9月 14, 2018

R - 9月工作日記

閃電就踏入9月, 8月中暑期—大班人去了名古屋,喪玩後曬到成舊黑炭回來,很快便收拾心情,公私兩在極忙。

先講投資, 無乜新搞作,股市上年一早連妖股也一股不留,這幾年無乜興趣重注股票這範疇,因本金下注少,另外最主要是自知天資所限,征戰十幾年,"股市"這個應不是自己主戰場,明白認清了,就主力向自己有機會成功的領域出兵還實在。

講工作, 新公司的籌備得如火如荼,很多事情在忙,費盡心力去安排,與拍檔們的新合作,在互補長短下,自己相信,新公司威力的確會很強很強。

新公司賺錢否,自己不太擔心。反而人際關係呢part要重新學習,尤其說話的藝術,對國內班友及一些新合作商,有時一火起,就好順口咁 "靠,操,吊",一連串助語詞, 有些合作的人是很後生,公子哥兒出生,玻璃心得很,給我吊過兩句,過左半年仍然未能釋懷。 哈哈,我當然話之佢。

R太太也告誡過我多次,尤其現實面對面時,講野要顧人感受,唔好太直接,超黑人憎,因現在處境不同,尤其對新拍檔們,人地不是你伙記,現在團隊不斷增大,已有一大群人幫手及結集了,合作上有很多不同的生產商,服務商,供應商,很多是收義氣友情價幫你,為你想完成的一件事進發,你要感謝人地,重要下下"操人地媽個B",

雖然口說著 "玩住工作",但背負人家,朋友期望及自己的要求,對拍檔們的交待,無得你hea住做。唯我自我調節一下,當個腦堆滿未解決的事情,塞滿樽頸問題時, 寫下blog文,清空一下思想。

有留意的,會發覺R清空左舊blog文, facebook及網絡上所有家人頭像相,也會逐一全部清除, 為乜怕乜? 做左虧心事?絕對不是! 原因係無必要,因在網絡上,仔女也漸大,真要好好保護家人及自己。有錢無錢有幾多錢,自己心知就ok, 工作上超高調可以,但實際生活就無謂咁,反而要超低調。

新公司有很多計劃動作,很慶幸,圍繞自己身邊認識的,有很多叻人勁人,感覺全是天助一把。

自己欠缺及不太懂的,就是公司財務安排,股份及權力之間的平衡。 過去自己是公司唯一股東,自己全出資,現在已全不同,有一個同等份權的拍檔,要考慮他的意向。

這段籌備時期,新公司由概念到今開始埋班組隊開檔,越清晰成型,就越來越多人想入股投資R的新公司,有朋友,親人,親人的親人,朋友的朋友,供應商,合作廠家及外資.........。 但所有人全部暫時也不答應,等R新公司運作後以後才再計劃。

 不接受投資,原因是
1.) 暫不太缺資金,朋友親人一講錢就失感情,無謂自找麻煩
2.) 最主要是自己不懂處理這些機制玩法,權利與義務?  
3.) 未必一定賺錢, 無謂要朋友親人我受風險,到有日,若真係成功得左,自己先大圍分豬肉還好,人人開心。

事實上,其實已有韓資想接觸及約見我們,想入股R及拍檔的新小茶飯公司仔,但一樣比我請佢食左lemon,  原因時侯真太早太快,公司都未成型及未開檔,佢地個價唔方比得好,自己未cheap成咁,見錢就開眼。

將來相信亦會有新投資者及股東加入,自己一想到要向人交待及負責,就不太爽,但掉個角度,有強勁的糧水子彈配合補合,才有機會食雞winner Chicken dinner 。
 (股份及權力之間的平衡,有高人就PM教下我這, tks)。


新業務work 唔work? 成功失敗? 真無人可寫包單, 但在自己4字頭的歲月裡, 將這一個項目完成推出,對得住自己有突,
總算破左舊立左新,打破班吹水佬飯碗,好多人受益受用到。 

又係果句, 講多無謂,行動最實際,成功否將來自有分曉。 好夢定夢遺一場,其實我自己都唔知,可能係一廂情願的想法,哈哈。 但這"未知" 就係搞搞震最吸引人之處。 自己想過最壞情況新公司會係點收科? 最壞情況......失敗左其實對我事實上又係無乜點大影響,既然係咁,重有乜好驚? 做左先算。JUST DO IT!

