10月 15, 2016

問題中年R

網絡裡,有過億身家的blogger兼願意肯分享,的確是絕對的難得,萬中無一。

坦白撫心自問,我若到了這個境界時,根本都太願講錢銀事,blog也會停止不再寫下去,因為一講就離地,經常講錢錢錢,人一以金錢掛帥,就會比人滿身銅臭味感覺,越有錢,正路就應越低調,遠離麻煩地方。

事實上,人生到了某個位,處高位置時,又點會忍得下網絡上的鍵盤戰士的言論批評。

有過億流動資產身家的人,若真實的話,尤其白手起家做生意那種,所寫的日常生活事最好看及精彩。因為這類Mentor,你人生未必能有機會遇到。

呢類人,對人生每簡單的看法,也是極珍貴好看,佢地講一句,勝過上"大師"理論堂1萬堂。


問題中年R所想知的問題:

1.) 有家庭仔女,教養前途升學及移民考慮?
2.) 居住,自住樓,收租房產香港海外的佈局?
3.) 資產類的分佈配置,各項的投資心得, 錢生錢的過程?
3.) 朋友圈,商業朋友,吃喝朋友, 親戚及親人的關係?
4.) 慈善公益的心?人生短中長期目標?
5.) 旅遊,興趣,運動,飲食養生?
6.) 教養仔女心經, 為下一代所考慮的財產繼承安排等?
7.) 政治及對將來大局時勢的判定?
8.) 營商的,對工作的態度?所擁有不同公司的架構組合?投資入股及控股等架設?
9.) 稅務法律事處理,合法避稅的心經及以殼公司持有物業的股權借貸力安排?物業長命,分權契及信托之各考量?
10.) 宗教信仰,心露上的內在信念?成就感?
11.) 對"錢"的感覺,擁有一千萬,一億,十億時各階段的真實感覺?仍然覺很窮未夠?
12.) 對"女人"的感覺? 好勝,征服感,貪新鮮,好玩的控制?

寫出一大列我對有過億,過十億身家的人一大堆好奇問題, 坊間根本無書可教,因為無人能天馬行空創作答案,唯有當時人,有親身經歷過的人,過億過十億的人才有資格講。

而事實上,坊間有資格的多數唔太願講,無資格講的,泥菩薩就搶住教。

曹仁超(曹sir)是當中一個最有資格,又肯出書教人分享待人處世的智者。他離去了,後來開始已無者。 

我呢個問題中年R,希望坊間將來有能肯出書,可以一一解答我這就好。

幸福快樂富足的人生涉及一大籮大範疇領域的問題要解決與妥善處理,缺一不可。家庭,親情感情愛情友情,事業成就,物質與心靈滿等各種造求與平衡安排,

人生似一隻機械錶,要美滿,所有齒輪要精準裝好才能運行無誤。而錢是一種必須最主要的能量"動力",令隻機械錶能自動上鏈而生生不息,運行完美地準確報時。 

唔明?上u tube等下機械錶點自動上鏈,點日月報,點萬年曆,點陀飛輪就知每一個微小齒輪的重要性,天工到嚇死你。



10月 01, 2016

我要繼續撈之路一

抄襲亞blog友70後兄先,轉個角色,開個我要繼續撈系列。

公私兩方面也開始忙,
私事上,細路開學兼大女要報小一選校,逢週未也有講座及面試要陪去。 其實現幼稚園一條龍的私立小學已取錄了大女, 但當然照參加大抽獎津校派位,Anyway, 平常心,有書讀就ok,自己細路沒有什麼起跑線要贏。

公事亦開始忙, 有不少事要處理安排及進一步計劃。又係果句,講多無謂,行動最實際,完成左落實先寫多一點。

總之,自己開始將工作當成去玩,公司當成遊樂場,越忙多野搞及消耗精力能量,就越睡得好及甜, 乜鬼都唔做,太hea無所事事,做湊仔公自己知就一定會出事,會受失眠困擾。 

R賤骨頭?係,唔停得,一停下唔跑,就成個人死狗咁謝曬。

呢個係我最貼身的感受,無錢時想一賺夠就唔撈去玩鑊勁, 到你有條件真可以去試下玩兼唔太撈時,原來這又未必係你最快樂的生活狀態及理想模式pattern。 

始終,男人要工作先有寄托及男人味吸引力。 
人越大, 成就貢獻才會留芳後世。

講開錢, 自己亦開始返按D磚頭,第一個過幾日就完成,將厚到爆的樓契交律師樓送返入銀行代保管最安全及有Jetso。 

今年評稅單亦收到, 稅就要硬食,無計,因要用,才能陸續再番按其它磚頭兼備留強大的借貸力。

返按套回的現金加上2017年頭工作花紅收入,自己現金就會去到一個頗高的水平,可以涉獵的目標會更吸引。

市面勁多吉鋪,自己亦開始八卦鋪位仔,行街最鍾意影鋪。最近 坊間時不時有某人成功大劈價買到細價鋪。將來若機會,天時一到,自己一樣會拿住關刀去大劈試價買細價鋪,Anyway, 到時做左先講,現就食花生收集資料數據。  


股市上, 自己有一點股票持倉, 沒太上心,升升跌跌格局,因自己注碼放太細,狂升時我的倉亦成不了大氣候。

2016年10月,自己基本上是處於全軍防守,已完全停下磚頭股票及所有投資,只不斷提高現金及整備借貸力及備用額.....。

Anyway,越平常心看待錢,可能收獲越大,努力工作時得閑就做多D運動,最緊要健康,食得到時睡得好。識多D朋友開group吹水,也是一大樂事。

香港有錢的人多, 無錢的亦好多, 有小小錢的重多, 無錢扮有錢的亦唔少。

都係果句,處任何位置,自己也最緊要及時行樂,自己後生窮過鬼時一樣溝女,狂玩,旅行及放縱,現在一轉眼40歲,結左婚有細路,好彩後生有癲過,唔係而家就出事,變張致恆個個細佬周永痕上身。   

坦白講,我都好痕,但我唔敢!!
電話一響, 兩個細路:"爸爸,你幾時返來,我好懷住你呀."
聽畢,乜痕都消滅曬,快D返屋企好過。 























9月 17, 2016

R的鋼黑 IPHONE 7plus; 128GB

屎忽痕,昨日中秋假期跟太太出旺角行下街,先達附近場面鬼咁people mountain people sea,原來係Iphone7首開賣,果班港陸炒機黨又出動去搵下錢。 


大老板,即R太太,當然無興趣去入迫人做沙甸魚,而R就好有奇趣八下I7究竟乜料? 

率先入先達, 好似無以前咁癲,D收機佬回收貨無咁大座山咁,望望下,部IPHONE7 plus黑色機又幾靚仔,R都想買部玩下,便問大鋼黑128GB7 plus幾銀,先達佬開我賣 9500....。 

好!去第二間問下,大黑128GB幾銀?又開價要我HKD9300
Budget OK,反正自己用部3星大Edge已經有D厭,兼唔太想再用3星呢個爆炸品牌,想即興買I 7用,比炒價人賺2千幾,好!照殺。

去完ATM拿錢,又去問下盤踞百X匯門口班大陸仔街走鬼街邊檔,有無亮黑I7+?全城無貨。咁鋼黑7+128GB幾銀? 開價要HKD 9400.......。

正當準備付錢之際, 身邊有個學生哥出現想放I7+。
wow,是我想要的128GB 鋼黑,個大陸仔收機佬拿起計數機,打出8350。 個學生哥一望到呢個價,就即快身閃人唔賣。

R見到,當然 跟手幾步後,拍一拍果學生哥膊頭,道明來意想買!想買Iphone7鋼黑128GB,即他那一部來自用。問學生哥想幾錢賣? 學生哥好堅決咁話,我要8500先肯賣! 

