5月 14, 2018

5月R's日記

幾個月無寫blog文, 一來現實生活中,工作及私人生活事填得幾滿,無乜閑情寫。 二來自己寫blog的目的熱情,好像失去了,三來,自己及一班朋友掛住玩Pubg Mobile 絕地求生食雞手遊。

先講寫Blog熱情大減之原因,一向原本(我天真認為)Google Blog這業餘,純分享吹水交下同道好友之地,但近年變成好多有心人想出名之捷徑。費時話人,總之斷人衣食,等於阻人仆野 Your Spring pocket will be barbecued。

坦白, 出名與點擊,我全唔太理,總之姨媽到就出下文自娛就ok。 事實上真正的人生舞台根本不在此Blog地。

先講自己生活,今年新年立春後,整體感覺很好。有很多好事及發展接續著到來。今年肖兔,看來真有機屬行大運之年,自己會好好把握。新一年最大的祈求,簡單就是繼續一家人平安健康,齊整開開心心,這樣已經是最幸福的恩典。

新年去了東京旅遊,跟旅行團的湊仔之旅。過往去了很多次車京,反而這感覺最舒服的一次,因全程有人服持打點食,玩住,細路去玩下雪,咁就閃電過左5日4夜。



今年2018一開年已有很多變化,首先講二奶(換車),舊車用了近十年,安全的考量,真的要退役了。今次直接買新車,選SUV,告別7人車。訂了Mercedes Benz GLC 250深灰,6月左右會收車,中階價錢,選了AMG package options ,埋單60萬有找。載住一家大細大小,安全可靠最緊要,我理得人人笑我Benz 能,

街上見到人地的新GLC250,AMG 包圍,19吋鈴,是Exactly 我訂的那樣
多月來有很多飯局,其中較深刻的是與一些中學同學飯聚及落bar酒局。過程中段已經很悶,始終生活圈子全不同,對事的認知及處事哲學尤其人生目標全不同,話不投機,只好不太多聲全程no comment。事實上,同一些消極人生觀的人共聚一餐飯,全程講負能量事,係一種十級的精神折磨,講到成個世界灰曬, 下一次飯局,咪搞。

近期試過一條友屎忽痕就即飛去台北3天,為去學習whisky交化及與台北facebook威士忌群組認識的同好交流一下. 就咁好碰到朋友在台北出差幾天,晚飯大致有個伴,不錯。




收藏Whisky,成為自己近年愛好之一,越買越收越可越多罕有的酒,尤其逢遇到30年以上,罕有兼限量的,大品牌Scotch Single Malt現在的價錢仍然可以接受的水平。 旅行出差,網上Auction及facebook交流群組,陸續逢好野就收歸收藏庫。

買買下Whisky,存酒數量也不少, 用左一晚網上,免費整左個R's 酒庫online store, 記錄列出自己的收藏自娛一下, 另外將來若果真有人想要(當然要超高價) 自己或會可能割愛賣酒。大家可上去八下

https://whiskyinvest.boutir.com 



講生活理財: 今星期同老婆傾計談到,大概計一計來年的家庭大概開支,唔計又自可,一計原來都幾嚇人,自己都嚇一跳,作死,原來真係咁鬼大開支。

來年兩個細路的私校學費,補習費興趣班....+全家保險+ 四大掌佬的家用+供樓+ 伙食+ 前後租兩個車位+ 養兩架車+自己的開支+老婆開支+旅行..........引證左一個事實, 就係搵得多時,生活水平一升,開支亦會不斷同步漲大,速度快過你簡接收入增長好多倍。 即係自己要向更高資產水平一級進發,才可以生活無憂。

老婆亦正式訓示, 玩具及無聊野,唔準成日不問價就再亂買,尤其比細路的,要節約簡儉"斷捨離",的確,全靠老婆慳家,錢才能儲下。

講工作, 新公司業務忙於建構中,太多工作及準備要辦,香港公司業務需要多3個月左右就係面世,自己好期待, 計至今天,新公司籌備左近9個月,香港部份稍後一建構完成,下一部就是中國大陸,全套戲肉所在,國內合作班底已有,初步組合中,今年內會廣州先建首點。

這門生意是很特別,外國開始已慚流行,世界市場需求年年在增長中,而一向由幾間美國及歐洲公司壟斷,因有一些高階門檻技術要求,不易複制抄襲,你看到知道也無法照做,行業秘密有極強的護城河,將來能避過淘寶及炒襲的價格競爭。

