾両。目標下一年有一百多両左右。將资產再多元,就是对冲銀纸及股票这類紙上的所謂价值。

自己只是一個大管家,將來港幣会变成怎樣,天知!現在買黃金,平了很多?爲自已資産拓更多元化,可為為家人加强一些保障。

紙幣與黃金,將來物以罕為貴回歸本位,自己也能受惠。


9月 09, 2015

喘定開始補回 - 2 短炒不成

Sep 10,

一早跌幾百點, 將昨天800幾點的升幅賺價消耗大半,前天下午新追補回的貨,即打了大折扣, 拉平均變平手沒錢賺,恆指三連升做底撈不成,感覺大勢沒改善,仍是向下,底撈不到就閃,絕不做蟹,上午收市將前全部新補回2成的貨賣走,輸了手續費, 短炒不成就認輸退兵,不想做蟹。

短炒撈底失手機會極大, 不成功,即閃! 又犯小錯。

---------------------------------------------------------------------
-------------------------------------------------------------
昨天下午Sep 8, 急升8佰幾點,是連跌無數日之後的真的低開高收,自己覺得股市稍為喘定,連續幾星期忍了手,避過無數天痴線的高開低收日子,不知幾多天坤人一買即蟹的無底跌市,這一次應會開始有估你唔到的小反彈仔。

昨開始買回前幾星期賣走的股票, 倉位由狂跌市時的2成,加至現在約有4成, 在低於前賣出價補回股票,心態會好一點。

無人知今次是真反彈or一彈即大插預料, 現只是補回賣走的貨,不是加倉溝貨,心態ok,
若真有個小反彈浪仔去回23000點, 這便把握到,股票倉又開始會賺錢進入正數。

若一彈即又大插, 這2成新補的貨一觸及15%左右,自己便會即認輸埋單減倉再退兵,
當交小小保費學費。

現股市真痴線, 很多股票均低於250天價及360天價,即這兩年內,有買及投資股票的,
全民均是蟹。

跌了真太多天, 昨升市好多人也不敢追,上了太多次檔,估下這幾天,會否連開十口大即升升升升 升升升。

R純短期追反彈仔,賺點零用錢,會教壞人,勿學。

---------------------------------









8月 26, 2015

兩手準備

呢刻,逢低買貨抑或忍手看定,真係見人見志。

R沒清倉, 仍持有2成倉股票,大市彈一彈向上即追回,若大插無底成大災的話,損失亦當然會加大,但帳面損失數仍是有限,是可以笑嘻嘻,無乜所謂的數目。

最緊要睡得好,無影響生活心情

跌市加大倉就無謂,R人老真係膽細左。
若股市成災,R持有大舊現金反而變千載難得機會。

真人事親歷見分享, 當年08/09年身邊有個老細級的朋友(前提及中左風那位),是5號仔超忠心粉絲,持有以10年計,總之年覆年計,一有錢佢就買匯豐兼以股代息,由中象變大象升到500幾一折五100到再到130後及跌回75價時,即當下埋單計數認錯,輸3百幾個。3百幾個就是當時市區一層樓2房單位的價。

但亦套回了子彈(千幾個左右)備用, 換馬走左做買個鋪仔及一兩個商廈...,前幾年賣走,這些磚頭類淨利潤贏左半億有多。 加上做生意所賺得,是過億的身家,但工作衝得太盡,45歲末夠中風(上年blog提及)。是福是禍,有時人生真難料。若5號仔75蚊不認輸去溝,而家會點?


一切基本分析.....低PE,高息,將來願境......所有正確的分析.... 即使買對了項目, 自己仍要看時機,日日買完日日跌,每個價位上面蟹貨重重,要逆風破浪直上變牛三,機會率....

呢把向下跌的利刀,R不敢輕言去接, 自己真無信心,何必逆自己意向,人老真係膽細左。
可能現時局世代在變, 舊一套真係可能未必一本通書睇到老。

大陸A股勢已經變,已不再是談破頂,是在保底救市。
股市向上,賺緊錢當然話之你,不止賺。

R股票倉先前都賺過粒糖仔,厭賺得兩百幾個,數額不是太大所以唔食糊住。6月大病了一場好番後去轉澳洲玩下,就日日出蔥比人狂吃雞糊,後知後覺到開始要動老本先知驚,先醒
才見到對手來勢凶凶不妥。

當刻時勢唔就,點都搵機閃,即起身唔打,絕對唔會再坐打多幾圈兼打大D。

大跌市持有股票不賣已經好難頂住(我試過幾次),要有好高耐磨力及高收人的現金流才可以,兼要以年計去收復家鄉。

知道很多blog友逢跌仍加注買,用借貸再買,真係要好小心,最緊要唔好輸個"勢"及"心態"。

股市長過命,賤物鬥窮人,越蟹越買越想追,將損失再放大, 被鎖住舊大錢時兼失去將來反攻起兵的所有機會。 未買樓,未結婚,未生仔到兼低年收入的,將來一有急錢用就.....
若用借loan買股加倉,影響埋環聯個人評級,將來真有平樓買上車,會都上唔到會,借唔到錢。

現況不賣不買, 將現金留住,有大舊錢兼繼續持有好股,
靠邊站食花生,最為適合。

昨日又放自己下午半日假,同兩個細路落會所去游水。

而家不賣走已經好夠pop,唔好比"人人恐慌時你去貪婪"洗腦, 你自己都未恐慌夠膽去撈兼市場有低息錢借去溝貨, 何來人人恐慌?