R笑一笑,OK成交,deal done。
跟手望下佢張買機單及查一下個code及包裝無問題就付錢8500
咁就將鋼黑128GB買下。

晚刻將Android D料過去IOS時,而家簡單好多,有個IOS app專用去過contact list,相,片。 除左whatsapp記錄要另外買software去轉之外。 

話口未完,部新機放在櫃面wifi過緊資料時, R細仔又要八卦,一攀櫃手一拉 ,部I7就飛落地,部機幾個鐘內,右角已有戰績。 

細仔佢今次知驚, 喊住話好對我唔住,整壞爸爸的至愛,Anyway, 當然教訓左佢幾句,同佢講一大篇道理後, 跟手同佢講,爸爸至愛係"你同家姐",唔係呢D手機。 聽到R咁講,佢不知幾sweet冧爆嚴咁kiss R。

話時話, 收/炒機佬做我部機I 7 plus,一手收開人8400,一手賣我叫9400。每部執一千差價,一日做百幾部買賣就一定有,日執十萬,唔怪得之咁People mountain people sea。

後記**  Iphone7除左個 home鍵設計,按下感覺有D怪外,其餘整體,一樣例牌係好靚及正,尤其影相。 

R對三星真係失左信心及不再支持這品牌。好簡單,Note7及S7的香港銷, 我想無乜人會咁百痴,買新機要擔心安全,明知其它地區已經常有爆炸,重去買及相信香港區的無事。站在有要求的用家立場,Note 7及S7 ,三星整個系列可以宣佈打柴。 





























9月 16, 2016

中秋團圓,重遇我的沈佳宜

昨夜中秋夜, 一家人齊整健康平安食餐飯,簡單就是最開心。

每年中秋新年R也會回到自己這自小長大,位於沙田的某一公屋村,最近特別入場去看"點五步"這港產小制作電影,忽然勾起自己對關於沙田很多的童年中少年回憶...

回到母家公屋, 房間擺設一切依舊,一對仔女攀上那張R睡了不知多少個年頭的上格床,感覺極特別,時光倒流幾十年。 

很小回這沙田公屋飯聚,基本上一年兩次,其它的多是在外食飯團聚 。回這公屋村,帶細路去公園中秋賞月.. 短短幾個鐘,R就碰見很多兒時的街坊,包括一些也是回家團圓的舊同學朋友,包括那些年,在R中學時期的班校花靚女K... 

佢無乜變樣,大家一碰到就認得,當然互相交換電話,一別原來就是二十幾年。 深夜回家, whatsapp send相來回講下近況,當年很多失聯的朋友(中五時離校的),幾分鐘內一下子就全部找回。 

女同學一大班,基本上嫁人生仔做太太, 另一大班男的(中五已離校),發展就無乜特別,一般工作一般香港人。 而R現8個死黨同學朋友,原來就在她們一班舊同學眼中很特別,出名及勁爆,不用講也全知道老友的名字,原因是大概流傳及知道R這班朋友現今的工作,除了R最無出色....哈哈。 

R的老友W是警司, B是助理消防區長(3粒花),J是某一IT的GM,老友M是上市公司的行政人員....(除了R)。  先前試過,有這些女仔舊同學的老公是老友J低幾層的下屬伙記,這女同學特別打給老友J托付請求好好關照她的老公...真搞笑。

呢個世界, 一份高薪厚職,得到的榮耀,係一般小茶飯自僱人士不能享有的,只能葡萄。 Anyway, 舊朋友一碰見,時光倒流二十年, 學校生活彷佛是昨天的事。 

所以R及太太為仔女選校,一定要男女校,有那些年的回憶快樂好多。最基本,R的仔,將來上堂悶悶地游下魂時,望落操場,見到班女仔跑步時有野彈彈下,絕對賞心樂事,明白佢老豆R點解咁堅持要比佢讀男女校。讀書時的一種快樂,就是溝女。

R見到不少街坊, 當年的中佬變成亞伯,細路變成老爸,包括R。另外, 公屋D車場泊既月租車, 正過R架7人車多多聲,真係識享受。 

掃把佬,Toyota Type R ,Skyline GTR, X5,land rover evoque.... 唔知以為我去左嘉享彎。公屋村時租位就真好缺, 全部要泊露天, 有蓋的位全部變成月租,真係無良。

話時話, 好多年前開始,R逢見到舊同學,不太熟的,為了費時解釋及無謂多講工作及收入近況....,問親R,自己例牌答"剛剛失業,找工中", 住什麼地方, 例牌也是沙田那公屋村照舊無變。 久而久之, R就變成了流傳她們口中,是常常失業,困住公屋的廢男.....。

校花K昨問R近況, R已有改善地答:"千山萬水,終於剛找到一份文職長工了"。 哈哈

記得當年中五考會考,R由細到大,中一至中五直至考校內mock也是超廢類,到會考放榜,拿住張成績單夠分兼有突可以原校升讀form 6時,根本無人相信黑馬R能殺出,咁先好玩。

工作上,一樣講多無謂,當自己將來到達某個點時,切實完成目標時,相信無人會估到R呢個流傳的經常長期失業男會係咁樣,咁先過癮....。  

校花K,曾是當年R及這一班朋友中,覺得索到dump一聲的沈佳宜。有無追過,有..想過...但知道一定會食檸檬就慳番無出手,保留樽鹽及將失敗的戰績次數減少一回。 而這純真回憶想起也總是快樂....哈哈。 

另,費時R太太有日知道這blog時八卦看到。發段聲明穩陣D 
" 本人現最鍾意深愛的,例牌一定絕對係R太太,並無虛言"。

*特地說明,我不是柯震東,我是那件最唔起眼,縮超對腳的四眼仔**  








9月 13, 2016

青山走販

呢期仔女大D,講得佢明聽得懂道理,易湊好多,自己開始有番D晚刻私人去蒲放題的時間。

話說呢幾年,兩個細路剛出世,老婆湊仔應付兩個細路真係唔簡單,所以晚間自己盡可能也留家幫輕佢,同兩個寶貝多D親子時間,始終父子/女的感情建立是長時間點滴積累下,過後無得你比錢去買"愛"的感覺。

上星期講開會blog聚,現找數,補回寫下這快樂事。

上星期四,有青山走販,即R的第一次出席blog友聚會,不詳述內容內文了,始終有點私穩好。席上多位blog友,其實各也有自家一套心法思路,彼此有不同但能相容交流,每人各有特長優點,情節好似X men武林大會咁,各派長門聚集I Square飯聚吹水。


出席飯局,純交流吹水。能看到不同的人,發掘人家優點,席上最年輕的Calvin及Rex,絕對是寶玉,機會日子一到,光一開,成就不得了。

其它人當然一樣身懷不同的優點長處看法,各練自家神功。
而麻甩佬最開心的事,除左溝女得米之外,莫過於認識一班積極、樂觀及能有益能令自己進步的同道戰友。 


飛鳥的友善親和力,止凡的氣度與量度, Rexh的沉實穩重,Rex有智慧而內儉,Calvin年輕而才華出眾.....數之不盡。 而R即我的特點,可能就是面皮夠厚。 

我相信隨著時間日子越久,呢班blog界朋友,絕對均能到達他們的財自目標。而一大班麻甩佬飲住啤酒聚埋風花說月,講錢講些個人想法見解的確是極其過癮的一件事。

香港地人人為生活前途錢銀煩惱,要認識岩玩同channel的人很難,搵錢係緊要,但識尋開心及快樂生活情趣更重要,酒逢知己千杯少。有錢時又有良朋玩伴,快樂程度會幾何級x上去。


講開朋友,真多謝死黨H,千山萬水交托剛遊日家人幫R買下支響30帶回港,真多謝!計25萬yen即2萬一支唔洗,咁難得R現有齊花鳥風月版響(17, 21及30年),幾大影張全家福先,超正。

老友H原來也是止凡粉絲, 但唔知R就是他身邊的死黨知己。 或者有一日會看到這些相熟的情節而發覺R,咁就搞笑。

**為免比人條網上取相商用謀利,加番個水印先**


R's 的珍

呢套花鳥風月版的響有咩用?緊係用來飲勝佢! 
等將來有一件超大的開心事情時,例如R身家多個零,
就全部即場開曬佢同班朋友cheers飲勝佢...哈哈,我話既!