從事那一門生意,有時幸運佔很大成份,自己香港及國內的身邊好友就偏偏是這行內的精英,合組籌備了9個月。做這新生意,我有一個春夢,希望新公司一誕生,將來可以為"香港友"爭一啖氣,進入大陸,橫掃佢現整個初始混亂的市場,由我地去建立規則。 

Anyway, 幾個朋友共創大事,好玩過癮最緊要,春夢唔怕發, 美夢就算不能實現變成夢遺,一樣是美事一場。稍後建構完成及運作時,我會公開新生意賣下廣告, 反正就算知道這是超好賺的行業,其它人也一樣抄不到。 

做生意搵錢,失敗率高,辛苦過做收租佬買樓多多,而回報未必有。但將來老左回顧一生,那份成就感是無法計的大滿足。自己做任何事,起碼對得住自己及其它人,無坤人哄水魚,實實在在,建立一些有價值的事件出來。 為搵錢做壞事,立壞心腸,總有報應。


講家庭: 到講下細路,大女升上小一,女兒讀書自理方面的表現,表現確令我們有驚喜,無乜讀書做功課的問題,佢返學開開心心最緊要,考試讀書成績名次,自己兩公婆真無乜要求,普通中庸就收貨。 經常聽到佢分享上學的開心事, 就知道自己為她選對了。

另外細仔近期行為表現亦好了很多,自己感覺多左個Friend,乜都可以傾一餐。 前排同佢玩捉Pokemon,兩父子成日週街去捉,自己去到台北,一條友照捉,雖然低B,但捉到些特別精whatsapp 比佢地看,開心到不得就值回票價。

呢期玩Pubg mobile試過一家四口上陣玩, "壓力無比的大",尤其加埋老婆同個大女玩, 佢地方向感全無,四個人上陣殺敵,得兩支槍(我到細仔)有殺傷力,兩個女人係流動人形活杷, 手同眼配合唔到,結果,我唔會再同佢地一齊玩,食雞無望。


下篇blog文,有時間就寫。 事實上,顧好自己, 將自己撈到風山水起,將自己的現實人生經營得精彩出色最緊要。投資切忌拜偶像,天仙美女一樣要柯屎,咪女人一個。 呢期妖魔鬼怪盡出現一大羅, 大家自己保持清醒思維最緊要。 有錢根本走去捐錢最實在,自認神人又貪人幾千學費做開班L把托咩。









































1月 20, 2018

2018 年1月生活

2018年 1月份生活

近期工作例牌也是十級忙碌, 一樣連續幾個月未正式放過假,星期六日及及假期也是在工作中渡過。假日在沒電話的干擾下工作,可以專心處理很多文件及資料數據,特別有效率。

近月放假日子數得出,平安夜放了半天假,除夕夜出席了一場婚宴就這樣,要趕過年收爐前完成所有工作訂單,所以聖誕及元旦也在工作中渡過,為今年花紅金盡最後努力爆數。

雖然忙到人都癲,自己學懂了放松心情去享受每一過程,盡力把各種事情做好,令自己無咁大壓力及大脾氣,以往一忙及急時,心情燥爆兼生人勿近。

年初三, 已報團去東京旅行。 十幾年無跟旅行團, 第一次一家四口跟團,都幾新鮮。
點解跟團? 自遊行太多,比細路乜都試下之餘,自己又唔洗plan,上車就睡,落車就玩。

今日星期六,有空寫下近期自己的快樂開心事。

1.) 學校家長日, 細仔K3班主任,對他評價極好, 讚他有很大很大的進步(雖然仍然是麻煩友)。 細仔忽然間大個仔明事理隨和好多,估佢唔到。

2.) 新公司已成立,新業務生意及網絡會於農歷新年後正式執行, 自己香港大陸也會有一班新的好玩拍檔,一切闖天下,新業務好玩程度爆登。

3.)跟手成功買左個港珠澳車牌,55萬人仔搞掂所有事,2月中會出到批文,橋一通,可以第一批開車上去。 自己工作需要成日要中港兩邊走,自己跟partner的公司現已有齊深圳灣及港珠澳中港牌,將來隨時深圳or珠海北上也可。另大陸發展真係唔可以忽視,珠三角區,港珠澳, 深中通道等, 成個區將來一連成, 某些區發展真要注意。

4.) 另一開心事,今年2017自己花紅, 好大機會又爆標及大豐收,自己能分到兩百萬以上。3月底就會知道及收齊獎金花紅實數,到時要再為呢舊資金大配置,制造更多Passive income

5.) 2015用120萬買入的其一工廈車位,上年尾整棟大廈有財團在收購,已收近8成門檻,進入最後逐個埋位傾還價階段,收購開價200萬,自己還300萬,應該會在250萬左右成交,事成則收租3年兼執130萬,收獲ok。