寫完,重回工作中,收筆。


























8月 07, 2018

7月生活--大陸闖蕩記之一

生活中有極多項事情在忙,每天也在默默筹划及執行,主要也是工作事業及家庭事,占据著自己整个人的hardisk,而自己最上心及紧张的的,大概就是孩子家庭及工作。而自己快樂大程度也是源自家人開心及在工作上所得到的大滿足。

多年前,應該是yahoo年代的blog,寫過,燈火過,當有一天自己真的財務根基穩固,唔憂三餐,一定回國內闖蕩一番。

事實上國內商機處處,發展極快,所有人事物過幾年已變化極大,各樣新生意可塑性無限,在這個年代能參與其中,特別是在現這一個網絡電商,商機無限的黃金高速年期,若果能分到餅仔,幾條香港仔能在國內霸到一個小地盤小江山做皇,將來就超一定肥仔。過程其實幾過癮好玩,起碼日日都有新鮮事,極享受住過程。

自己正將想法實現中,開始在大陸建立新基地,朋友圈,人際網絡, 與黃金拍檔搞左壇古怪小生意,向大春夢進發。日子越久,國內新識的朋友就累積越多,來自不同領域,地域。每個人也有其故事,後生的就青春無敵,想法創新,對將來抱極大希望。

多了時間在大陸, 首先要處理解決的就是上網及聯絡問題,現一張大灣卡上網,whatsapp,facebook,看香港新聞終於可以不受限。在國內,自己亦很久沒用現金,一切用微信(國內版)搞掂,叫車用滴滴,在國內生活,所有衣食住行也是手機錢包搞掂,去街也唔帶銀包現金,地道到爆。

前工作過夜,住酒店多,長期bookHilton,平均要1100港紙一晚,一個月幾劑,一劑就幾晚,


計落租屋住有so好多好多,上個月在廣州白雲區租了地方,3500月租,不包家電,所有家具什項電視全淘寶京東搞掂,床及床褥就Ikea,而床單被鋪等就一定要香港運上用。

間宿舍搞呢搞路,改改改,搞到個裝修師傅媽媽聲,話我太奄尖,油完牆又要再貼牆紙,結果補多幾千比佢就解決問題,再微信發多個888利是紅包比師傳,當堂笑返晒。超抵,4萬銀就搞掂左置好左個廣州舍窩,電視用國產小米,mon用AOL,平靚正。

但始終無論宿舍點整,每次回港,始終覺屋企是最最最舒服,沖個涼,坐在梳化灘屍咁看電視,同兩個細路玩下,就是最高級的享受。

國內消費力,創新快速增長是千真萬確,速度驚人,自己無數據分析,純肉眼及親身感受到。 大道上得閑數一下Range rover及Porsche就知道。自己常去用餐的餐廳,消費其實都幾貴,兩個共要500落樓,但一樣坐無虛席,當地人的高消費力極高。


自己以往在國內接觸的,是做廠及出口的上一代。騰籠換鳥後, 現在接觸的,是80/90後的新一代,從事古靈精怪的行業, 做主播,廣告拍片小視頻,微商電商淘寶商,自家品牌營銷,各種天馬行空,古怪新生業務。有機會,慢慢寫下這些人。

服務質素方面,自己親身感受在淘寶,微商,滴滴打的及美團,由於大部份均可打評分,而評分決定佢地生死成敗,服務質素是超讚,客服永遠放客戶第一

在國內,接觸了很多新群,新事,生活圈......數之不盡,很過癮,不漏商業秘密的情況下,自己有機會也想一一寫出。國內認識了很多不同類別的人, 來自萬千不同地域,他們的故事,行事,生活習性均各自不同,很精彩過癮,  國內的朋友每每問及我香港大概情況,我也不知該如何說起。

另6月中新寵GLC250已到手,收車後,光速去做埋全車鍍膜,GLC的行車感覺,當然比自己7人車爽好多,一比油即有推背感,0-100km加速,7秒左右到完成,行車噪音很小算極靜,跟車的音響已可以,而車入過彎時低盤重心很實在感,容易操控,比到自己很有信心的感覺,這時跟自己高身的7人車相比較的用很感。 這車遲下就會掛上港珠澳牌, 在大陸四處遊走。