9月 08, 2016

9月近況 - 股市快閃黨

這一年開始減小工作日子,以"玩"的心情工作,有時間就寫下blog講私事,得閑又寫下my飛佛興趣"賺錢"。

先講工作,開始籌劃定立公司三年的中期目標,希望一切順利!若成功埋位,構思能順利落實,將來或有機會令自己踏入另一個舞台及層次。Anyway,為自己工作打併最開心,做得出色的獎勵,就是身家暴漲。


講下私事,近期逢週未就比老婆捉去聽小學講座,好神奇,小學個禮堂特別好眼睏,睡得特別甜,遲下將自己睡房加入呢個元素就無得輸。

講返正題:投資,先講金;講 黃金,現金價為 USD 1353。自己持的實金也有點賺頭,世局無咩大事件,但黃金漸受世人所關注,世界玩緊一個印公仔紙遊戲,這signal不得不叫人警惕,持有實金是防守性一環。



股市方面,前陣子用了很少注的資金(約八十萬), 開始買入這一年跌了很多,剛看似喘定的3隻藍籌,聯想,中石油及中人壽。

資金很細細注,買入原因是純4折執死雞博彈,現到了價賺了點錢,今又開始沽清中壽,到價就會陸續賣走其它,並寫下作個記錄。 


呢期股市就去到2萬4點, 好多人回到家鄉or剛進入賺錢領域,
陸續多了很多人入市買股票,都係果句,平就細注執死雞, 有唔妥就閃,自己今日閃左D。 

呢個時勢, 自己放入股市的錢佔很小比例,做股市快閃黨,快出快入賺到些買菜錢。就算好彩起到double,賺盡也是一百幾十萬的事,這數額對自己整體身家暴漲正面影響很微,對股市現不太上心。

資產配置方面,舊錢越大就越考心思, 雞股二三線爆升股不能買,一日成交幾十萬都無,資金人左無得走。要平衡比較大額點數字的財富配置,最叫人能安心的始終是磚頭。


樓房磚頭:
2010年開始搞下買下賣下,現剩低的全部磚頭工廈車位...已全沒欠按揭,樓契全在手,租金個個月全淨袋。而上年尾120萬買入的大車位,一年未夠,最近附近有個細車位也成了160萬,夠曬癲,無計,市區真係極缺車位,遲下一張牛肉乾420加至1500時,月租、時租車位就變得更必須。 

現在違泊罰420,有免費泊車有時也費時行,厭要上上落落麻鬼煩。唔阻人的情況下我真係經常貪方便隨街亂泊,若罰千五,我會乖乖地守規矩,真衰格。係,我認。


其中1個單位份契可以厚成咁


R's的私人樓契, 勿轉載

計至下一年, 自己手上的現金會到達更高水平,若加上工作的收入,來年會上滿更多子彈。

數額越大,越要小心時機,你錢多時,通街一樣水浸,樣樣炒貴。只有耐性等逆週期時大膽做,才有機會身家追多一個零。

買資產收簡接收入食息去財自, 自己開始停下這動作, 呢個時侯唔貪食息,賺價大過天。

人真係唔會滿足, 自己開始也以食息財自為目標,但現在若真有得楝,何妨一試,等機會向更高的領域進發。

近期樓市又癲過,自己也是樓市既得利益者,但D樓再咁升
法, 班後生根本無前路可走,唔反唔唔暴動就奇。呢十年,樓癲狂咁升法,真係創乜鬼業都假,自己辛苦做生意仔賺的錢雖然也可觀,但對比買樓收租就輸一條街也是事實。

香港地,創業超氣餒, 我自己做生意仔高難度,高要求兼辛苦到嘔泡,但回報未必絕對有,相反低智慧傻QQ,低難度,亞嬋地盤佬文員仔只要食正條水,買下樓收租咁就可以成功人士自居,這就是現在的香港。 而我選擇食兩家茶禮,兩瓣都玩。

順帶想講,銀行呢期水浸兼平息,自己心思思開始籌劃去加按返按D磚頭,包括自住樓,一套現,個現金水平就暴升,但資金也就處於全閑置輸息的位置。

細路大左,湊仔表現良好,上頭批准,R開始假釋放監有假,有返晚刻的私人節目,今晚約了些blog友飯聚,同道吹下水,下回有空再寫。







































 







  











































































































8月 13, 2016

R's 日記- 風花說月

今年開始一星期只4天半工作(或更少),總之每日也是玩住心情回公司工作, 坐得耐屎忽痕就 閃人,尤其暑期,兩個細路好多節目活動,R經常也負責做司機,下午車出車入。

多了寫blog行文, 隨意隨心,風花說月,亦開始整理版面, 多年寫blog一直沒太留意上心所謂點擊率,多年累積下來,原來也有十幾萬點擊率,更新header 留底email , 整埋個保良局,奧比斯link.....比越來越發之人去立下品。

開始收到很多私訊電郵, 原來暗暗地有咁多人做CD rom追看R's日記,自己以往的經歷,很多也是現他們的境況困境。 情況極似時光倒流後生的自己。跑一百米,人地條起跑線已經比我前20m,而我係向後退多10m兼負重磅去跑一百鬥快,死未?

路點行無得教,總之逢山就開路,遇水架橋,整到黎就食, 屌那聲,頂硬上。

太遠的宏志唔好想咁遠先, 先開源,賺搵多D錢,溝條女平衡下(有另一半好緊要),錢逐小儲到某個位,就小小獎勵下去下兩個人去下旅行。 人生活一開心就自然有運行,條路越走越順。

自己過去不如意的事,多到數唔清,人窮甩拖入醫院...........大多了,無謂提唔想記!