要連你自己都恐慌後悔,錢高息借唔到,人人都彈盡糧絕時,先叫"絕地"。

打牌打無限番,平時運到,成手好牌時,唔好鋪鋪大side鬼亂食幾番雞糊牌。 一輸就打大D,唔忿氣,同賭大細一樣,連開十幾口大, 唔好以為跟手開"細"機會大D,就狂加注買,通常都開圍全殺。

而家道指,上證,恆指走勢全部有眼睇,向下無限向上有限。
上證跌穿3500已經要警覺,而家雙降仍跌穿3000真係要醒覺。

有似災風雨欲來的情況欲發生,第一要做就是保本,保住條底褲為先。

R做法以上分享所寫,純屬個人老鬼級無膽特性之做法 。
不喜勿看!  

















 













8月 24, 2015

量力而為

R前幾個月,6月時經歷左病一場、跟手又去左澳洲長途旅行,其間沒什理会股巿,只知道仍是賺著錢,有正回報就ok。.

前幾星期回到香港,見個股市咁既樣,兼個股票倉開始剩單位數%利潤buffer時,因為R個股票倉大,向上時當然敢言不止賺,但股市向下大跌時,不得不小心,金晴火眼,手法亦由進攻變為防守。

馬後炮報告,R上星期執左個倉位,大手減持了。
將短炒,先前抽到的新股, 新剛加倉的......广發,太保,南A,中移....總之有賺無賺,低息及未有大跌的全部清賣走。只留下全是高息,這幾年很平買入的內銀及長期持有的人壽。

倉剩2成幾左右, 賣走的有些是賺住,有些是蝕住break even吧。

2015年股市向上不成狂牛,過不到29000,大牛運未到,真要認命,
R全靠前賺到的bufffer保護著及在上星期中認輸埋單退兵,今日計,整體微虧了單位數%
幾本上保全著了9成幾大軍原來本金。

上星期尾及今日的1158點跌幅,亦阿Q符碌及幸運地避開了。
暫全身而退。由進攻變防守,股市再大跌,倉位也極微,上落有限數。

上星期股票套現後加上原持有之現金及剛賣走車位套到的現金,現R手持大舊現金,
持機耐心而行,Full pay買乜都得,資金大軍全部閒置著。

股市現向下跌時,R也不敢估底,絕不鬥氣,做先知及先頭部隊,不會輕言見底去重倉撈底,因向下買,需要極長線心態及耐打性,香港股市要上番去變牛,相信有極多時間(以年計任你買),真不急於一時, 今一次不成4萬點牛,就慢慢等及吸,等下一次真命天子到來。

R不是見淡唱淡,現在,最緊要保本。小錯可犯, 大錯輸身家一定要避免,當年匯豐單野,死好多人的位是75去溝的血肉長城,總之量力而為!!

手上留著大舊子彈, 若氣氛及大環境真再轉差,掉個角度,亦是一次機會。
知道有些blog友,一跌就買, 若是閒錢,長線持有收高息,對錯無人知。
但若是借錢去溝,用盡所有子彈去再溝就一定輸左個心態, 好難頂得住,意志少都唔掂。
祝大家好運。 最緊要食得睡得,個倉位就無錯。

暑假快完, 細路開學,R就會舒服好多,有番D私人時間。


送張去澳洲sydney水族館影的相比大家,
個市而家就係咁。真係要驚下避下,
等佢吃飽先砌佢, 飲碗南瓜煲鱷魚湯。



















8月 20, 2015

旅行回來

先講旅行, 去了澳洲14日, 成班人大大細細一行12人狂吃玩樂。
由悉尼市中心玩幾日起,再飛落Carins玩水去大保礁,玩到夠住幾日,先又再飛落Brisbane 後
去Goldcoast住Soul Surfer paradise 6星酒店。 全程好好玩,  回到香港,一家四口玩到謝曬,等下一篇,有時間再慢慢講下放假旅行遊歷。去幾張相先. 講真, 玩14日真係夠,食物真係香港
最夾自己口味, 因為我鍾意清清地。外國餐餐吃海鮮,steak,burgers,fried chips....真係heavy到爆。14日肥左5磅,人都癲。


今日8月20號, 股市上自己發開始已慢慢再買貨了。有很多好股票又到吸引的位。Anyway. 上落平常心。 休息下,下篇有空再寫。   



Sydney 悉尼
Carins - Great barrier reef 大堡礁



Goldcoast


Pepper Soul surfer hotel

7月 18, 2015

生病與保險

最近R大病了一场,係一大場。 平時持住自己大大隻,少少傷風流感也求其沖杯沖劑,拍粒現成覆方藥丸就當搞掂。

結果真係累積埋,一病就搞好耐先好,身心幾星期沒胃口進食及睡眠極差,心悸及感到心律有點亂。中醫就說是身體極虛寒濕,傷寒人體,大熱天時自己也覺寒。 最後西醫方面自己就要做埋full body medical checking,包括心臟顯影所有... 最後確保一齊總算ok。靠中醫飲藥, 現在也康復了9成,沒了心悸及精神滿面。

生病的時侯, 入醫院那晚去做詳盡心臟顯影及心律詳盡檢查(有保險cover),入院前女兒及兒子很純真地向我說,他們已向天父祈禱了:"爸爸要快D好反,因為想快快D去公園玩。" 自己心裡面感覺百感交雜。

自己是在醫院過晚,目的是要做最詳盡的體檢,因claim保險的需要在醫院留一晚,
人沒病痛,健康平安就是最福,

作為有兩個細路的父親,責任更大 ,自己及家人的醫療保險全買得很足夠及全面。 尤其少朋友的醫療住院肢體保, 細路碰撞跌病,人生中沒得你避一定有。

問題是, 要給他們最快最好最專的保護及治療。 呢幾年,細仔及大女均跌親過,普通大人去跌打搞兩野就算。細路就唔得,隻手仔腫過豬蹄,你一定要去骨科照x光make sure有無裂骨,最後做mold護托骨裂部份,私院埋單過萬,均全數保險cover曬。若果無保險去排公立等政府,真係大獲。   所以小朋友的醫療住院保險很重要  

關於投資,尤其股票, 在這期間, 也是沒買沒賣, 帳面利率當然少了, 但仍有不錯的margin贏了給自己去安心持有就是。 錢財不詳談, 總之平常心持有好股.