6.) 股票方面,由於輕倉妖股及不中爆升股,現市況計只執3成幾, +35%,跟其它blog友的斬獲比,獲利銀碼不算鉅大,另自己已開始逐步減持中,現牛三也無乜值得自己大事慶祝。 Anyway平常心, 撫心自問,要在股市賺三千萬以上,自己真無此本事。
股市越爆紅,近期就越多妖物,股神股仙學生估神, 但自己相信還離爆很遠, 現升市莫估頂, 有熱鬧就趁勢抽下油水無妨,而家先重倉就比較危。 

2017埋單計,自己持有的物業帳面數也升值了不少,磚頭類的升值回報也不錯。
去到新一年2018,自己收入及花紅+賣股套現+ 車位賣出+ 加按自住樓套出之子彈.。自己現金水平會去到很高,過8位數,如何有智慧聰明地處理運用這現金,極為關鍵,像現今市況磚頭及股市皆咁狂熱,反而進攻配置頂目瓣數及回報率有限。 Anyway,不要因錢多而亂投資是首要。

財務上持續平穩進展,的確令自己可以有很大空間做好多事情及有本錢嘗試新挑戰,另返樸歸真,始終一家人齊整健康平安生活最重要, 近期工作太忙,應酬及飲食很多及亂來, 搞到成日頭痛,一量血壓原來160上壓,二話不說,即去睇醫生食藥,要改一改飲食及飲酒。

近一年自己寫blog的文章越來越小, 可能是生活普通如常日子,無乜特別值得寫文記錄。更加另唔會為身邊on 9無聊事花時間八婆寫文評論一番。有孩子後的時間更珍貴, 陪佢地更有意義。

禽晚講故事哄他們睡, 佢地要求我講一個感人偉大的故事, 我講完, 細仔真係有大喊及流眼淚,唔係感動到喊,係驚到喊。大女發脾氣叫我,以後唱兒歌算數,唔好再講故仔,因太恐怖。

我講古時有一個營養不良,就黎瓜柴的女孩, 屋企好窮無野食,佢媽媽好辛苦及偉大去想盡辦法比肉佢食醫好左佢,但原來最後發覺是自己切手臂D肉比佢食,好偉大無我。 可能我講得太立體,兩個細路驚多過感動,細仔重大喊流淚,話我講核突恐怖野嚇佢地,反應真搞笑。 




12月 14, 2017

12月R's生活日記

生活 :
開學一排,女兒的小一校園生活很適應及快樂,讀書及功課無乜大問題,總算無揀錯學校。
大女學校有畫畫班,近期佢的兩張畫作,我覺得很靚,遲下會好好收藏佢,等女兒長大時可以親睹自己作品的真跡。




至於細仔,呢個兒子......,相對家姐,我跟太太要花耗上十倍的心力及時間。上個幾月前家姐的私立小學內部面試,面試後通知直接肯定地列明: 不予取錄。最後,由校長親身再interview細仔,比多一次機會佢,驚淘駭浪,最後慶幸終於成功收錄了,一天光曬。早前見住其他人交表留位,我地兩公婆葡萄到爆,現在總算定下來。當然,兩個同校,即下年學費即起雙。唯有努力點賺多D錢。

細仔的事,最令自己上心及花心血,經常收到學校,教會,一些活動班....不同老師or不同家長,教會執事的電話,whatsapp及留言等,為數也不少,總之花樣極多,問題大致都係跟同齡同學仔相處唔到,發脾氣唔合群及不接受指令及秩序.....。好多次也要我急趕去現場,總是要跟人家賠罪,代兒子道歉....。

很多時,事後聽仔講完經過及原因,又真係嬲兒子唔落,佢也有佢道理及佢自己真實的感覺,强迫不得,唯有掉個角度,在佢立場想下,蹲下攬住佢。

接到投訴真係唔野少,身邊人對兒子的評價也很極端,一係就批評他百厭仔唔合作兼麻煩友,一係勁讚他好過癮兼勁精靈成熟。K3兒子平常生活,跟大過佢好多的所有小朋友及我們,真完全沒問題,他不是蠢鈍唔明老師及人地所講的道理說話,只是聽唔入去,唔接受,有自己想法。