失意日子無乜去記,人人都有,過渡左就會變成搞笑回憶。
反而開心的時刻,要記住果種感覺, 令自己快樂常伴。

自己寫文,好似對住空氣,白紙黑字寫下去整理腦裡思緒及為自己制訂將來的行動。有得著幫到迷惘的人,總算此日記有點作用。

R最怕此blog裡湧現討論區素質的盲流人士,亂衝撞入到訪此blog留下無意義,純發洩侮辱的留言。

此blog試過有人連R仔女也辱及(給我網上閹X左)。坦白講,現實中,你侮辱人地屋企人,屬死罪,我一定癲能左咬住你唔放,跟足你幾十條街,去到暗角位就熱情歡迎你。無好似網上咁爽,有人可以隨便比你惡毒侮辱。

你話死未,若果成日疲於招架呢類臭口留言, 人都癲。
最近見到某個blog 講Reits,嘈到面紅耳熱, 激過城市論壇,開心分享事變成苦差,真心怕。

些刻,自己應該會少D講投資,靜靜做就可以。 相反上天下海風花說月題材多D是,好多野自己心知亦想講。 尤其反傳統一般所謂的知識。

正如止凡講的美國登月球事, 教科書及NASA話你之的月球同真實的月球係兩回事,自己search 下Moon Secrets就知道有幾精彩,看下Apollo 所有的footage ,尤其13號點解爆炸。
了解下美國點解唔再登月。

世界好多事,解釋唔到就用教科書去欺騙人,正如話金字塔係埃及公元前3千年起。(R親身去過埃及古夫全字塔),呢D金字塔,對準所有日月星宿,幾何方位由內到外所有,你知得越多,就越嚇死你。

就正如馬航客機失蹤,你信係失事墮海,定根本個答案太震驚,唔可以公開講,會引起恐慌。又正如若果有人信美國所公佈失業率,中國的所有經濟數據債務等,咁就自求多福。

所謂一般常識,認知事實未必是真理,正如而家坊間統計一般認為Hillary Clinton選總統會贏,我投相反。

正如股市好多人開始覺稍後喘定,話牛一喔,我投相反,股債我全部遠離。至小一至兩年的短暫遠離,點解? 因為怕死,無大志, 我人比較蠢兼細膽。  

下篇有時間,繼續風花說月,補寫前一篇講打拳運動的樂趣。

















































8月 12, 2016

宅佬生活 - 運動日

星期五倒牌放半日假, 打下拳做運動。 R打泰拳從2011年至今, 學下玩下忙碌時就停, 跟私人泰拳教練學。

打拳好玩易上手,但要精就好難, 出拳踢腳看似簡單, 亞叔街邊爛仔唔教都識,但其實有好多學問。

看似最簡單的左右直拳,要打出快而有力,有速度中焦點,有爆炸力及穿透力,即對方中左會超痛,力無得御走,可以knock out人的又重又快拳就很難學得精。 要有氣打幾分鐘更難。

 打直拳是全身的槓杆運用, 力是由腳發,轉腰膊出拳,再收緊前臂握緊拳頭,突加速爆入打中目標后收拳,拳先可以又重又快又勁有穿透力。 出腳一樣,要整到成條鞭咁堅,大有學問。


有機等下再寫這個R超鍾意的興趣- 泰拳。
-----------------
待續  

補寫打拳: 先欣賞60kg級,現香港打泰拳,其實有個好堅的大師級拳皇"吳景聰"。瀟灑的左右庄拳腳組合多變化兼威力大,打贏好多出外的比賽,其實佢已經好出名,相信會越來越出名。講多無謂, 欣賞下何謂超班。 

https://youtu.be/RdiiW9TJ78o



十年唔逢一潤,無線終於有部幾好的電視劇城寨英雄(雖然個場境一樣咁雞同cheap唔make sense),但部劇的演員真係加回分數,R首都有追看。 

講開功夫,百花百門, 先看空手道對泰拳。 黑帶食泰仔一拳一腳,牙都被打爆埋,即收檔。 

講K1 fight, R最鍾意Badr Hari, 由2006佢排仔比Peter Graham 一腳knock out開始進步,開始打遍K1無敵手兼復仇成功,打到Peter TKO,外號bad boy badr hari。 

09年KO德國巨人 Semmy schilt超正。去片

待續............

8月 11, 2016

第一個工作上踏屎的故事- 下

昨回國內搞左成日忙完一大餐,今日得閑在公司hea下先,繼續寫埋第一個踏屎的故事。

------------------------------
星期五收到個claim notice,經歷48小時又癲又嬲又失落,星期六日有女朋友(R太太)陪住我去下街放松下心情,但星期六也是痴痴呆呆咁失魂落魄,個心及腦全是想著星期一個戰場。

睡醒到了星期日,自己好像突然開始開竅,轉了一大輪牛角尖,若按常理做法一定死硬輸硬,星期一同條X街辯駁一定無運行無結論,贏啖氣發洩屌完就一定輸左舊大錢.... 

只有以最高的EQ,智慧及忍,把怒火壓住,才有生機。 

星期一中午,正逢中秋臨近,下午茶時間,R在觀塘買了一個兩舊水超靚的生果藍(無月餅),自己親手送上佢公司。

無錯,係做死狗!硬功死硬,唯有軟功。



去到賤種公司,大纙大鼓咁花枝招展入佢房,一見面就進貢朝拜送禮,以最謙卑死狗的語氣道歉,向(賤種)問好,求教,讚佢,吹捧佢呢位成功老闆,求佢日後多關照R,最重要現放條生路比R, 小弟必日後追隨效命聽其吩咐號令.....。

忍辱加上演技, 最終搞到差唔多要同賤種結拜上契師徒咁款,R亦主動開出賠錢1萬給他的offer,賤種當然say no,但又見R呢個徒弟咁盛意拜師學藝兼屬可造之材,拉拗一番,結果扣2萬幾成交。

在R幾十句多謝感激之後,賤種簽名改單,R即飛身去佢會計部, update張claim notice,收過張票, 再去道謝二撇雞就閃落去銀行入票。 由扣12萬變扣2萬幾,埋單計執身彩兼有點錢賺。

R亦由前幾日死狗死樣,變身回復陽光男孩。




過多幾星期, 有新job出現,撇雞老闆天真地打比我呢位新收頭馬。

好記得女朋友(R太太)亦在旁行緊街, R用中等既聲量,搵個最佳靚位置......就以機關槍速度,電話裡用盡所有助語詞,粗口,最粗俗的說話,將前忍下吞住的屈辱十倍爆發,盡情X爆佢呢條X街,講明永不合作,有日我風山水起,佢個X街就一定無運行,山水有相逢,咁樣蝦九後生。幾年後,仆X間公司當然執左,人去向未明。

此往事情楚記得,不是小氣記仇,而是難忘的第一鑊遇賊。
遇到生意老千,專食partner錢的賤種無恥中坑。 就算再見面,我真心會笑住口問候關心下佢,當然加小小助語詞無得避。

26至27歲仔左右,就是經歷了這, 知道(手心)即比錢就係客, (手背)走數的就係賊。

R從此收數追款,很小壞賬, 點解?上人公司第一件事跟同事聯誼熟落之後,就會問有無準時出糧? 若果成日遲出糧, 即可以放棄合作。

老婆的舊公司就是這, 當年去R太太公司收貨款時,成日話會計未開票欠簽名等...,收唔到數,R當然跟手笑住問她公司有無準時出糧比佢,當時的R太太就cool爆so都唔so 我,話唔關我事,連水都唔比杯我飲。

由追欠款,上得佢公司多食白果無票收,坐下聊下,結果R忍唔住破例, 果刻追女緊要過追條數,咁就將請我食Lemon的靚女私有化。

私有化左之後。 咩話!先知道太太舊公司連MPF都漏欠供幾期,成日要靠賣LC比銀行取做backup loan去過渡,數冚數。 

結果,R即趕緊收數,並通知自己廠,以後太太舊公司的order,樣板即取消,所有佢公司fax可以全掉落垃圾筒不理。
當時R太太亦即辭職轉工,正式與R光明地拍拖,

而那位靚女就變成而家成日要同細仔鬥智鬥力,癲左咁濟的靚師奶。 


從此有無再踏屎? 當然係有,鑊鑊新鮮鑊鑊甘,數之不盡。
多年後的一劑大單事件比較深印象, 是近30萬的claim,
最終埋單被扣23萬。 但overall仍是有錢執,扣完淨袋仍有70萬左右。

若醒目點踏少D屎,這又是一單淨袋過百個的小茶飯戰績記錄回憶。 我的第一個踏屎故事完。 






第一個工作上踏屎的故事- 上

閃電寫左自己第一次食到小茶飯的故事, 當時的確係開心到狂叫亂跳,痴Q左線,幾個星期,無論去到邊,何時何地,自己成個含春樣,個嘴角永遠笑咪咪,一早刷牙又笑,一個人坐住巴士無聊時心一想起,就又含春咁既樣暗暗笑。 

當時女朋友(即現在太太),也真心替R開心,當然理解R點解會咁癲佬上身,因為R先前踏屎踏得多,食左好多啖屎,終於一鋪就守得雲開,賺到成袋沙糖走。 

記得當時太忙沒時間買女朋友(即R太太)生日禮物,那年送了一份最簡單實在的禮物 ,一萬銀CASH給她。

這是事實,太太亦老實不客氣,甜到漏即袋,去還清佢仍欠銀行的分期借貸。(當時太太被佢大佬哄騙求,最終去銀行借了2萬幾幫佢大佬還街數卡數..)