7月這期問,也是收息豐收月份點始。下星期5,身體現總算ok,一行12人出發去澳洲14天。 到時再update。







 

    

5月 25, 2015

簡而最有效

人越大, 越懂學曉內斂小說廢話,因很多事,多講無謂, 靜靜行動最實際, 

 現任何人,尤其有D名氣,一講錯說話,就被炒家起底,給人民批判成黑5類。
真怕! 所以,寫blog還是保留一點私隱秘密, 不要去太盡,一中文字獄就仆街無啦啦。

社會現太多怨氣,無計,易地而處,若我係佢地後生那一群, 一樣會併死反抗及超偏激,
呢鋪大富翁,新參加者根本無得玩,人生輸九成,只有被焗玩及白做。
  
 不談政治及社會最明哲保身。講一下無聊事最安心,

量近開始整理公司,update自己的電腦及系統, 將所有陳年舊機資料重新歸類整理好server,再跟手將公司及家裡的電腦升呢, 將所有電子devices全部聯系上server, 任何時侯,任何影音,文件,檔案,可隨心應手,即開即有。  

自己張寫字台頭,已經有兩部Laptop行Win 8, 正想再整部大Mac機玩,三部機分開處理不同事,咁就正到飛起。 

開始重整工作環境及減工作日子時數, 中午最鍾意開架車約老友週圍去食午飯,不再求其就近狗屎垃圾大家樂醫肚就算,午餐有新鮮感兼特別,食得enjoy, 感覺超爽。

投資方面,正努力加強自己心理質素, 因越平常心,就能越大賺。 
最近賣走了一個車位,早幾年是以二十幾萬full paid買入,剛5月以75萬賣走,稍後收回這舊現金,連人民幣計,自己現金水平也越漸越高,專登令大部份資金閒置著,無所謂。

現已經持有滿倉股票,銀碼也越升越高,這些日子已沒有投入新資金,全是舊倉自我滾大。
將來若這雪球真到了某一個水平,就會分段動手收成。 現在,還很早!唯有等!

這時侯,不會再研究有什麼好股值得買,亦沒興趣去追入。全幅精神,是研究及觀察"賣"的的藝術,上半場低買做了,下半場要高賣才完勝,時機太早太遲一樣得0分。

市靜低買好股 >    等升  >   市旺超高價賣   X Repeat. 就是簡單而最有效。




 











 






5月 12, 2015

R的舊老板's

自己1997年出來打工至2001年,打了工4年,經歷了3份工,當中二間係唐人老細,一間外資上市公司(無老細)。 每份都做足一年後自己請辭,開心分手。

第一份工的公司,約100人,老細有兩人,汪先生及吳生。 在這做了一年,認識了幾個同事(變成至今的老死朋友), 而這兩位老板,幾年後在自己自立開檔時, 成為了最大客戶給予強大所有支援。這第一份工的老板,與自己亦師亦友。

第二份工,小公司20人內, 老板林先生,自己在此工作了一年後請辭,期間獲得他厚待教導,亦在自己兩年後開檔自立時,是當中其一大客戶,至今亦師亦友。

自己的舊老板,像這些早期的實業家,在國內有買地皮,在香港亦有買廠房,甲級寫字樓及其它物業。身家現應全部過10億以上,淨收租不動產也是天文數字。

跟他們經常電聯談話閒聊近況,很私事秘密也無所不談。
這幾個舊老細,白手興家,能力唔簡單,脾氣亦不簡單,
不小舊同事恨他們如殺父仇人,因為被罵到狗血淋頭,
哭著辭職。 

人與人相處很奇怪, 當年自己打工,老實講真係幾enjoy,打工輕鬆自在無壓力,反正目標係做一年就走人。其間盡能力幫老細賺錢,見客出trip星期六日無乜去計,反正單身。很神奇,某年某月後,當自己開檔接生意時,就是這些舊老板給予最大的信任與支持,幫自己不少,每年也給小弟7位數的生意。

香港有錢人很多,自己身邊亦圍繞很多這類紅褲仔出身的億萬富豪實業家,自己認識好多客戶大老細,外表看不出極普通的平實打扮,但內裡思維心法是勁到爆登,來頭不少。

接下幾年,自己會充沛自己實力,將這些叻人及勁人聚集於身邊,多結交這些叻人,幾大都要高攀他們。學到他們一成,自己也不簡單了。 

香港真係好多勁人叻人,有閱歷實戰績經歷心理質素全部最top,但大部份已經上一定年紀半退休。半後生的,做生意,像自己這班40歲當打,好多真係勁唔出樣,因為這一代最賺錢的就是炒,唔炒賺資本升值,一蚊一蚊做實業賺,這刻真係富不地來,注定乞米。



 



 

 



 


 



 
 
  



 

5月 06, 2015

股市戰況

今次的狂牛"大時代", 自己這類70年代出生的人, 幸運地在這刻,有齊天時地利人和條件,這刻捉到機會及發揮的威力會比先前幾次2000及2007高及強勁。同樣, 今敞亦絕對要掌握及做得比其它年代的人好。

投資及配置一早佈局好,自己就不太喜歡多說,無謂太多事後分析。
重複在升跌賺蝕來回之間穿梭,極鬥經驗及心理質素。
摸著石頭過河, 驚下跳下,一級一級向上跳,能成就多高, 看自己修為造化了。 
Blog裡的戰友,大家準備好未?