很多時侯,自己心情也受他在校的行為影響,這兩三年,自己慶幸有用很多時間陪住他們成長。 至小至今,我們兩父子,感情是極好極好。佢幾百厭也好,我從不,應該也是絕少體罰,因為"打"對管教尤其細仔根本無乜用。當下自己人生,最上心要操心勞心的事,就是他,呢個兒子。 希望佢一日一日進步。呢兩年,大大小小機構建康院,兒童情緒專家全找齊檢查過,慶幸一切正常,佢有性格係咁,無得解。過多半年等細仔 夠6歲,機構已幫細仔排期做深入D的測驗。 總之,一家人健康平安簡單正常過活就已經最幸福。

投資
現今情況無乜好講,近3萬點,人人賺錢。 自己買妖股一樣有執35%+左右。Anyway,自己個倉細無乜值得上心,唔值得日日苦思費神,除非升10倍,自己才會wow一聲high叫,否則執極有限度。有時間,返屋企陪下仔女好過。

工作:
現在開始進入忙碌階段, 中港澳幾邊走,要成日週處去,近來在大陸whatsapp時時被封,影響左自己好多社交聯系,家人朋友通訊也開始改用微信了,真抵700狂升。

下一年4月新財年季度,自己會更忙,早前初定下的新發展計劃會落實執行,屆時自己會進入另一個工作模式/階段/大變化,會與新拍檔們中港兩邊努力一同向更大的目標進發,活動圈及能力圈也有機會大幅擴大。新的事業生意,成敗無從估計,很多變數出現,但好玩程度一定爆錶,若真的能成功,會帶來無法估計的收獲,若失敗,也無乜大不了,至少帶來好大的刺激,何況,我無想過會失敗。

現在自己開始改變左心態及角度去工作,有能力去找新鮮事及挑戰去開創建立,工作感覺越來越享受,每階段過程也盡量叫自己樂在其中,過癮開心的感覺最重要。 工作上的事,不講太詳細,開始接觸林林種種不同的人,有時難免會遇到一些傻人,一廂情願自以為是的想法,人無知卻很大咬及大想頭,的確有趣。

另親弟剛終於買回自住樓,多年前一賣,現一買,損失真是極極鉅大,現忍痛也要上回車的決定是絕對正確。自己也實踐兩年多前的承諾,幫佢一點首期,借他約50萬左右,在這事上能幫親弟,自己也真很開心。

他在這12年間被加租,前後搬屋不知多少次,看到他一家能終能定下來,供平過租,安居樂業,也替他松了口氣,,始終香港最大問題就是住屋同醫療。慶幸,當年他賣香港樓時,有去深圳買返間樓,上年賣走暴升了的深圳樓後,計總算追回點損失,賺了現的首期。

現實有時是,這些年頭,勸親人買樓很為難,親弟也如是,他也有自己家庭及太太,若聽你講,真大跌時你就仆街好心做壞事。最好就是,他自己兩公婆決定, 做亞哥旁邊人唔好亞資亞佐,口水多多淨識扮比免費意見扮樓神,到佢真有需要時,真心出錢幫一幫最實在,咁樣大家也舒服。

親弟隔日whatsapp留言兩字 " 感謝",做兩兄弟真無乜好計,男人呢D野心照就ok。
自己前也借過錢比親弟,R太太也不知,事實上親弟有借自動有還,絕對是可信上等人。
今次一樣, 這是男人間不能說的秘密,費時女人多事。弟會分50期還,每期一萬,剛剛好,每個月做來比兩個細路小學的學費,足夠比到小五。


明天又北上,約了朋友在廣洲舊機場那5號停機坪食午飯,有機會寫下這地方,In 到不得了,自己試過幾次深夜零晨一大班人在這地方的bar處飲酒,深夜這地方也熱鬧到難以置信。而在大陸認識越來越多朋友,尤其後生那批,中港真是兩個世界, 大陸後生那批,個個也創業,至小開間淘寶店,充滿生氣,市場商機處處,大陸這個大市場,食到個餅一小部份,也就發到不得了。 希望,自己將來,能咬到一大口,咁就爽YY。




10月 09, 2017

R's玩物篇-威士忌

R人到中佬階段,以往自己生活圈子,價值觀,全幅心機精神及日常話題大部份均圍繞著"金錢"......總之就係發錢寒。

而當自己人生到了某一個階段,尤其有了仔女,財務根基能勉強ok,食住行無乜憂時,眼光及目標已隨年紀不自覺地有了很大改變,個人睇化左好多,對人生好多事及要求不再太執著,財自唔撈與否已沒太上心,自己有足夠能力,有了選擇權,可以盡量將工作變成"玩",不再只是為錢工作,希望能有PASSION,FUN, SERVE呢幾樣野出現在工作上. 咁自己就極願意一直工作(玩)下去,希望心態能越放輕鬆,而樂在其中。