另有人話港珠澳牌供應會增或港人可自由用橋致牌會跌價,其實自己不太理,因為在廣 ,正在限外省牌,行4要停4天,粵牌不受限,變成有價有市,而中港牌也同樣不受限,更加全中國可任你行,這己經值回票價。另國內用車,買貴價進口車加稅, 事實上在香港買台新的+港珠澳牌重化算。這就是我看牌的價值所在,省車稅已值回票價。


生活上每日也有很多新鮮事及際遇,不能盡錄, 因為每一天,也是無形式及無pattern可遵從,時間地點人物事情行程均是橫空爆出來的,全是未知, 自己很喜歡這形式,賺錢當然重要,但新鮮好玩一樣重要。


廣州宿舍一切皆設計過去佈局,儘量要舒適簡約,總之幫助自己有好覺好睡,千算萬算,諸葛亮都計唔到,上星期留宿的兩晚均睡不好,何解? 計漏左樓上住客,原來有鋪零晨兩點多先黎扑野的喜好,噪音對正我將床,3D感受,D木床碰地的聲嘈到呢....真唔知點解救!...其實無得解救,無理由用震樓神器回佢,阻人扑野,會比人燒sping pocket的,唯有忍,樂觀D想,好在十分鐘就嘈完。  大陸樓屋苑D石屎層隔音真差,唔住過,你真係唔知道。

財務健全令自己在香港能生存,可以無咁憂咁能返大陸去闖。
向人生下一個大目標進發。因為我唔想將來日日on99,無所事事。玩住工作,其實好爽。

今星期尾便一行12人大小出發名古屋玩10天,所以這星期好多事在趕在忙,特別是新公司很多新鮮事在籌備,包括搵左廣告公司選好model及場地去拍片,小視頻及硬照,先前真未試過, 見聞真寫之不盡。 

新公司新業務,籌備人力單薄,無前車可鑑,無可借鏡,無人教如何可以點做,現一切皆支出,小小事已經要大陣容花錢去做,項目進度慢,實際效果又同想像有大分別,落實執行時多於想像的困難,問題樽頸位多的是, 成敗又未知, 放血又無期................數之不盡的煩。  

煩哪煩哪煩得不能呼吸
煩哪煩哪煩得沒有力氣煩哪 我煩啊
煩哪煩哪煩得不敢相信
煩哪煩哪煩得歇斯底里煩哪 我煩啊



唯一緊持做的就是"好玩",能打破常規,為呢個小小業界定新規則玩法,將來由我地做皇,因呢個新業務實業,一向由外國鬼壟斷左,過往要付五星級費用先享用到。機緣際會,我地人材與技術機密全配備。我們的出現,可以打破左死鬼金飯碗,令中港澳台外國所有地方,好多行業真能受惠益及。

不寫咁詳細了,費時比人以為我想引資坤水魚(事實不用),在現籌備過程中,香港大陸也有不少人想加入,投資取點股份,但我費時在人事煩,全謝絕了。事實上,錢我們不缺,看到有機會賺大錢的事,真無必要與你分,(除非你有獨當一面的能力,人地要求用),這是硬道理。  

何況未必成功,費時累人,可能最終是自己春夢一回,夢遺一場。 希望將來,上天在適當的時侯,讓適當的能人,事物與機會出現協助我與拍檔,讓我們實在痛快大幹一場,爭一口氣。  

 Anyway,講多無謂. 行動最實際。  






















5月 14, 2018

5月R's日記

幾個月無寫blog文, 一來現實生活中,工作及私人生活事填得幾滿,無乜閑情寫。 二來自己寫blog的目的熱情,好像失去了,三來,自己及一班朋友掛住玩Pubg Mobile 絕地求生食雞手遊。

先講寫Blog熱情大減之原因,一向原本(我天真認為)Google Blog這業餘,純分享吹水交下同道好友之地,但近年變成好多有心人想出名之捷徑。費時話人,總之斷人衣食,等於阻人仆野 Your Spring pocket will be barbecued。

坦白, 出名與點擊,我全唔太理,總之姨媽到就出下文自娛就ok。 事實上真正的人生舞台根本不在此Blog地。

先講自己生活,今年新年立春後,整體感覺很好。有很多好事及發展接續著到來。今年肖兔,看來真有機屬行大運之年,自己會好好把握。新一年最大的祈求,簡單就是繼續一家人平安健康,齊整開開心心,這樣已經是最幸福的恩典。