股票類資產-自己有收割的目標,銀碼定得也頗高,下年2016若真到了,就會即行動,理你後市如何。因為那個股票數額,加自己其它資產及工作收入,已經真足夠家庭豐足無憂。

市旺價高,自己不談長線價值投資, 亦不買任何資產所謂去收息。
現在賺價的時侯,就盡賺價。

上半場-這幾年,低買建倉已成功執行,股票自己不買了,倉位已夠巨。
現什麼也不做,唯是等,

下半場,更加必須要做好的,就是高賣清倉。 但現在時侯還早!唯有耐心等...

耐心等,什麼也不做的同時,最好就係去玩,7月自己一家會去澳洲自由行玩14日,
得閑行開下去hea玩,效果反而好,人太過專注股市上落反而壞大事。























   

 


 







 









  






 








 


   








4月 14, 2015

抽獎運


去完旅行回港,正式開始投入工作。今年有好多事情要辦,做更多更好, 尤其做慈善及公益事, 已開好了支票及定了銀碼,稍後會分別給奧比斯,保良局助養兒童等,銀碼不是什麼大數字,但自己要求是數額一年比一年的增加,按自己能力增加, 而幫助的機構也會再增加, 尤其幫助有病的兒童及老人。 


今年6月份稍後會額外有一份額外之財可以捐出去 ,就是剛抽派的匯豐150週年鈔,自己亦是那23萬份之一的幸運兒,中了全餐,即全額派發311(單張,3連,35連),而更神奇的是, 太太也亦是幸運兒之一,(沒單張,但獲派3連及35連)。 兩公婆都抽中萬中無一的獎,真係有運。  

抽到紀念鈔,自己會留下3連張那2套,35連那2套張到手即賣,收回成本,利潤就會捐一半出去,總之平常心吧,我想應該有幾萬銀可以捐出。  前幾年,政府派的6千銀,自己也是捐出,世事很奇,自己越捐錢助人,正職收入及投資回報就能有幾何倍數級增加。 可能這就是正能量在發生。






這些年,自己已踏進基本財自, 透過投資、股票及正職收入,自己會努力去攀更上更高的一層樓。在物質上,其實沒什麼特別渴求,最多才一年買一隻錶。以往渴慕有錢想威想認叻,土豪炫耀的想法,隨著有兩個細路,有了家庭,作為了父親,人大了成長而思想更成熟了。

作為父親,自己現在的行為,就是仔女學習成長的模仿對像。 有點小錢的爸爸,行為是如何,將來兒子女兒行為品格就如何 。將"錢"適當地,有效地幫一幫其它有需要的人, 仔女若能有行善及體貼他人的善良愛心,那人格就健全了,這是無價。
  自己最想做好及必須做好,就是作為一個可以給他們學習的榜樣父親。




股票市場,自己亦開始嘗試學習更能看輕得失,已獲得的巨利的帳面升值就讓它繼續滾動下去,不會打擾它,看能有走多遠就走下去, 而自己會全心機打理資產其它2/3部份,優化股票以外的投資項目回報。

 




 




















4月 13, 2015

順勢而為

講完旅行慘痛經歷的負面事, 講返D開心事平衡番先。

講股票就最好,因為相信太部份blog友,舉凡有投資股票的,必有斬獲, 大有大斬,細有細斬。

先講最近操作, 抽了新股廣發(1776), 認購2萬股,派得1600,上市早上收市前,24.9補貨8400股,齊頭現手上有一萬股。 去旅行前,2.9 亦將內房碧桂園(2007)新加入股票倉組合。 

現自己股票倉組合包含內險(中壽/太保),內銀, 聯想,內券及內房, 這個組合會一直持有,現市況更加不會賣出一股, 必會坐定定看這股市能走得多高,多遠多久。

自己由97,2000,2007也感受及經歷過洪流,這一次的操作就是, 能在最初一早早已成功投入及set好魚網, 捉到這始初就讓錢自己不停滾大變大的機會,加上投入股票的額滿倉時亦只佔自己1/3身家,現在的心便會過得很踏實,夠膽去大贏。

自己直覺, 股市現在只是起步, 所以仍有很多人喊驚兼止賺, 亦有很多塘邊鶴在觀看, 半信半疑這牛市, 相信,待一次又一次大成交, 日日升, 大部份人由不信,不信到被迫相信去追買, 賺到錢再加碼追貨時, 才需要小心吧。 

自己買的股,全是喜愛的生意模式, 執笠機會極微, 傳給下一代也沒所謂, 所以不到癲了的心動天價也不賣。適當時候真係要大貪,平時執幾成就收貨,今趟唔起兩個double也絕不收貨收手。

若果港股經歷這些多年食屎年頭,現才27000點,11倍PE叫做泡沫,講出來也好笑。
現在勢已經起了, 順勢而為就可以, 坐定定,相信 升下跌下,咁就會上到3萬。 
這個頂,自己不敢估, 總之就不估頂的去坐定定,等有一日, 身邊黑仔,街邊阿毛,週街財經雜誌,少年股神, 全民皆股時先去縮,現在坐定定就是。 

新資金自己亦無需亦不會再加碼投入,因為股票倉帳面自己已在不斷升值中,佔自己資產的比重比例亦因而不斷上昇,放膽持有坐定定就是。

今年工作賺到的花紅, 全買人民做定期就是。始終,自己組合要平衡, 對市場要敬畏兼有做好防守的準備,有得守,無得輸,先至夠膽去大贏。

 


 
 