自己人大看化左,尤其大病過(前兩年),不會因自卑而狂妄自大,自命不凡。 自己一向覺得做普通中庸之人最好,起碼有時身痕,行差踏錯用無人知,唔會有道德高地批判,行事亦唔洗下下比天下人談議論,總之 天外有天,叻人隨處有,自己做個普通人就ok收貨。 

剛踏入了42歲,中秋節與一班朋友及家人分別聚會,各也順手為自己慶生,更覺得有朋友及一家人團圓的"快樂"。 自己一家四口,一對仔女及在太太送上的蛋糕,最深刻,最珍貴。



返回正題,近兩年,嗜好漸多,開始品嘗及收集一些威士忌,尤其罕有少見的single malt品種。買書,不斷上網查,看展覽,買雜誌,逛酒鋪,入facebook威士忌收藏家群組...慢慢進入呢個幾過癮的男人威士忌世界。

因利成便,自己成日出差,外遊及有海外朋友,慢慢收集了一些幾正的酒款,尤其專攻Scotch Single malt whisky。同時間,有年份陳年的大牌子好酒,真的有其收藏投資價值,是品味與眼光的結合,

介紹自己近期幾支比較特別的收藏:

1.)Craigellachie 33年,全球1700支,今年推出,限地區限賣,市場無二手,無報價。
托人外地機場找獲- 2000鎊原價買到,約港紙21000左右。
此Craigellachie的 31年,今年榮獲最佳威士忌大獎,31年市現貨已罕,已升價幾倍。
Craigellachie33年屬限量Limited release,收藏價值極高。




Macallan - Sherry Oak 30年 - 買入HKD 19000 左右
此款市場越來越難找,特別是Sherry Oak,Macallan二手價硬淨兼年年在升。
但Fine Oak Triple cask這就不值收藏,其因不詳述。


SINGLETON 41年- 剛推出亞區GLEN ORD,41年Single malt,全球只出600支,香港慈善Auction拍賣比我投贏到,HKD 26000。現市價不詳, 酒序號碼是1 of 600 bottle,靚號罕有,收藏價值極高。



Highland park 30年 - 買入 HKD 7500 左右,


Grenfiddich -30年- 買入 HKD 6500左右


Laphroaig 30年- 免稅9折買入 HKD 8000左右

Balvenie 30年- 免稅9折買入 4500左右



一套花鳥風月機場版 - 購入價若HKD 23000左右。


另其它25年的whisky,scotch blended whisky及藍帶brandy,茅台等,酒款無咩特別,不咩寫。
近年開始,不斷研究搜尋不同Scotch酒廠的陳年威士忌,有些蒸餾廠出的有年份酒,飲一支,少一支,30,40年以上的,好多遲下要拍賣場先會見到,尤其停左產的Port Ellen,正如日本的威士忌余市而家去到咁癲價一樣。寶物收藏,時間過越久,將來越難收集齊。

另外,自己飲威士忌,都係一班朋友飲,Macallan 及Glenfiddich12至18年多,去Whiskylive展覽先有機會飲到好多30年以上的whisky。 回下帶,今年whiksylive,自己嘗到好多好野,基本上有30年或罕有的先飲,同老友兩條友下午—點入場,飲到7點已經醉薰薰,都幾好玩,好多罕有超珍藏酒款可以任我地試。










題外話, 細仔養左隻飄型虫(獨角仙), 對於呢類甲蟲物體,我老婆怕到震,但細仔偏最鍾意,無計,唯有同細仔特登去旺角買齊裝備新膠屋及木屑,滿足我細仔。



另外,家姐的私立小學上個月內部interview收生,百份之九十九會自動收細佬,細仔在擁有齊所有先天優勢條件之下,結果係我地預料之內"唔收",細仔佢既威力果真唔簡單,校長都認得佢。無計,唯有隨遇而安,可能呢間學校未必合細仔性格,你恨不得求不得,上天自有安排平常心。
 



9月 14, 2017

十年前的困境回憶

9月1開學日, 特登放一日假接兩個細路放學,尤其大女今升上小一,面對新環境及新生活,希望她的學校生活一切美好及快樂。

而升K3細仔,回到學校排隊集合,發現原來佢暑假不經不覺長高了好多,全班15個男,佢今年排隊去到尾二,人大個仔又兼成熟了許多,(好似)無咁頑皮。兩個細路都乖左,當然例牌去Toysrus,任他們選一樣玩具,如下。另希望香港toy's唔好執,始終係細路一個開心的玩點。