新年去了東京旅遊,跟旅行團的湊仔之旅。過往去了很多次車京,反而這感覺最舒服的一次,因全程有人服持打點食,玩住,細路去玩下雪,咁就閃電過左5日4夜。



今年2018一開年已有很多變化,首先講二奶(換車),舊車用了近十年,安全的考量,真的要退役了。今次直接買新車,選SUV,告別7人車。訂了Mercedes Benz GLC 250深灰,6月左右會收車,中階價錢,選了AMG package options ,埋單60萬有找。載住一家大細大小,安全可靠最緊要,我理得人人笑我Benz 能,

街上見到人地的新GLC250,AMG 包圍,19吋鈴,是Exactly 我訂的那樣
多月來有很多飯局,其中較深刻的是與一些中學同學飯聚及落bar酒局。過程中段已經很悶,始終生活圈子全不同,對事的認知及處事哲學尤其人生目標全不同,話不投機,只好不太多聲全程no comment。事實上,同一些消極人生觀的人共聚一餐飯,全程講負能量事,係一種十級的精神折磨,講到成個世界灰曬, 下一次飯局,咪搞。

近期試過一條友屎忽痕就即飛去台北3天,為去學習whisky交化及與台北facebook威士忌群組認識的同好交流一下. 就咁好碰到朋友在台北出差幾天,晚飯大致有個伴,不錯。




收藏Whisky,成為自己近年愛好之一,越買越收越可越多罕有的酒,尤其逢遇到30年以上,罕有兼限量的,大品牌Scotch Single Malt現在的價錢仍然可以接受的水平。 旅行出差,網上Auction及facebook交流群組,陸續逢好野就收歸收藏庫。

買買下Whisky,存酒數量也不少, 用左一晚網上,免費整左個R's 酒庫online store, 記錄列出自己的收藏自娛一下, 另外將來若果真有人想要(當然要超高價) 自己或會可能割愛賣酒。大家可上去八下

https://whiskyinvest.boutir.com 



講生活理財: 今星期同老婆傾計談到,大概計一計來年的家庭大概開支,唔計又自可,一計原來都幾嚇人,自己都嚇一跳,作死,原來真係咁鬼大開支。

來年兩個細路的私校學費,補習費興趣班....+全家保險+ 四大掌佬的家用+供樓+ 伙食+ 前後租兩個車位+ 養兩架車+自己的開支+老婆開支+旅行..........引證左一個事實, 就係搵得多時,生活水平一升,開支亦會不斷同步漲大,速度快過你簡接收入增長好多倍。 即係自己要向更高資產水平一級進發,才可以生活無憂。

老婆亦正式訓示, 玩具及無聊野,唔準成日不問價就再亂買,尤其比細路的,要節約簡儉"斷捨離",的確,全靠老婆慳家,錢才能儲下。

講工作, 新公司業務忙於建構中,太多工作及準備要辦,香港公司業務需要多3個月左右就係面世,自己好期待, 計至今天,新公司籌備左近9個月,香港部份稍後一建構完成,下一部就是中國大陸,全套戲肉所在,國內合作班底已有,初步組合中,今年內會廣州先建首點。

這門生意是很特別,外國開始已慚流行,世界市場需求年年在增長中,而一向由幾間美國及歐洲公司壟斷,因有一些高階門檻技術要求,不易複制抄襲,你看到知道也無法照做,行業秘密有極強的護城河,將來能避過淘寶及炒襲的價格競爭。

從事那一門生意,有時幸運佔很大成份,自己香港及國內的身邊好友就偏偏是這行內的精英,合組籌備了9個月。做這新生意,我有一個春夢,希望新公司一誕生,將來可以為"香港友"爭一啖氣,進入大陸,橫掃佢現整個初始混亂的市場,由我地去建立規則。 

Anyway, 幾個朋友共創大事,好玩過癮最緊要,春夢唔怕發, 美夢就算不能實現變成夢遺,一樣是美事一場。稍後建構完成及運作時,我會公開新生意賣下廣告, 反正就算知道這是超好賺的行業,其它人也一樣抄不到。 