 


      




 



4月 12, 2015

旅行之不快回憶

去完旅行,一向也會寫下旅行好玩的回憶。 但今次大阪,真係不太想寫太多, 雖然食玩住皆一流無得彈,但自己成個旅程覺得很慘及受苦。因為無一晚睡得好,什至乎晚晚失眠,原因唔係酒店有野。

而係今次外母也一併去兼同房住, 白天相處全無問題, 問題係,晚刻她那可怕及噪到震天的鼻鼾聲, 每晚真係好痛苦好痛苦,每晚她一早很快兼閃電睡著,秒即兼發出極可怕、可佈的高頻尖銳鼻鼾聲,時停時大時高時低, 就算戴住headphone聽住歌嘗試睡,用枕頭壓住耳朵也頂不住她那噪音, 真的。 

 我們兩公婆也無鼻鼾這問題, 一向睡覺,家裡也是極寧靜。 面對外母那一時雞叫,一時當豬, 極恐怖兼毛管直樹的噪音(尤如指甲界黑板), 自己忍了多晚終頂不住,要在大阪前後看了兩次醫生, 開安眠藥及白天在酒店獨個睡覺補充體力,血壓及心跳也狂標高,真的人都癲。今次大阪整個行程的享受感覺真給外母摧毀了,中途自己什至想改機票即飛返香港,因每晚不得安睡真痛苦。

 
我跟老婆第一晚也知做錯了,不應給外母同房,我們真沒想過外母有這個恐怖的鼻鼾問題,不想多怪她,但 對我來說,真的十分可怕,沒想過她有這麼令人討厭,驚心恐佈,噪到爆登,死豬死雞慘叫的高頻率鼻鼾,今次真抵自己死,點解咁on 9到無倫與她同房,搞到晚晚不得安睡。這敞旅行,自己每天也在倒數著還有幾多晚要受罪。

從今以後,我發誓,絕不再犯同樣錯誤,就算再一齊再去旅行,也絕不絕不絕不絕不會給外母同房,I swear to God。回到香港家那晚,那種安靜舒適睡得極甜的快樂,真係千金難買。

 
 






      

4月 09, 2015

賺錢平常心

剛從大阪回來,玩足11日,回家感覺真好,始終屋企最舒服放鬆。
明天才寫多一點遊記及股票倉。
最近自己的股票倉又大暴漲了很多,尤其内險及聯想。
自己上年頭2014已極重满倉股票,捉到正這一個凸如奇來的狂牛,受惠極大。
自己仍深信,升市莫估頂, 放眼光遠一點,要看輕眼前獲利。
時機到,就要放膽泡一泡,坐定定,要敢去大鸁!

呢幾日-成日聽到好多人叫小心,沽貨止賺,等低位再買反,老老實實, 個勢要向上,車要開向前行,就應該坐定定,太早叻吾切食雞糊,真係人生最浪費機會的大錯。

自己升市就由得佢,敢去大䇔。反正股票價打回原型也是沒什麼太不了。
狂牛自己不估市,總知死揸好股跟到底。

現塘邊鶴半懷疑的仍是大多數,  離人人皆股神仍遠。自己要做的就是平常心。






3月 29, 2015

2015 出發大阪

明早便出發去大阪,11日賞櫻親子遊。 

每次去長途旅行前, 細路先來跌親整傷, 上年細仔跌傷,亦入左法國醫院打石膏。

前幾天,女兒跌親手肘受傷,全家人極緊張,即送她入法國照X光睇骨科醫生,擔心手部脫"較"及有骨折傷,若有大問題,自己無可奈何亦會選擇取消今次行程。

看過醫生,慶幸沒有大礙,沒傷骨,只是腫及痛,好好保護,待消腫自愈就ok, 但就要好小心,不能再給手肘受傷,要好好保護受傷的手肘,亦看過跌打"孚"過藥才安心。 

今次旅行,自己會好小心看管照顧女兒,多了一份保護(手肘)責任, 出門人在外, 家人自身安全最緊要, 財物證件看好, 旅行就能細味慢慢及盡情玩樂。 

今次帶了近一百萬yen到大阪,子彈大致是上年日本樓的租金收入,用這些yen的收入去日本玩時用,感覺更加開心。

有機會,下篇便update今年大阪櫻花的相片。 
 





     


 

3月 14, 2015

新一年計劃初定

開始計劃新一年的財務目標,計劃及安排。

公事及私事上也有很多事情/目標想做更好及落實執行,
尤其去建立一套更好及豐盛的生活習慣,

個人- 

運動及飲食的鍛煉,三餐有序,質及量有節約,尤其晚飯在家用餐就極清淡,多菜少肉。已開始定期重新運動,尤其最愛的泰拳。

年尾自己正式踏入40歲,身體需要更加好好保養及鍛煉, 已謝絕了後生時多年的煙酒夜生活。作為父母,一家人健康地,陪著仔女成長大, 簡單生活就是最好的幸福。

現在盡量已早睡早起,務求令自己每日更精神奕奕,容光煥發,每天穿上sharp醒型,整潔光鮮,配襯型爆的衣著,手腕每日都戴上不同,自己極喜愛的靚機械錶,一早出門,那種感覺精神爽利的感覺及心態超正,一早的心情就會決定那一整日心情的去向。