見住太太手拖住女兒及兒子行街時的背影,仔女日漸健康長大,果種快樂,真無價,係多多錢也買唔到的級數程度。



自己現日常所關心的重心,大部份是圍繞家人親人,尤其仔女。 自己日記,多是寫記日常的開心事,幾無聊,但多是快樂的生活,儘量正能量多。

現實有沒不滿不快,當然有,有時工作上遇到好多超谷氣事,自僱亦一樣。打工仔,最多屌下上司老細幾句,而自己開檔既,古靈精怪屎忽鬼乜人都有,受起氣來,幾何級數,尤其國內果班生番土佬,好多時,清官遇著兵,有理說不清,會激氣嬲到春袋都有氣。 

Anyway, 自己內心無乜空位去記及放置呢類事及人,費時浪費自己有限的hard disk,留返來記D 開心事好過。

不將怨氣及不快事記下兼重複回憶,反而將這些事N年後去回想,感覺會爽好多,當笑片回味。回到十年前,回味一下先,

十年前(即2007年),剛大攪完婚禮,自己香港大陸也有朋友,故兩地也要擺酒設宴,錢銀經急速大放血後,荷包乾塘,身家是沒多少剩,得有一層自住樓,工作上亦是不太順,生意仔從2001年開檔時的年年上升賺錢到那刻進入開始要補貼的困局,那一刻,煩惱爆。




皮費- 即每個月無生意也要付的固定開支,那些年不斷年年在增加, 每個月40萬以上皮費,即一日硬掘萬五銀有多,每日的壓力的確幾巨大。 

當年香港加大陸,尤其國內廠,人越加越多,工作越分越細,冗員廢柴無可避免出現,尤其國內有親戚關係的,開支大及無謂的浪費兼超低效率,訂單亦唔夠,有時要停工一段,工人知道後,是一大群個個歡天喜地商討著去玩的安排打算。我則是黑著面,死老豆咁既款,心裡極不爽,有苦自知。

競爭大訂單利潤漸少致收入年年在跌,一切向著壞的方向走,沒辦法了,收入大減及固定開支不斷增,尤其當年勞動法即將實施及人幣年年升,兌匯損失在擴大,自己要求生,國內廠要盡快變賣值點錢的機器套現,減產及大裁員是唯一生路,免不了。

問題是如何執行及部署,自己當刻自己才30歲多,屬on99亂來,性格衝動,說話直接兼幾無情,做生意智慧有限,唯一知道的是,做這不討好的決定,預左一定比人咒罵狂屌鏟上天花板,結果當08年頭落實執行時,果真如是,但無料到會有更甚後果及反應。

變賣大部份值錢機器(套回兩百幾萬),在08年執行大裁員,補足所有工人及稅務上的賠償及結清所有供應商貨款稅等後,收埋應收帳去埋數計,08年尾,自己得番80幾萬現金左右(唔計層樓)

真陰公,01-08年,做生意7年多,三十歲多時自己也曾經好似帳面上有過所謂幾百萬,向著8位數進發。但原來生意盤數的帳面數字,有好多開支隱藏著,幻象春夢來的,未入荷包私有化成資產也不能當真。

那些賺到的錢,傻傻下,大部份又會投落回公司及工廠擴建投資上,購置汽車貨車機器...等貶損後及一大舊工人遺散賠償事。開支大,當逆境不順時, 兵敗如山倒,一個月就燒走你多個月的所有利潤,逆境時是大放血,不壯士斷臂,傻去死守,下場會是災難級。

原來大陸做廠唔走佬,又合法有良心咁賠足遣散裁員,是一件好L甘的燒錢的行為。無辦法,漏夜閃人走佬,我真係做唔出,無必要。當刻2008計數,下場真慘 ,應收帳數又收唔齊,國內又有伙記趁亂虧空一大舊錢,收左貨款私袋走佬,一下子七孔放血,埋單計,淨入回自己香港戶口的,現金連一百萬也沒有。做生意7年得咁既成績,超可憐兼失敗。

2008年賣機器裁員兼補足海關所有稅項後,所有一切亦重新出發,原來天有注定,暗地裡,原來那刻,自己是幸運地避過當年8月後發生金融海嘯。

回憶十年前的這些,尤其逆境及苦況,現只得搞笑片感覺,將來有機會自己一定會跟仔女分享自己這些工作的點滴,給他看回相及片及文件檔案。比佢地知道, 佢老豆我傻下傻下成日笑嘻嘻咁多花臣嗜好,原來唔係弱智仔二世祖來的。