做生意搵錢,失敗率高,辛苦過做收租佬買樓多多,而回報未必有。但將來老左回顧一生,那份成就感是無法計的大滿足。自己做任何事,起碼對得住自己及其它人,無坤人哄水魚,實實在在,建立一些有價值的事件出來。 為搵錢做壞事,立壞心腸,總有報應。


講家庭: 到講下細路,大女升上小一,女兒讀書自理方面的表現,表現確令我們有驚喜,無乜讀書做功課的問題,佢返學開開心心最緊要,考試讀書成績名次,自己兩公婆真無乜要求,普通中庸就收貨。 經常聽到佢分享上學的開心事, 就知道自己為她選對了。

另外細仔近期行為表現亦好了很多,自己感覺多左個Friend,乜都可以傾一餐。 前排同佢玩捉Pokemon,兩父子成日週街去捉,自己去到台北,一條友照捉,雖然低B,但捉到些特別精whatsapp 比佢地看,開心到不得就值回票價。

呢期玩Pubg mobile試過一家四口上陣玩, "壓力無比的大",尤其加埋老婆同個大女玩, 佢地方向感全無,四個人上陣殺敵,得兩支槍(我到細仔)有殺傷力,兩個女人係流動人形活杷, 手同眼配合唔到,結果,我唔會再同佢地一齊玩,食雞無望。


下篇blog文,有時間就寫。 事實上,顧好自己, 將自己撈到風山水起,將自己的現實人生經營得精彩出色最緊要。投資切忌拜偶像,天仙美女一樣要柯屎,咪女人一個。 呢期妖魔鬼怪盡出現一大羅, 大家自己保持清醒思維最緊要。 有錢根本走去捐錢最實在,自認神人又貪人幾千學費做開班L把托咩。









































1月 20, 2018

2018 年1月生活

2018年 1月份生活

近期工作例牌也是十級忙碌, 一樣連續幾個月未正式放過假,星期六日及及假期也是在工作中渡過。假日在沒電話的干擾下工作,可以專心處理很多文件及資料數據,特別有效率。

近月放假日子數得出,平安夜放了半天假,除夕夜出席了一場婚宴就這樣,要趕過年收爐前完成所有工作訂單,所以聖誕及元旦也在工作中渡過,為今年花紅金盡最後努力爆數。

雖然忙到人都癲,自己學懂了放松心情去享受每一過程,盡力把各種事情做好,令自己無咁大壓力及大脾氣,以往一忙及急時,心情燥爆兼生人勿近。

年初三, 已報團去東京旅行。 十幾年無跟旅行團, 第一次一家四口跟團,都幾新鮮。
點解跟團? 自遊行太多,比細路乜都試下之餘,自己又唔洗plan,上車就睡,落車就玩。

今日星期六,有空寫下近期自己的快樂開心事。

1.) 學校家長日, 細仔K3班主任,對他評價極好, 讚他有很大很大的進步(雖然仍然是麻煩友)。 細仔忽然間大個仔明事理隨和好多,估佢唔到。

2.) 新公司已成立,新業務生意及網絡會於農歷新年後正式執行, 自己香港大陸也會有一班新的好玩拍檔,一切闖天下,新業務好玩程度爆登。

3.)跟手成功買左個港珠澳車牌,55萬人仔搞掂所有事,2月中會出到批文,橋一通,可以第一批開車上去。 自己工作需要成日要中港兩邊走,自己跟partner的公司現已有齊深圳灣及港珠澳中港牌,將來隨時深圳or珠海北上也可。另大陸發展真係唔可以忽視,珠三角區,港珠澳, 深中通道等, 成個區將來一連成, 某些區發展真要注意。

4.) 另一開心事,今年2017自己花紅, 好大機會又爆標及大豐收,自己能分到兩百萬以上。3月底就會知道及收齊獎金花紅實數,到時要再為呢舊資金大配置,制造更多Passive income

5.) 2015用120萬買入的其一工廈車位,上年尾整棟大廈有財團在收購,已收近8成門檻,進入最後逐個埋位傾還價階段,收購開價200萬,自己還300萬,應該會在250萬左右成交,事成則收租3年兼執130萬,收獲ok。