老婆的大哥,當時真是極品, 太太唔追佢還錢,佢又唔會主動去還, 一開口追,就發爛jor鬧若再迫佢,佢就一定唔還。 總之,簡單講就係無得還。"註" 現在這大佬結了婚好像生性了一點,當然至今這條仍然是爛帳未還..哈

工作上踏屎的往事極多, 比人鬧真無所謂, 最痛苦莫過於- "賠錢扣錢",(往事有點長) 

R踏屎的第一單(yahoo blog時代提及過),記憶中是2002年, 成單job收13萬,成本9萬幾左右,R可以執4萬銀..大概,這是R第一鑊遇到老千仆街賤種老屎忽的事,當然刻骨銘記,連佢姓"蕭"係咩樣而家重記得。

在星期中,出發票佢公司結帳,星期五6點(好記得), 收到佢公司回的電郵附上一張debit note/claim notice,我屌,扣我12萬幾,成單job白做兼要嘔突賠7萬幾比供應商。 事實上我無做去錯乜,佢擺明食我入我。

賺+4萬幾同賠-7萬幾,是天淵之別,對當時剛出道,仍身無分文的R來說。 記得是星期5的6點, 因為一收到,已經回電佢公司放工但已放工無人聽。

慶幸就是這星期五的6點, 讓自己有兩日回復理智想辦法。否則,以自己當時的爛命低EQ,問心,R一定會即上佢公司,爛仔般橫掃破壞,同呢條粉腸二撇雞死過。 

那個星期五晚及星期六,心裡想的全是自己的論據,打算在星期一同佢去講理由,而最壞打算,就是最爛仔的做法...。
來回近12萬銀,對初出道的我來說,簡直要命,一鋪就收檔。

如何對付呢個仆街賤食屎的9? 老屎忽已經絕對唔係第一劑食人,佢連自己員工也搞到要成日去勞工處,發惡爛仔真係會怕我咩?有用咩? 若反台連果一萬銀也可能收唔到....點算???.....點算?12萬銀真係好多,星期六呆住行街, 見到乜就將除同12萬銀比, 當時rolex幾皮就ok,我屌,可以夠買3隻有多。




* 這是R's往事,不是小說, 內心說話絕對滿有粗口*

太長,下篇再續寫。






8月 08, 2016

第一個一百萬的故事

我的第一個一百萬。

認憶中,賺到第一個一百萬港幣,時間應該係2003年沙士前後, 即自己28歲仔左右。亦是自己由細蛇柯尿,即最多經歷5個零數字的眼光,英文寫開最多為Hundred Thousand,第一感受到咩叫大蛇柯尿,6個零數字的可愛,擁有自己第一個港幣一佰萬,英文第一鑊有能力知咩叫做Million。

第一個一百萬用途: 在03年尾,用了六十幾萬比首期,即大部份去買了自己的現自住樓,其餘留底搞下裝修買下家電,工作上在廠再投資買下機器,咁就用曬清倉第一個一百萬。

第二個一百萬,隔兩三年即05至06年亦已能賺到。用途大致在結婚時用了大半有多。香港及飛去外地影下結婚相,比外家禮金 十幾圍酒席等及擺酒的32圍酒席及結婚所有開支,亦全是R自己一個人負責。 

印象中,06年結完婚,買埋自住樓的車位比十萬首期後,身家又係剩低5個零,十幾二十萬左右。  

人生兩大開支:買樓+結婚,就將R的第一及二個一百萬蒸發左, 在無父母幫及R單拖情況下置業結婚。 而這兩個一百萬,花得絕對超值! 第一買到現在已升了近4倍的自住樓及最緊要娶到一個又靚又好的老婆,即現在R太太。

R最深印象是那年2003年親手收到一張客找數的支票,銀碼是140萬左右, 扣除約70幾萬找比供應商廠家成本等,這一個job,R花了近60日所有奶力去完成,2個月留守國內跑足整個珠三角,埋單計私人可淨袋60幾萬,那時是戴住口罩的沙士時份。 

記得客戶公司在大廈的3樓, 收了這一百四十萬支票後, 步出客人公司門口,自己雙拳緊握,心已經忍不住想狂叫, lift也等不切,行樓梯落樓,一邊跳一邊叫,癲佬萬子良上身,
同人地奧運奪金一樣, 震臂高呼,咁大個仔,第一次食到小茶飯,當然失控失態。  

可能有人話R吹水,咸豐年十幾年前的事重記得咁仔細,答案係。 尤其在條後樓梯,行下跳下停下,揮下拳傻笑狂叫笑大跳的感覺仍然清楚,當時60萬對R來說已經好大數,因為是第一次。


就是賺到了這畢錢而直接使自己在2003年尾當刻買樓,亦在那第一年第一次身家過百萬。第一次買樓,當年計剛28歲仔。 當時市道極差,而自己能賺到點錢,買到荀野。

買樓結婚,基本上這兩大開支就放清了R當時的血。 無計, 香港地男人就係咁,尤其結婚,有人話,比小d禮金酒席,唔擺酒店,求其食一餐通知自己人就可以。  老實講, 有D事,若一世人你覺只會做一次,那就不要太計較,免後悔,結婚度縮數慳了,將來一定出事嘈交,相反錢將來一定可以賺回。

第一個一百萬賺得快時用得亦快,慶幸是用得其所。

到2014年中,自己已經到達我的第一個一千萬(不計自住樓)。
一百萬跟一千萬的難度分別好大好大。

每個一百萬的階段會經歷好多人生開支,包括結婚買樓生仔保險...進進退退,賺到時又偏要放下血,每一個一百萬累積下來也很難很難很難。

當到達一千萬時,相反這階段就偏是人生最小必需開支的階段,因樓已買,婚已結,仔已生,亦已買大額足醫療保險。 要變出下一個一百萬事實上已不太難。 

本大情況下收下息加上收入高時開支細,跟本金小後生多開支時的要賺的每一個一百萬相比, 在錢搵錢下現每一個一百萬相對輕鬆好多,一定能賺到,只是時間問題。


自己是逐個零加上去,財富大道是以極龜速進行, 沒有神奇方法,由26歲仔發住春夢一直夢遺至今近40歲中佬照舊如是。  

到達8位數, 如何進9位數, 無人能教,能否達成亦無人知!天曉!日後每個向財自進發的人,也有他的第一個一百萬故事,我的第一桶金初夜買樓故事,記憶歷久當新。

若將來擁有第二個一千萬時, 自己會寫回39歲的第一個一千萬的故事,希望這文可以5年之內面世。要5年時間?咁無大志?係!最緊要安全,唔洗急。









  