自己財務營商知識,用了16年才開竅到今日倘算合格的水平。剛開始頭7年,亂出盲拳,章法行錯曬。近十年,不再豬西。年後的今天,自己的賺錢能力亦比當年更強勁N倍有多,總算對得住自己及家人,不再可憐,目標亦不再只是8位數了,的確人犯過錯,豬西過,才學精。

也就是2008年那時那刻開始寫yahoo blog,記錄檢討那刻的自己的每一刻所想所做。寫R's日記blog的時間,這樣也就十年了。回憶完往事,講返現在開心事, 其實有得住,三餐無憂,身體健康,有得去玩就ok。 

Book左2張VIP飛,星期六與老友兩個人去左Whiskylive 2017,有好多收獲,飲左好多好野,由中午1點遊樂到6點,品嘗一些超特別及高年份的酒,與老友知己談天說地品好酒,人生一大樂事。

今展覽中訂左一些酒,另有慈善Auction,無乜人投,比我第三口價2萬6就投到支全場最正的酒:Singleton 41yrs single malt Scotch whisky,超正。 實酒未運豈到香港,收到後下回update實相。下回blog文詳寫,我的另一所愛玩物-Whisky篇,影下我的whisky玩物收藏及我細仔最近養的獨角仙。


































  













8月 11, 2017

2017暑假旅遊

旅行回來一陣,自己就重回工作,由於暑假細路仍未開學,太太就忙碌於安排每日細路的節目,始終唔想細路成日由朝到晚在家看電視卡通,所以安排左不同的興趣班:溜冰,游水,去下公園,圖書館,不同展覽館..,對細路身心發展都健康D。

旅行回來,原想要執筆寫下旅記,給有看開這個R's blog的自己友分享下旅行快樂事。
但原來要整理的相及旅記, 都幾大工程,都係以後慢慢先補寫,現先上下的相就算。



今次去澳洲玩左近兩個禮貌,旅程極開心,一班人去玩,最緊要個個都平安健康無病痛,食得睡得玩得,特別是飲得, 一班男人,餐餐基本上也有美酒,食海鮮平靚正。

澳洲正常旅遊景點,其實無乜好寫,事實無乜新奇景點購物樂,最主要看下風景,去下酒莊farm等,睇下袋鼠樹熊,行下國家植物公園,去下海灘咁,分別係最主要有一班細路,細路先係主角,好多行程景點是安排比他們親眼遊歷感受下,自制遊學團咁。





澳洲天空夠黑,少光污染,晚上同一班細路看星星,用app去逐個星座搵出來,超好玩。



澳洲,尤其墨爾笨,是將來細路有機會留學選擇的地點之一,感覺不錯,貪佢簡單純樸一點。去旅行,無租車,唔洗煩,去到邊都可以飲下啤酒,幾爽。遊記旅後感,容後補寫。


另外,自己開始對越來越對whisky有興趣,,出外去旅行,會開始行人地的賣酒地方,搜刮好野,尤其scotch single malt whisky, 有30年或以上的,價合理見到會即買。今趟的其—個收獲,Laphroaig30年,9千銀港紙唔洗,超抵。下一支,好想買到支Macallan30年,香港街價賣港紙3萬2左右,唯有去外地旅行時搵下。

題外話,香港烈酒稅係100%,威士忌年年漲價機會好大,自己覺得值得收藏有年份的whisky,其實自己未必識飲出果種味道,亦好少機會會開咁高年份的來飲,買左純粹觀賞收藏,呢種屬屎忽痕嗜好玩意,又幾好過癮好玩,一路買收藏時,一路研究學習這瓶威士忌的文化出產處及其知識。 

靚車,錶,酒,旅行,靚女人,呢D可能就係男人天性,好自然會迷上及追求。
靚女人=R太太,一個已夠滿足,已經無得再upgrade了,唯有追求下其它方面。

在旅途上,而家有上網whatsapp, 真係好方便,能遙遠控制處理很多事,
離下題譽先,講下工作投資事:

新辣招前,自己買多了一個工廈,仍可做4成按,回港後要急處理這一個新購近1200呎的工廈的裝修分間放租事情,原本一切就緒,訂好了防火大門,師傅亦已動工拉電,裝好冷氣及換窗等...但剛有租客原整個大單位租下,價錢offer又理想,回港剛好能及時可以叫停進一步裝修事情,能慳下不錯的裝修費,正。

2010年,無記錯,自己買第一個工廈,當時平到嘔,坊間全無資料,無新聞報告,無研究,想google一下分析都無,總之就係1000蚊一呎左右,7年後今天,已是3倍以上。停手了幾年,今年又再開始買,原因一樣,仍然是抵買。Anyway,資產配置樣樣有D,其實果別項目升跌真無乜所謂,整體有失時亦有得,平常心最好。