6.) 股票方面,由於輕倉妖股及不中爆升股,現市況計只執3成幾, +35%,跟其它blog友的斬獲比,獲利銀碼不算鉅大,另自己已開始逐步減持中,現牛三也無乜值得自己大事慶祝。 Anyway平常心, 撫心自問,要在股市賺三千萬以上,自己真無此本事。
股市越爆紅,近期就越多妖物,股神股仙學生估神, 但自己相信還離爆很遠, 現升市莫估頂, 有熱鬧就趁勢抽下油水無妨,而家先重倉就比較危。 

2017埋單計,自己持有的物業帳面數也升值了不少,磚頭類的升值回報也不錯。
去到新一年2018,自己收入及花紅+賣股套現+ 車位賣出+ 加按自住樓套出之子彈.。自己現金水平會去到很高,過8位數,如何有智慧聰明地處理運用這現金,極為關鍵,像現今市況磚頭及股市皆咁狂熱,反而進攻配置頂目瓣數及回報率有限。 Anyway,不要因錢多而亂投資是首要。

財務上持續平穩進展,的確令自己可以有很大空間做好多事情及有本錢嘗試新挑戰,另返樸歸真,始終一家人齊整健康平安生活最重要, 近期工作太忙,應酬及飲食很多及亂來, 搞到成日頭痛,一量血壓原來160上壓,二話不說,即去睇醫生食藥,要改一改飲食及飲酒。

近一年自己寫blog的文章越來越小, 可能是生活普通如常日子,無乜特別值得寫文記錄。更加另唔會為身邊on 9無聊事花時間八婆寫文評論一番。有孩子後的時間更珍貴, 陪佢地更有意義。

禽晚講故事哄他們睡, 佢地要求我講一個感人偉大的故事, 我講完, 細仔真係有大喊及流眼淚,唔係感動到喊,係驚到喊。大女發脾氣叫我,以後唱兒歌算數,唔好再講故仔,因太恐怖。

我講古時有一個營養不良,就黎瓜柴的女孩, 屋企好窮無野食,佢媽媽好辛苦及偉大去想盡辦法比肉佢食醫好左佢,但原來最後發覺是自己切手臂D肉比佢食,好偉大無我。 可能我講得太立體,兩個細路驚多過感動,細仔重大喊流淚,話我講核突恐怖野嚇佢地,反應真搞笑。 




12月 14, 2017

12月R's生活日記

生活 :
開學一排,女兒的小一校園生活很適應及快樂,讀書及功課無乜大問題,總算無揀錯學校。
大女學校有畫畫班,近期佢的兩張畫作,我覺得很靚,遲下會好好收藏佢,等女兒長大時可以親睹自己作品的真跡。




至於細仔,呢個兒子......,相對家姐,我跟太太要花耗上十倍的心力及時間。上個幾月前家姐的私立小學內部面試,面試後通知直接肯定地列明: 不予取錄。最後,由校長親身再interview細仔,比多一次機會佢,驚淘駭浪,最後慶幸終於成功收錄了,一天光曬。早前見住其他人交表留位,我地兩公婆葡萄到爆,現在總算定下來。當然,兩個同校,即下年學費即起雙。唯有努力點賺多D錢。

細仔的事,最令自己上心及花心血,經常收到學校,教會,一些活動班....不同老師or不同家長,教會執事的電話,whatsapp及留言等,為數也不少,總之花樣極多,問題大致都係跟同齡同學仔相處唔到,發脾氣唔合群及不接受指令及秩序.....。好多次也要我急趕去現場,總是要跟人家賠罪,代兒子道歉....。

很多時,事後聽仔講完經過及原因,又真係嬲兒子唔落,佢也有佢道理及佢自己真實的感覺,强迫不得,唯有掉個角度,在佢立場想下,蹲下攬住佢。

接到投訴真係唔野少,身邊人對兒子的評價也很極端,一係就批評他百厭仔唔合作兼麻煩友,一係勁讚他好過癮兼勁精靈成熟。K3兒子平常生活,跟大過佢好多的所有小朋友及我們,真完全沒問題,他不是蠢鈍唔明老師及人地所講的道理說話,只是聽唔入去,唔接受,有自己想法。