 

 




  





 

  


7月 30, 2016

煩惱

無錢時,煩惱問題多就一定,無含住條金匙出世的人,莫財時所有事也有影響,自己後生時一樣經歷過長時間窮到爆的日子。尤其無錢兼失戀被飛,事業又失意時,真係孤獨地淚在心裡流。 

人到中年,財務開始平穩有積蓄及根基建立好時,其它過去未出現的新問題又會新鮮地出現。Blog裡寫自己的事,總是報喜不寫憂,無它,慘的事多提無益。

現實世界裡,根本倆者並存,取決於自己眼看放"它'有幾大。

R前幾年開始,突有失眠問題出現,嚴重時要求醫及服安眠藥幫助入睡。
難入睡問題係睡前個腦太活躍,太多工作計算策劃目標,想多了無謂的事,腦不懂熄制去休息致全沒深度的睡眠。

這些年看了很多睡眠改善的書,大概知道問題,人大了,時間睡得越小是事實,這也是自己近年常做運動的原因,目的幫助入睡。所以這些年,"睡得好"對R來說是人生一大樂事。以前見到其它人無時無刻在什麼地方也可以熟睡,真係幾葡萄。

現在R食得講究,雖睡眠時間少,但有深度兼質素亦好,總算解決醫治了失眠,感恩。

好多人會想,財自後不上班不做事,週圍玩快活人生。其實當生活規律一變,身心未適應,人生一失目標志向,漫無目的,身體心理會出現好多問題,"人心"會生病,正如"失眠"這問題自己無想過會發生在自己身上,有幾痛苦,總之難頂萬分。睡一覺好,是何其幸福。

寫blog,幫自己清空整理好多思路,寫出現實不能講的秘密,算是維持心靈上的衛生,只要保持了私隱,便能暢所欲言,能講志向,講財富,天文地理完教歷史,生活智慧點滴乜都寫一餐,包括自己對仔女的父愛。

一向自己只講生活快樂事,不寫"問題煩惱",其實也是自己性格,除"生與死"這兩個人不能控制的課題,人生中無乜大不了的問題,好彩計,人生得果80年多左右,執著太多就太笨。

睡前最好看書助入眠,不接觸電子野,搞下搞下,自己乜書都看一餐,睡眠飲食運動養生心靈理財投資旅遊小說天文電腦語言歷史傳記收藏品工具書,連戰鬥機戰略打仗書都看一大餐。

越發掘越情楚呢個世界,社會上玩緊的遊戲規則,越知天外有天,人外有人。

最嘆世界最享受的生活方式,人越大越明白,就是不為生計,做自己喜歡有意義及以連成目標為本的事情工作。

有錢無錢也一樣有不同的煩惱。不為錢愁,錢可以解決了人生大部份的簡單麻煩低級問題,而高級更麻煩錢不能解決的事,就要更多智慧去解決,沒能力處理,倍增痛苦。

各人的取向不同,自己也在摸著石頭找快樂生活的pattern, 無人無書無mentor,唯有自己。

Blog裡寫心事,尤其關於R兒子的上學生活事,讀K1,4歲的他,言行說話表現實在太特別及出位,總之百厭倒蛋到要老師轉介太太帶兒子去做評估,做那些專注力不足,過度過躍等...慶幸結果皆不是,全沒問題,結論百厭搞鬼係無得解,"性格"係咁。 

而不生事搞搞震扮鬼扮馬野時的兒子,是極得人及老師歡心,坦白講,他有些能力的確是出眾。但生起事端時,就同樣極奇難搞,學校出曬名是性格男,但偏偏又是校長最記得最錫的一位學生。 

有時開車接兒子回家,兩父子車裡獨處交談對答時,想起也搞笑,兒子同R談天說地講笑話,根本就係兩條麻甩佬的對話。 

Anyway, 好多人恨仔女贏在起跑線,要樣樣叻入各校。
而自己, 只要仔女平凡快樂健康成長,讀書生涯最緊要小功課,多D玩,普通學校讀書唔好包尾無自信就ok。小時了了,做乜Q。 


破例blog裡寫"煩惱"事,雖簡單輕鬆地寫,但事件感覺是超真實。因為有痛苦才會珍惜懂得何謂快樂,因為遇見曾面對,才有經歷。

R日記, 是自己的事記,一步一腳印記載自己有的一個春夢在追尋。








   









  



 



   

 

 



  
 

7月 27, 2016

整理個blog

自己寫blog, 過去出文類別又雜樂又亂,分類求其, linked一些bloggers也是隨心去做,沒什講究。 趁減小了工作越來越得閑,是時間逐小逐小整理個版面及slogan,就叫"R's 日記"最貼地。

現在自己寫Blog,不會單一成日寫"錢",當然"賺錢"仍然是R的喜愛的活動,既刺激又好玩。

而寫blog隨住年份越長, 一些由yahoo年代已經有接觸及印象的blogger至今,一步一腳印看住大家各自修行而身家累積。 有勁贏, 自由一千萬, 70後, 止凡,Rex, Ricky......不能盡記下

好多Blogger已越漸出名, 尤其止凡, 作為長時間的blog 友也暗暗地算沾了一分光,相信越來越多blog友,尤其已經有一定基礎實力的,只會越來越有錢。

由百萬至千萬其實無乜天大難度,只是時間遲早會達到的事,關鍵係最難第一桶,搞掂個開頭,將佢複制倍化就係咁簡單。

而坦白講,自己就真心怕出名,一暴光生活上無端多了勁多不便及限制,要時刻檢點提防,尤其R屬那類低EQ,火爆一嬲就會變無賴、生事者、惡棍兼爛仔(事實如是)。 明知自己的大缺點,唯有避得就避。

老婆成日話我,咁低EQ,人又牛精,生活要有咁低調得咁低調, 寫blog太私人的事不能提及,費時將來失言得罪人,成家被起底,網絡上鏟相唔鏟切相,一嬲就失言。

時代進步,網絡上要欺侮玩殘對手,起人家底實在太容易,尤其付點錢去組織下,就可以KO對手。對手越多私人料,就越好搞,可以無事生是非整鑊甘佢嘆下。

所以自己寫野常有大顧慮,不阻人搵食。不亂說話踢爆人地埋籠劏水魚, 更加不談政治觀及立場。

70後提及好多bloggers中,有許多虛神弄鬼,吹水怪。事實如是, 任何事大話怕計數,日久見真身,總之成日認叻無著數,網上世界天下無敵有幾難,現實中暗暗地開心享受每一日最實在。


網絡世界,勿太上心便是。看R呢個blog,老實講,寫自家日記,唔得閑咁無聊食飽飯無屎柯去寫假作小說。總之天外有天,人外有人, 貼地的凡人R寫一些中佬的4仔家庭生活。

自己開始有鋪收藏癮,自己喜愛的,一見到就二話不說付合理價去嘗試買下。亦喜歡了用時間釀制價值,很多物品,簡單如陳皮,R兩公婆也會為仔女一人一大箱制定收藏,似足人家釀女兒紅酒一樣,到N年後,給回他們。


行了書展兩日, 咁有緣見到水墨畫家陳蕙森即席畫的"志在千里"的一幅水墨畫, 在眾人圍觀過後,R厚著面皮懇請誠求陳先生出讓此駿馬畫 ,價錢不提了,總之R覺極合理,此畫稍後會掛在自己工作房內。喜歡就是喜歡,無得解。