進修上,計劃了再進修日文及英文, 能講到一口地道的英語是自己多年夢想,現離達成還遠,要繼續努力,自己香港仔英文,始終沒有生活環境因素配合,唯有比錢幫自己制造下。

"錢"呢個世界搵唔曬,有了基本就ok,下一步就是要尋找回自己最喜愛的生活模式,財務自由需要身心健康配合,才會幸福美滿持久。

投資
投資方面也不需要成日講,亦沒什好講,市差時買入,持有及耐心等升就是"贏錢大道理",

自己今年亦開始會分段買入,兌換更多人民幣做定期。 中銀3及6個月定期offer有4厘。
亦開始再將資產(股票,人民幣定期,港幣現金..)重新分配在不同的銀行- 主要在中銀晉富/ 匯豐Premier/恆生prestige之間調配及利用不同的戶口處理其不同的任務,尤其Kill bills等工作。

今年股票取向是不賣不買,持有就是,望有息時更有升。這兩三年若股票倉能起個double,加上正收入及工作花紅,就能幫自己升級進入財自K2班, 擁有第二個一千萬。Anyway, 平常心吧,Blog裡可以自由講"錢"及自己求財務自由的春夢,並記下自己將這春夢一步一步去達成與升級的過程。


3月底一家過大阪玩11日-賞櫻親子遊。全程玩、食及買,大阪旺到爆, 聖誕時已訂好今機票及酒店,女兒及太太也很期待大阪之旅,遲下會分享upload下大阪賞櫻旅的相。








 















 



2月 25, 2015

男人的錶之二 "止痕篇"

好友J今天回港,打聽下Patek Philippe Nautilus 5172/1A全城也沒貨,排此錶條隊要等足一年, 而5167/1A作為PP入門版,尖咀有錶行剛返貨有一隻現行貨,此款亦是自己大愛,由1月份19萬幾減2成幾至現在14萬有找。 

R即火速趕至到鋪頭二話不說就成交,將寶貝收歸,隻錶即開即改即戴,個經理超好奇我這麼後生兼出手爽快。

買到靚錶,超開心!這是自己第一隻PP,入門版粗粗地也收貨ok,希望將來擁有及能升級至更高級別。5172/1A條隊當然照排照輪,等到下一年,PP毒癮又起時就再買下一隻寶貝。

這些年每買一次手錶,其實也是一個開心事情的記錄及給自己在工作上豐收的小獎勵,看到那錶,即刻想起那事那年,記載著時間及快樂事件。

喜歡買錶,自己其實有承傳給下一代仔女的傻想,將來自己兩老賣左咸鴨蛋,這些戰績(手錶)全留給兒子女兒,它記載著我們幾十年每日隨身的感覺。

今日即興黃昏單拖走去買錶,買完先whatapp相給R太太事後報告,雖然佢從不管我用錢,但始終都驚R太太會炸型。

結果,她看到後,回覆是,"有無女裝金色?好靚,Patek Philpppe 我又要。"真超搞笑!

今年的錶痕暫已止了。 呵。毒已解!







男人的錶


新春先祝各blog友,身體健康,心想事成,身家暴漲。

放假中,在家可以"宅男"幾日, 湊下仔,上網四圍八下好野,睇旅行,睇相機鏡頭,尤其睇錶。

最近P.P 減價兩成幾 , 呢隻5172/1A令自己有一股強大的中毒感覺,毒癮極深,減價後約二十幾萬,完全是自己杯茶那極愛的全鋼款。PP熱門款現全城也缺貨,自己很想很想擁有PP,入門版5711/1A也好,尤其減價22%後,一於等識門路的老友J旅行回來後,試下打友情牌搵幫手打尖留此錶。 
       
網上借圖

網上借圖

網上借圖
近新年,很多朋友也買錶獎勵自己一下,Rolex就最多, 成班朋友一聚會,10個男人9個戴"勞",的確有點"濟"。黑地,白地,EII, 綠針,藍針,深潛...。Rolex看得多,自己海陸空黑白藍綠也有齊,現其實真的沒什麼新款令自己有觸電中毒的感覺, 是時侯給自己好一點升級版的選擇,投入再高一級Patek Philippe的懷抱。為了擁有它,也是給自己有更進一步的原動力。

自己覺得Patek  Philippe無Rolex咁張揚, 無講究唔識的人,唔會知佢乜水,識錶的人,一睇就知佢好野。

深夜近2點, PP毒癮仍在發作中,靚仔機械錶,就係有佢一種魔力,每一日朝早出門,靚錶一戴上手,有隻愛錶整日陪伴住工作,絕對精神爽利,感覺超正,難以形容,做事更得心應手。



R's的海陸空4天皇
 




 









 


























2月 14, 2015

老友開心飯聚

就快過年,心情勁靚,今日已經放假,老婆去整頭髮扮靚,我就—支公瀟灑哥去下街,約下朋友食午飯,5點就回到自己屋苑樓下等校車,接細仔放學。兒子超開心,見到爸爸接放學,難以置信,起勢狂咀我。

快過新年,下一年的工作及發展目標,會詳細逐項計劃。自己的心有很清晰取向目標,一切會從心,從喜愛及享受根本去出發,樂在其中,公司會進化及定位更高,追求賺錢同時會有目標貢獻更多回社會。

 新春假期沒外遊,一些老友們已出發去北海道及東京,曾力邀請一齊去,但自己細路仍細,呢刻日本冷到爆,不太適合。唯有留港過年。

今年親子遊,3月底會去大阪11日睇櫻花,暑假就幾個朋友家庭一齊去澳洲13日左右。等細路再大D,先可以去其它遠D的地方。

今日同老友K(十幾年前第一份工的同事)食飯,賞心樂事。 人分好多種, 跟這(老友K)舊同事,認識是一種緣份,佢把口有時都幾衰格(同我一樣),成日開我玩笑,但是善意兼優默好笑,我自己都認唔住笑到肚攣。