很多時侯,自己心情也受他在校的行為影響,這兩三年,自己慶幸有用很多時間陪住他們成長。 至小至今,我們兩父子,感情是極好極好。佢幾百厭也好,我從不,應該也是絕少體罰,因為"打"對管教尤其細仔根本無乜用。當下自己人生,最上心要操心勞心的事,就是他,呢個兒子。 希望佢一日一日進步。呢兩年,大大小小機構建康院,兒童情緒專家全找齊檢查過,慶幸一切正常,佢有性格係咁,無得解。過多半年等細仔 夠6歲,機構已幫細仔排期做深入D的測驗。 總之,一家人健康平安簡單正常過活就已經最幸福。

投資
現今情況無乜好講,近3萬點,人人賺錢。 自己買妖股一樣有執35%+左右。Anyway,自己個倉細無乜值得上心,唔值得日日苦思費神,除非升10倍,自己才會wow一聲high叫,否則執極有限度。有時間,返屋企陪下仔女好過。

工作:
現在開始進入忙碌階段, 中港澳幾邊走,要成日週處去,近來在大陸whatsapp時時被封,影響左自己好多社交聯系,家人朋友通訊也開始改用微信了,真抵700狂升。

下一年4月新財年季度,自己會更忙,早前初定下的新發展計劃會落實執行,屆時自己會進入另一個工作模式/階段/大變化,會與新拍檔們中港兩邊努力一同向更大的目標進發,活動圈及能力圈也有機會大幅擴大。新的事業生意,成敗無從估計,很多變數出現,但好玩程度一定爆錶,若真的能成功,會帶來無法估計的收獲,若失敗,也無乜大不了,至少帶來好大的刺激,何況,我無想過會失敗。

現在自己開始改變左心態及角度去工作,有能力去找新鮮事及挑戰去開創建立,工作感覺越來越享受,每階段過程也盡量叫自己樂在其中,過癮開心的感覺最重要。 工作上的事,不講太詳細,開始接觸林林種種不同的人,有時難免會遇到一些傻人,一廂情願自以為是的想法,人無知卻很大咬及大想頭,的確有趣。

另親弟剛終於買回自住樓,多年前一賣,現一買,損失真是極極鉅大,現忍痛也要上回車的決定是絕對正確。自己也實踐兩年多前的承諾,幫佢一點首期,借他約50萬左右,在這事上能幫親弟,自己也真很開心。

他在這12年間被加租,前後搬屋不知多少次,看到他一家能終能定下來,供平過租,安居樂業,也替他松了口氣,,始終香港最大問題就是住屋同醫療。慶幸,當年他賣香港樓時,有去深圳買返間樓,上年賣走暴升了的深圳樓後,計總算追回點損失,賺了現的首期。

現實有時是,這些年頭,勸親人買樓很為難,親弟也如是,他也有自己家庭及太太,若聽你講,真大跌時你就仆街好心做壞事。最好就是,他自己兩公婆決定, 做亞哥旁邊人唔好亞資亞佐,口水多多淨識扮比免費意見扮樓神,到佢真有需要時,真心出錢幫一幫最實在,咁樣大家也舒服。

親弟隔日whatsapp留言兩字 " 感謝",做兩兄弟真無乜好計,男人呢D野心照就ok。
自己前也借過錢比親弟,R太太也不知,事實上親弟有借自動有還,絕對是可信上等人。
今次一樣, 這是男人間不能說的秘密,費時女人多事。弟會分50期還,每期一萬,剛剛好,每個月做來比兩個細路小學的學費,足夠比到小五。


明天又北上,約了朋友在廣洲舊機場那5號停機坪食午飯,有機會寫下這地方,In 到不得了,自己試過幾次深夜零晨一大班人在這地方的bar處飲酒,深夜這地方也熱鬧到難以置信。而在大陸認識越來越多朋友,尤其後生那批,中港真是兩個世界, 大陸後生那批,個個也創業,至小開間淘寶店,充滿生氣,市場商機處處,大陸這個大市場,食到個餅一小部份,也就發到不得了。 希望,自己將來,能咬到一大口,咁就爽YY。




10月 09, 2017

R's玩物篇-威士忌

R人到中佬階段,以往自己生活圈子,價值觀,全幅心機精神及日常話題大部份均圍繞著"金錢"......總之就係發錢寒。

而當自己人生到了某一個階段,尤其有了仔女,財務根基能勉強ok,食住行無乜憂時,眼光及目標已隨年紀不自覺地有了很大改變,個人睇化左好多,對人生好多事及要求不再太執著,財自唔撈與否已沒太上心,自己有足夠能力,有了選擇權,可以盡量將工作變成"玩",不再只是為錢工作,希望能有PASSION,FUN, SERVE呢幾樣野出現在工作上. 咁自己就極願意一直工作(玩)下去,希望心態能越放輕鬆,而樂在其中。