老友明又飛去首爾玩, R一家今趟不隨行, 因太太不批准。
因要預時間搞好多資料為個女準備上小學。

講出來可能比人屌,但事實係,去旅行去得太密,真係幾辛苦。因細路仍細,去玩基本等於全天候湊仔,而享受的就是親子陪伴的一家人的時間。

今年應該一家人不會再出外旅遊, 除非二人世界,R就可隨時即飛。不過,以太太的母性,要佢放低對仔女幾日,彩我都傻。

這一年, 自己仍然是不投資,一於做宅男。

話時話,今日成街週圍見人捉比卡超, 真搞笑。 自己平時無乜興趣打機, 所以這"比卡超"唔係自己杯茶,無興趣玩。

但VR game, R就極感興趣, 在新加坡及東京試玩過game,真係唔講得笑,感覺超真實,驚嚇時會瓜瓜叫。

PS遲下會出VR,幾十年唔打遊戲機的R,到時也"可能"會破例為VR而買部PS玩下。







 









































7月 22, 2016

2016年7月東京之旅

剛日本回來, 一行12人玩到癲,食住行由R太太安排準備,
 
先放2張R小小收獲品的相, 今趟淨R也買了6對正野波鞋及收歸了2支分別17及21的響。 太太買的鞋及衫更多, 下回詳細寫分享下行程食物。
 
R帶子彈120萬yen去食及買,用淨20萬yen。一班朋友去旅行極開心, 個個買爆急而回。
 
唯一不足, 沒quota不能再買多支25萬yen30年的響。
 
日本才新出幾日的NMD的R1,在橫濱見到,每人每款限買一對,R—班人全部掃曬,超搞笑。
 
待續....
 



旅遊回港,帶住一大班細路累到爆,全天候湊仔,人多車站地方更加要小心,始終外遊,平安旅程最緊要。睡足10個鐘, 叉滿電再寫blog。

東京旅行,大人以美食為主。牛,蟹,拉面,魚生海膽...無乜好講,例牌貨蟹道樂,BBQ燒牛....




而最主菜就係這間稱有兩百年歷史的鰻魚飯"前川". Book 左間private room食午飯,費時班細路在大堂食嘈到嚇親班架仔。




午餐一set十幾道菜,掛著食唔影唔得咁多相,總之共埋單9萬5yen, 即7千幾港紙,都幾貴。不過人一世,物一世,貴貴都試下,又唔係餐餐食。  



在東京,今次去了超人館,跟R同年代的, 應該對上面呢幾套卡通有印象,R的童年回憶。

話時話, 旅遊期間, 東京有幾次強度至有感的地震, 尤其身處橫濱時,有朝清早仍在睡覺於時,R太太也給震搖醒。大地在震跳動的感覺,真係唔講得笑。 

有點不好意思也要坦白講,自己及好朋友們,去到東京真係爆買爆食, 入鋪頭一見到荀野就即掃,尤其波鞋,盒都唔要,老友們一樣個個買到爆4個急而回。


NMD R1, Ultra boost uncaged, Alphabounce, 全部新出正野,香港未必隨便walk in買到。 























 
 

7月 08, 2016

黃金與日元

投資項目及取向無乜好辯論,對於股市,越感到要避及閃。 成日唱淡乞Q人憎, 唯恐天下不亂, 最好就係不出聲, 自己暗底做,大圍唔like總之的說話多講無益。

R看好多大事回顧及歷史資料檢視, 尤其大災前一年的社會世界百事。煲係慢慢逐個爆,人接受平伏後,惡化再爆鑊勁。
而家有無signals出現, 自己觀察吧。 

寫blog, 純粹當日記記錄自己所想及現實中的操作,
本錢粒粒有血有汗,有不妥就要防犯.

R今年可以專心去週圍玩 ,工作上會hea一點,(而家暑假成日放半日假family day),投資路上也是勁hea。

賺錢睇機會,機會細有危險, 就收兵休戰。

最近yen及黃金兩隻黑馬爆升令自己逆市中資產帳面上增長,早前買下東京樓及實黃金,目的是對沖自己資產太過集中於港幣及公仔紙鈔票。 現在就正是發揮緊這功能,尤其實黃金。

R身家越多,就越不信任鈔票公仔紙,英國有千萬身家的人不少,若從不做平衡對沖分散,即只懂買英國樓,英國股票,身家全英磅計,一晚身家就大縮水,受創最深。若身家全部集中在港幣公仔紙計,他朝君體也可能相同。 

無乜錢就一炮過all in 去起double, triple。

有一丁點錢,像R這些貼地的香港凡人,就一定要分散平衡對沖,股票, 現金,不同外幣,香港及海外不同類磚頭,貴金屬,限量貴價的收藏品。點解R無買(債券)? 呢類極品不解釋,明就明。

重有最緊要的,就是要超低息去欠長命債(港幣計),咁就為之完美。點解有閑錢多重要借大錢? 明就明,不解釋了。

膽小系列第四回。

6月 24, 2016

脫定留

好緊湊 ,脫定留歐,今日絕對係歷史性一日。

早幾日, 所有人都話留歐無問題, 睇下點,等到下午脫歐派夠16.8m votes就搞掂。

有睇過 the great debate 裡 Boris的論點,知道英國人的處境, 自認叻的人從來也不甘心與懶人同台食大鑊飯,長期資助窮親。

現脫歐得票12.42m vs 留歐11.66m votes,差80萬票。
重欠4.4m票就搞掂脫歐成功。

按現情況,黃金同日元會繼續狂升到傻。
脫定留歐點都好, 平常心,做足準備防禦, 脫歐也不怕。

脫歐成功的話, 會係今年一隻black swan你估唔到。









6月 17, 2016

修煉

今年已4天半工作,多了時間,但近期少了寫blog文, 主要是很多實幹的修煉在進行中。
  
1.) 運動:   一星期三日跑步,舉鐵及打拳。
2.) 節食: 三餐有制 ,尤其斷糖,介絕所有甜食,對食物營養亦開始研究,要求亦越來越高。

運動加上飲食配合, 近期磅數已由178lbs至170lbs, 再輕10磅至160lbs,5呎10,BMI便標淮fit爆,R會比10年前更結實,爆肌大隻及後生年輕。

地產牌已有,其它的......很多修煉進修籌備及執行中, 不透露了,總知每件事,考到個牌完成了再說。多講無謂,行動最實際, 熟知行規,才能打破受制於人及所有迷惑迷思。

多了私人時間,看多了很多書, 不同類別乜都有,香港人口小,真係一本好書難求,唯有去Amazon或台灣書籍才能獲滿足。 坦白講, 香港地出書人不賺錢亦不賺名氣,根本無動機要人無私share,奉獻自家故事共享,尤其涉及錢銀資產投資,越爆發的故事越招道德塔利班攻擊。

講開投資,望一望自己資產表現,兩個字形容: 平穩中向上。
而近期在股市裡幸運地避免了坐艇,而同時受惠於黃金與日元上升。

現情況越來越像08年, 尤其兼逢奧運及美國選總統年...
好多signals出現左

普通人不懂去守護平衡財產價值, 面對突如其來的大轉變,改例搬龍門,不懂應變時會受創最深。

呢期多左好多財棍,認屎認屁,又牛又熊,追逐個種買菜都未夠的波幅利錢,真搞笑。

R老散一名, 非專業投資人, 投資取向及時機全靠直覺,靠現實中認知的世界去感覺,現是要做好防守的準備。全軍防守, 平常心兼玩住去等機會。

財棍話,市差時股民可以買入防守性比較強的股票類避儉。
R話避你老x,市差就乜春買賣都唔好做,簡單易明。

英國脫歐,好多人話放心,最終機會不大,5/5波。
真無人知,呢個星期會有咩催化劑影響,
但我會投脫歐! 無得解!
對與錯也好,至小要準備好這情況發生。
 






















































 