這老友是自己97年自己打第一份工時公司隔離team的同事。 友情就是這其妙,公司過成百人,唯獨佢可以老友friend足18年。自己欣賞他的人品,最欣賞他的口密及口德,絕不爆人秘密及道人是非,可交心及是絕對可相信的人。那年失戀,自己最梅的日子,佢成日約我到他家開飯,他父母當時的盛情招待,記憶尤在。

他的生活平凡開心,一家三口住新界細單位自住樓,早年買落所以供樓壓力極輕就快供完,住無憂時打工賺錢全可用在衣食行,每月錢用剩底就儲埋,簡單而開心。無乜名貴物質渴求

生活得開心,其實可以好簡單,一切全看自己的心,知足常樂,笑哈哈,談天說地講仔女經,講工作,講旅行美食....咁就過幾粒鐘

跟這類知足常樂的朋友相處很舒服, 彼此能夠老友下去的關鍵就是要尊重他的生活取向。

4月10號這老友一家人也會去東京玩6日, 盛邀約我家一齊去,佢話包我一日酒店及迪士尼票,哈..... 我4月9號晚從大阪回到港,10號一早又成家同你再飛去東京?我話佢都痴線......哈哈哈,大家哈哈哈........佢話咁又係。

 

 






 
 

















2月 11, 2015

我的過去之1- 糖與屎之邊緣

這篇文,寫了很久,低調點可以講一點過往搞笑事,反正未必有乜人睇到
寫過去,現在看回,真係得啖笑,但當刻,不知幾多個晚上失眠,講創業做生意,自己未夠資格,講high野經驗就絕對大師級,人越叻,學費就會交越多,哈!

 ------------------------ --------------------------
寫blog日記,很想寫一下過往自己的回憶錄很久,寫約14年前自己那段又窮又梅,又失意到發臭的住板間及開始創業的歲月。辭工開始單拖自己搞/跑生意時,印張卡片,借人公司地址用收下信,在公屋的房間(3姐弟同一房)咁就學人做生意,開始時真係慘到.... ...無論精神上/財務上/生活上...

在辭工前,即2000年,是自己極低谷之時,入廠(住醫院),失戀,事業家庭...所有差的事也接連發生,傻傻下又恨發達賺大錢,唔甘心打工,學人去做生意。

01年開始,自己做跑單接單做的開始,亦是糖與屎交替出現給我的日子開始 係1:99,1係糖。家人的壓力(父母全責備與不支持),唯有搬到板間房繼續追尋我的春夢,沒有同事同伴,更沒有錢,更加沒有支持與鼓勵 ,連愛情也沒有,只有硬頸。

開始自己搞,很多時候是不如意,零進展與心想事不成,零晨深夜坐在公園,一支接一支抽住紅萬,想著出路與退路,眼淚瀅框。 害怕,恐懼,不忿,迷惑,灰心,無助,孤獨不停湧現。而身邊好友,每個也安穩快活地升職,放假旅行,拍拖及準備結婚。相比下,我最無出色。

死唔去,做到工廠開始叫有小利時,又給熟人打劫,幾個工人入廠(我埋單)兼貨車被偷,又試過比伙記穿櫃桶,又試過做錯事賠大錢,比大陸海關扣查罰錢,炒人時又試過比親戚工人幾十人圍住喊打喊殺。

賺過點左手來右手去的錢,亦經歷過窮到無錢出糧發工資,信用卡現金透支...總之搞到人都癲。做黎做去得個吉兼越做越少的日子不知幾多回。每一獲搞到我得返半條人命,成個死餘種咁款。

呢個死剩種,多年後,現在商場上學精了很多,知道亦懂得怎去賺錢及儲起它,讓錢去自我複制的奧妙,做得多契弟就學精。

知道原來開始多年來咁多屎食,因為全部鋪曬面,底先好野。做生意真係要預左食屎,仆過大街就以後唔會再大high獲勁。

仆街唔係因為你人蠢,蠢人反而安全無風浪,人叻致過度進取,單方面太主觀,當天時地利人不配合,越叻越自命不凡就越仆大街。











 














2月 09, 2015

人怕出名,暢所欲言

寫blog對我來說其實很私人.給同道人閱覽.交流..是賞心樂事..同時,網絡上有太多葡萄友,自己怕出名,驚失言被起底批判。寫blog由賞心樂事變壞事。 低調D,便能多寫D,暢所欲言點。

寫下自己近況,近歲晚,下星期回國內處理手尾,就正式收爐。今年工作,已盡全力辦最好,花紅約180至200萬左右,比上年多一點,工作已盡奶力,可問心無愧。


講錢,自己擁有基本財務自由,但不富貴,只是基本日常生活能應付,給自己多點生活的選擇權,遇不喜歡的事便不做。

一千萬,是自己08年定下的清晰目標,6年時間,2014年上年達到。下一個目標是2千萬,希望能5年內完成,投資以穩打穩紮的72法則複息回報,加正職收入方式,就算龜速也無妨,總之能到就ok。

自己10年前,30歲末夠,曾經歷賺過點錢,03年沙士前,一兩年就賺到3幾百萬。但傻仔無倫,錯亂投放,30歲前少年得志絕對是仆街的前奏係無錯,機器全變廢鐵,唯一做得無錯就是當時買了自住樓。10年後,快踏入40歲,不再on9,錢財亦失而復得,將來必定會再百倍拿回。

blog低調一點,可以私人事多寫一點。呢個世界,槍打出頭烏,太高調及出風頭,絕對無好結果。睇下馬雲幾時會仆街,做中國首富兼串咀成咁。

忙碌後,自己開始檢討及計劃下一年目標。人成長大,想法更成熟,開始思考及有更深層次的追求。為公司注入更多新,生及過癮 的元素,令自己工作更開心及以此為榮,敬業樂業。賺錢是重要,但同時建立價值亦重要,自己這幾年已開始簡客,有錢賺也不一定要,尤其大陸佬國內公司,分分鐘因小失太。