 










 
 

  



7月 14, 2017

7月日記:生活、投資、私人空間

生活:
閃電就到左7月中,R生活上很多事,核心也是圍繞細路,上月忙碌於大女小學派位,登記及一切準備及幼稚園畢業家長觀禮....。

小一大抽獎派獲最尾後,去了叩門,第二志願亦已收錄女兒。最後還是放棄不讀此叩門學校。因應女兒的性格及條件,選擇最適合她(不是最top ranking的),對女兒成長會更好,開心返學最緊要。但唯一缺點,是要比錢。

前陣子學期尾,例牌家長日,見老師了解呢一年細路的校園生活,關於細仔,結果現K2班主任的評語係: 帶細仔佢去check下,同K1老師上年評語一樣。

事實上,上年已搵左專業機構及人仕幫細仔評估兒童ADHD,過度活躍及專注力不足,慶幸結果特徵均不是,只是好動及自我性格強,即天生比較百厭,無得點解。

今年老師評語又如此,所以又要去做多次評估,先搵了政府健康院亦做了初步見跟進,所有要求,細仔能做足兼對答快靚正,唯一是倒蛋有時玩野將說話反轉講,百厭起來,睇少兩眼就有新鮮野,無佢乎,總之一切正常,百厭總好過痴呆,一年比一年乖D就ok收貨。


題外話,暑期開始,晚刻週未會同細仔打PS4,Lego 系列,Overcooked.Transformer..細仔打機真係幾叻,方向感所有制控制自如,同佢一路可以逢關過關,若果讀小學有打機呢科,佢有機做高材生。


現細路開始放假,今晚就一行12人出發澳洲玩近半個月,帶左7千澳紙for洗費食買, 另外旅費住宿機票local tour fees每家庭要近十萬。下次寫blog, 會寫這次澳洲Melbourne+ Tasmania, Hobart 之旅。


前排大女畢業,呢3年幼稚園生活,沒學術包袱什麼起路線壓力, 她天天上學也是超開心,在一間好的學校,充滿愛心。女兒認識了很多朋友,太太亦是,與很多家長成了好友。學期尾臨別時收到很多小心意禮物。 而我們,也禮尚往來,買了一堆小禮盒朱古力回敬同學及老師校長。普通幼稚園,就是有這個好處, 師生人也親切和諧,沒乜功利要爭。





投資:
投資理財方面,自己一樣有種幼稚園畢業上小一的感覺, 經過多年後有左自理能力,脫離尿片兼戒左奶,目標亦而提升,進入新的小一,眼看附近的社會大學,個個實力5**, 自己開始從鄉下仔進入新的領域,面皮厚厚,懷著自卑但又極興奮好奇的心情一步步笑住向上爬,超好玩。

身家數額及投資太仔細的操作現已不太想blog明確咁寫,總之年年在升就ok,到某日N年後,在自己達成一些理想目標後,也許會無私咁寫出來。 未成功完成,不可自滿,輕率妄言。


私人:
這兩年細路漸大,自己開始有番私人時間,亦開始拓闊那已封閉多年的社交朋友圈子,重新認識新朋友,包括細路學校之家長,bloggers及細路的教會朋友。

近自己年齡的朋友,大時勢環境造就,絕大部份已安居樂業,懂投資的,尤其磚頭,更食正財富大升值這十幾年條水。

自己的知己好友,現大都唔太愁生活。相反,心思所在,也是落在仔女家庭,健康運動及要如何"解悶", 尋找日常生活樂趣。 自己及老友們,一年整家人一大班結伴去3至4次長途旅行,全世界週圍去,有這些良朋作伴是極好玩樂事,可遇不可求。


不愁基本生活三餐,"悶"係一個最大問題,要搞好才能維持精神上的健康。為左避免自己將來變維園亞伯兼祥林嫂性格。所以趁年輕(現在仍是),識多D不同朋友兼發掘生活樂趣嗜好,是自己一大重要事情。


話是話,交友講緣份,不知不覺,原來自己近年認識了不少過癮bloggers, 見過面,食過飯飲野也唔少。有一些, 自己直覺是將來可以有機會成良朋, 尤其一些屬父親級的bloggers, 因有著共同目標及日常關心事,齋講湊仔經也有排傾。

有錢,無乜同channel嗜好及朋友的人,生活快樂極有限,所以經常提醒自己, 識朋友要儘量君子之交,能值得交心成友的,儘量要珍惜及去建立,日久會見人心,時間歲月是自己沉澱友情深度的唯一認為最好之的方法。