5月 21, 2016

朋友

近期多了晚飯應酬, 其中有位是讀書時的老友,已移民美國多年,剛回港,一班兄弟就又再齊腳聚一齊。

R一直有一班死黨(約10個益友),一齊讀書會考alevel再各自u grad,工作溝女結婚生仔。 這些朋友飯聚,無工作上衝突,嘻嘻哈哈,最能交心兼 暢所欲言。


物以類聚,真的有道理,合價值觀的友誼才能永固。
40歲已有家庭的中佬世界, 很小講女人,因已無乜婽想春夢,總是是講車,旅遊,運動,健康與仔女。

R有不少曾經很死黨的,但生活及價值世界不一樣的,始終變左hi bye 得閑飲茶friends。

現與這群知己老友聚會, 近年這些朋友也覺得R變了, 變得越來越親切可人,生人可近。

過去多年, R年少缺點多多,自我中心,全多得老友們的包容及寬厚。人大了,  明白"朋友" 的可貴及"真友誼"的價值。

坦白講, R家有任何急事需幫忙, 一個電話,身邊會即刻有三位真心老友H,J,K出現幫手。同樣, 任何事, 一個電話, 無論這幾個老友身處何方,R也會即到幫手,二話不說。


R的太太, 表面朋友很多,尤其近年學校幼稚園一大班師奶, 但真心能憂喜與共的,是沒有。太太很少參與 這班師奶群組討論,有幾個師奶八面玲瓏,但最喜說人壞話, R忍不住提太太,最要小心擇友,尤其這類搞屎棍。

擇友要看"心地"。 口不擇言,滿口人家壞話的, 必需遠離。
相反, 好心場及厚道的人, 多結交心也無妨。

R近年交了一位好朋友- M牧師。
排除宗教, M是難得一位能交心與推心置腹的朋友。
良朋益友難求, 一生的老友更是難得。
R懂得珍惜。

真心的老友, 就是能"憂喜與共"。
男人的世界, 背後有個好老婆, 身邊有班好兄弟一樣緊要。

慶幸自己中學至今, 老友總是出現。
很搞笑,現在最交心的兩個知己,就偏偏是讀書時R最唔順超,學校隻揪打過大交的兩位。

跟他們二位家庭聚會時,一班細路女人, 無人相信我們這幾個父親老友,曾經打過大交隻揪過幾場,超搞笑。












5月 13, 2016

打醒十二分警覺- 2016年5月

本來寫了一些私事,遊記與投資部署及看法,寫好後, 還是保留作自家收藏日記,費時太深入到肉,主觀偏激但又是超真實貼地。 無謂嘩眾取寵,跌市去抽水舔血。

新如坡旅行回來一陣,昨剛已book好7月頭機票酒店,準備下一個親子遊行程,例牌菜東京8日。 今年最好節目及精力就係去旅行,週圍玩餐勁,做正經事同玩樂一樣要出色。

有空看自己寫的blog文, 認叻都要大膽講,比報紙佬貼地,比統計公佈數據快,全因為自身感受,實體經濟感受到就即隨心寫,打實戰唔洗等,數據真實無濟後 。

接著經濟環境會更差,打工小心被裁。 
若被裁就即被廢武功。
錦上添花多的是, 雪上加霜,禍不會單行也是事實。

小心價值投資陷阱。 本"通書"真係要改版, 與時並進, 愛佢變成害死你。通書要改, 因為核心價值投資的外圍正是有毒山埃核心內圍。 
 

星期五3點半,例牌早走放假半日去跑步,今年開始每星期4天半工作。跑步,舉鐵及 打泰拳是R每星期必做三日的運動。
三餐無大問題,中佬R更要做好飲食與運動的鍛煉。

恆指又2萬不保,中壽得番16.4,中行2.99/ 工商3.87/建行4.61
聯想4.97/ 中移83.7.... 

股市最怕閃崩, 無厘頭由慢慢跌後至幾日大暴急跌,脫生機會短而急。 人對多日跌市麻目了時就唔曉走,個個想等反彈而偏彈都唔彈就大大力插。

股市不講太多。總之不向下溝,不槓杆不玩derivatives是保命首要。打醒十二分警覺。呢一鋪無必要show hand曬冷。
有唔妥, 速逃!



















  

4月 11, 2016

旅行回來,再出發。

剛從東京回來香港不久, 旅途玩足8日,行程由太太安排,所有人也很滿意,很好玩,全部人食到肥幾磅而回。


今次住銀座區, 去東南西北什麼地方也極方便, 親子遊行程主要以細路為先, 賞櫻遊下公園及去了一些新開的點,近幕張的超巨無霸Aeon mall, 玩下攀石牆,去下Kandu即Kidzania之類比細路扮下護士,警察,速遞員等..
 


今趟真係住得舒適, 食得招積, 玩得出色, 買野超值。
食和牛神戶牛...鐵板燒蟹,鰻魚飯,海膽...結果,上星期回來香港要連續跑了4日5公里左右,才清減了一點。

旅程實在太好玩, 上機回港前,班細路離開東京時全部喊住話唔想走, 唔舍得這地方。 結果, 7月我們原班人馬8個,另加好友H一家, 共12人,暑假又會再戰東京,這一次R太太會安排細路去下東京近郊擇下水果。

回港才看下港股, 仍然處半生不死狀態,內銀更如由債變股,咁都得?

回看上一年及今年首季,看一看自己的阿婆級膽小KISS的資產配置組合, 居然贏盡那些收幾千萬年薪的財金官員及所謂的基金經理,專家高手。

R最主要受惠於股票倉沒什損手的原故及日元及黃金的升幅。

昨朋友H誠邀結伴去新加坡玩週未幾日,R問過家裡大老板ok,細路請假2天便可。結果玩即興,過幾日,今星期六,R一家又會飛去新如坡玩4日,例牌國泰機,照舊住上次Shangrili Rasa Sentosa,新加坡無什麼景點想再去,今趟主要係同細路去玩下水,放松下,住玩皆在sentosa。

放假前後, R純參觀,看過一些何文田新樓盤one homantin, 皓畋....地區及3房心水單位,價錢就仍不是。 這刻R不會棒場去落票認購,地產代理講到天花龍凰幾咁罕有都好,結果開賣咪一樣撻Q,根本有購買力的用家已不多亦不笨急於一時入市。
當發展商認清楚自己是賣剩蔗時,一手都賣唔去, 二手又自然會跟減,咁就過癮。

當R自住的樓也大跌幾成感覺有D hard feeliing時,那就是時侯去細屋搬大屋了。現在還不是時機。

R全倉幾本是現金,要在投資上不做傻事,最好就係去放假外遊玩。 玩住耐心等待時機,時間感覺就過得快一點。

話時話, D飛行厘數有近10萬公里有多,自己從未試過點搞asia miles redeem, 都係時候研究一下點換機票獎勵。

題外話, 今趟在東京在上野伊豆榮本店book 了間房食天皇也讚不絕口的鰻魚飯,(看圖) ,真係好好食。



回港見到吉X家新出左個鰻魚飯,個廣告都比住伊豆榮, R結果忍不住想回味那鰻魚飯的感覺,結果買了一客外賣$82蚊。
回家打算嘗試找回東京那初戀的感覺

結果回家一打開, 仆你個街, 腥臭無比, 咬了一口,un 過條車胎。 真係食唔落口,除左白飯留底,三秒9就掃呢幾舊屎落垃圾筒。今鋪,我認輸左82蚊,因太天真。大家記住唔好試。