2015年,工作上自己會作大改變一點, 過大的好勝心使自己經常不愉快,唔輸得而發脾氣。過完新年,自己會買套靚靚音響及Osim小天后按摩椅放自己工作房,返工隨時可以hea下放松,將工作間變成享受舒適的club。


 
錢可以買回一點自由時間,買生活的品質提升,買選擇權。若果沒利用好"它"去改善自己的心態及思維,會是很蠢的行為,

自己不為錢而工作就會開心D,退休唔撈就死硬,好似無左牙的老虎,明明打得跑得,正值壯力的獵擊高手食肉獸,走去食齋,遲早屈到病。

財富累積時,心智亦要提升。你睇隻傻鴨哨牙聰,serve小甜甜得到幾億又點,人又貪心又天真,我絕對相信哨牙聰係堅無吹水,但幾千億的事,佢一個仆街,全世界得益,佢同人講法律真係天真!
 
 
































 

1月 23, 2015

讓數字跳升

工作勁忙,忙到blog也沒空寫,股市亦沒什操作及理會,只知道內險內銀最近的大發力,令自己結戶口餘總額及身家不斷跳升。臨近年尾,自己2014年的花紅的數額亦大約知道,自己的幾路吸財賺錢大軍出擊,收獲均豐盛。 繼續努力,稍後有空再寫下。


-------------------------------------------------
星期日,依舊回了公司工作,晚刻回家哄細路睡了,有空寫下,

"好事一齊來"這感覺

2015,自己深相信是會行"大運"的一年,"運"呢家野,做生意,做sales及靠食佣的人就深知及體會感受到。 逆境時,多勞小得,做多錯多,慾求不得。順境時,一帆風順,萬事如意,好就事一齊來。尤其有小孩出世,剛為父母的開始幾年,若家運一搞好,就風生水起。

這一年2015的開始,已感覺很好,路路也亨通,很早年佈下的種子開始在發芽,遇正好氣候,今年絕對會是好收成的大豐收年。

工作上也是,已盡了奶力!正在等公司年尾結數,今年業績應該會是破紀錄的好,有5分滿分,但自己總想有5**這最好的狀元級。稍後自有分曉。

自己已開始做更多公益慈善,尤其捐錢, 不為名,只求心安理得,施比受更為有福。助人自助。呢個世界,真係有D人需要人幫下,尤其孤病老幼貧。

 修身,齊家,行善積德,正能量在發生中,好事就自然來。希望今年blog友們,大家都大豐收,進入財務自由的領域,入讀財自K1班,若自由了,順手多捐助下公益,助人自助。


















































1月 03, 2015

老友上位

一家人在家元旦倒數,1月1號hea了用休息了一個早上,跟孩子一齊出街吃早餐及逛一下。中午一半鐘已經回到公司繼續我的工作。喜愛在這假期的日子,靜靜地整理及處理一些滿是數據文件的工作,在沒干擾專心快速完成。

檢視2014年收獲不錯。自己也總是感覺到,這些年,尤其仔女出世後,自己開始無論工作上抑或投資上,總覺是有幸運之神眷顧著。 迷信也好,自我催眠也好,自己人越大,越覺"運氣"真的存在,尤其自己是十幾年前由低谷的經歷走上來。做了很多年的準備,而當機會一到,自己必乖風破浪向上衝。

昨天好友H打來,極開心地報告他工作上的進展及來年他工資收入及佣金大爆升的加幅。自己也真心地替他高興,看到他有機會幾年內也也會進入財務自由的領域(可能更勁),他等了機會這麼多年,快到出頭天了。

現在打工仔,尤其sales,其實有極多人也年薪過百萬(儲幾多就另計),自己朋友認識的也有不少,有咁上下年資,跳下糟,過下檔,年薪雙糧再加下花紅咁就過百萬,識得理財儲下錢,有時真係打工好過做生意,穩袋無風險。

老友H很肉麻地感謝我幾年前提醒他及公私上也助他一把。幾年前,他老板經常資助他換靚車,去旅行,食好玩好飲紅酒,總之包辦他一切高消費項目,經常叫他換自住的屋大D豪D,務求他身光頸靚出入名車。幾年前,他真覺得老細極睇佢照佢,而我叫他清醒D,佢個精過鬼的老細(我識佢老細十幾年),其實想廢佢武功,麻痹佢意志,當你等住份糧養家時,你以後就無叫價跳草裙舞本錢。教你帶你洗錢消費,不如折現。

結果,這幾年他私下儲蓄了不少子彈,並掌握了他公司極機密內行的技術,由供應鍊至客戶等網絡人脈全一切全部建立好,業務也全是他跑來的功勞時,他自己私底下也建立了公司,而當錢,子彈及新財主也出現時, 他就有"本錢"去埋台同公司跳草裙舞講條件。

幾天前,12月28號他成功了,以後每年會得到這公司3成稅後利潤的分紅,因為現那公司真缺他不可,他跟老細講離職不是要求加人工多少的問題,自己也不太在意這些"工資",反正生活也真不太缺錢,離開是為自己,人多勞多得,他自己也會開檔搞!這當堂嚇死佢老細及老板娘,臨年尾也急call佢回公司傾條件,而從此這老友H,不再是公司伙記,是合作伙伴了。真替他高興,能者應得!

我識佢老細好多年,大家廠佬出身,思維很接近,換著我,我也會選比3成老友H去留這大將軍。因為而家佢輕輕鬆鬆,乜都唔洗煩有老友H這大帥幫佢賺大錢,穩袋7成,除笨有精!