自己人大看化左,尤其大病過(前兩年),不會因自卑而狂妄自大,自命不凡。 自己一向覺得做普通中庸之人最好,起碼有時身痕,行差踏錯用無人知,唔會有道德高地批判,行事亦唔洗下下比天下人談議論,總之 天外有天,叻人隨處有,自己做個普通人就ok收貨。 

剛踏入了42歲,中秋節與一班朋友及家人分別聚會,各也順手為自己慶生,更覺得有朋友及一家人團圓的"快樂"。 自己一家四口,一對仔女及在太太送上的蛋糕,最深刻,最珍貴。



返回正題,近兩年,嗜好漸多,開始品嘗及收集一些威士忌,尤其罕有少見的single malt品種。買書,不斷上網查,看展覽,買雜誌,逛酒鋪,入facebook威士忌收藏家群組...慢慢進入呢個幾過癮的男人威士忌世界。

因利成便,自己成日出差,外遊及有海外朋友,慢慢收集了一些幾正的酒款,尤其專攻Scotch Single malt whisky。同時間,有年份陳年的大牌子好酒,真的有其收藏投資價值,是品味與眼光的結合,

介紹自己近期幾支比較特別的收藏:

1.)Craigellachie 33年,全球1700支,今年推出,限地區限賣,市場無二手,無報價。
托人外地機場找獲- 2000鎊原價買到,約港紙21000左右。
此Craigellachie的 31年,今年榮獲最佳威士忌大獎,31年市現貨已罕,已升價幾倍。
Craigellachie33年屬限量Limited release,收藏價值極高。




Macallan - Sherry Oak 30年 - 買入HKD 19000 左右
此款市場越來越難找,特別是Sherry Oak,Macallan二手價硬淨兼年年在升。
但Fine Oak Triple cask這就不值收藏,其因不詳述。


SINGLETON 41年- 剛推出亞區GLEN ORD,41年Single malt,全球只出600支,香港慈善Auction拍賣比我投贏到,HKD 26000。現市價不詳, 酒序號碼是1 of 600 bottle,靚號罕有,收藏價值極高。



Highland park 30年 - 買入 HKD 7500 左右,


Grenfiddich -30年- 買入 HKD 6500左右


Laphroaig 30年- 免稅9折買入 HKD 8000左右

Balvenie 30年- 免稅9折買入 4500左右



一套花鳥風月機場版 - 購入價若HKD 23000左右。


另其它25年的whisky,scotch blended whisky及藍帶brandy,茅台等,酒款無咩特別,不咩寫。
近年開始,不斷研究搜尋不同Scotch酒廠的陳年威士忌,有些蒸餾廠出的有年份酒,飲一支,少一支,30,40年以上的,好多遲下要拍賣場先會見到,尤其停左產的Port Ellen,正如日本的威士忌余市而家去到咁癲價一樣。寶物收藏,時間過越久,將來越難收集齊。

另外,自己飲威士忌,都係一班朋友飲,Macallan 及Glenfiddich12至18年多,去Whiskylive展覽先有機會飲到好多30年以上的whisky。 回下帶,今年whiksylive,自己嘗到好多好野,基本上有30年或罕有的先飲,同老友兩條友下午—點入場,飲到7點已經醉薰薰,都幾好玩,好多罕有超珍藏酒款可以任我地試。










題外話, 細仔養左隻飄型虫(獨角仙), 對於呢類甲蟲物體,我老婆怕到震,但細仔偏最鍾意,無計,唯有同細仔特登去旺角買齊裝備新膠屋及木屑,滿足我細仔。



另外,家姐的私立小學上個月內部interview收生,百份之九十九會自動收細佬,細仔在擁有齊所有先天優勢條件之下,結果係我地預料之內"唔收",細仔佢既威力果真唔簡單,校長都認得佢。無計,唯有隨遇而安,可能呢間學校未必合細仔性格,你恨不得求不得,上天自有安排平常心。